କଟକରେ ITAT କମ୍ପ୍ଲେକ୍ସ ଉଦଘାଟିତ୍, ଉପକୃତ ହେବ ଉତ୍ତର-ପୂର୍ବ ଭାରତ

କଟକ: କଟକରେ ଉଦଘାଟିତ ହୋଇଛି ଆୟକର ଅପିଲେଟ୍ ପ୍ରାଧିକରଣ (ITAT) । ଭିଡିଓ କନଫରେନ୍ସିଂ ଯୋଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିଛନ୍ତି । ଏହି ଅବସରରେ ଭିଡିଓ କନଫରେନ୍ସିଂରେ କାର୍ଯ୍ୟକ୍ରମରେ କେନ୍ଦ୍ର ଆଇନ୍ ମନ୍ତ୍ରୀ ରବିଶଙ୍କର ପ୍ରସାଦ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେଇଥିଲେ । ଏହା ଆୟକର ବିବାଦ ସମ୍ପର୍କରେ ଓଡ଼ିଶାର ସର୍ବୋଚ୍ଚ ପ୍ରାଧିକରଣ ଭାବେ କାମ କରିବ । ଏହା ଦ୍ୱାରା ସହଜରେ ଆୟକର ନେଇ ରାଜ୍ୟ ଭିତରେ ଉପୁଜୁ ଥିବା ବିବାଦର ଶୀଘ୍ର ସମାଧାନ ହୋଇପାରିବ ।

ITATର ଉଦଘାଟନୀ ଅବସରରେ କେନ୍ଦ୍ର ଆଇନ୍ ମନ୍ତ୍ରୀ ରବିଶଙ୍କର ପ୍ରସାଦ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଶଂସା କରିଛନ୍ତି । ରାଜ୍ୟ ସରକାର ତ୍ୱରିତ୍ୱ ଗତିରେ ଜମି ପ୍ରଦାନ କରିଥିଲେ । ୨୦୧୭ରେ ଭବନର ଶିଳାନ୍ୟାସ କଟକରେ ହୋଇଥିବା ବେଳେ ଆଜି ଉଦଘାଟିତ୍ ହୋଇଛି । ଏତେ ଶୀଘ୍ର କାମ ସାରିବା ଶ୍ରେୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଦେଇଛନ୍ତି କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦ ।

କଟକରେ ଭାରତର ତୃତୀୟ ଓ ପୂର୍ବ ଭାରତରେ ITATର ପ୍ରଥମ ବିଲ୍ଡିଂ ଉଦଘାଟନ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖୁସିବ୍ୟକ୍ତ କରିଛନ୍ତି । ଏଠାରେ କେବଳ ଓଡ଼ିଶା ନୁହଁ ରାଞ୍ଚି, ପାଟଣା ଓ ଗୌହାଟି ବେଞ୍ଚର କେସ୍ ସମାଧାନ ହୋଇପାରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । କଟକରେ ୧୯୭୦ ମସିହାରେ ବିଜୁ ବାବୁଙ୍କ ଉଦ୍ୟମରେ ITAT ପ୍ରତିଷ୍ଠା ହୋଇଥିଲା ବୋଲି ମୁଖ୍ୟମନ୍ତ୍ରୀ କହିଛନ୍ତି ।

ଉଦଘାଟନୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି- ଜଗନ୍ନାଥଙ୍କ ଆଶୀର୍ବାଦରୁ ITAT କଟକ ବେଞ୍ଚ ଉଦଘାଟିତ୍ ହୋଇଛି । କଟକର ଏହି ବେଞ୍ଚ କେବଳ ଓଡ଼ିଶା ନୁହେଁ ବରଂ ଉତ୍ତର-ପୂର୍ବ ଭାରତର କରଦାତାଙ୍କୁ ସୁବିଧା ଦେବ । ଏହାଦ୍ୱାରା କୋଲକାତା ଜୋନର କରଦାତା ଉପକୃତ ହେବେ ବୋଲି ପିଏମ୍ କହିଛନ୍ତି । ଓଡ଼ିଶା ପାଇଁ, ଓଡ଼ିଶା ଲୋକଙ୍କ ସେବା ପାଇଁ ସମର୍ପିତ ଥିବା ବିଜୁ ବାବୁଙ୍କୁ ଉଦ୍ୟମରେ ITAT ପ୍ରତିଷ୍ଠା ହୋଇଥିଲା । ତାଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।