ବିରୋଧୀ ଦଳ ନେତାଙ୍କ ସହ କଥା ହେଲେ ପ୍ରଧାନମନ୍ତ୍ରୀ, ସରକାର ନେଇଥିବା ପଦକ୍ଷେପ ବାବଦରେ ଦେଲେ ସୂଚନା
ନୂଆଦିଲ୍ଲୀ: ଦେଶରେ କରୋନା ଭାଇରସ ଆତଙ୍କ ଭିତରେ ଆଜି ପ୍ରଧାନମନ୍ତ୍ରୀ ଲୋକସଭା ଓ ରାଜ୍ୟସଭାର ବିରୋଧୀ ଦଳ ନେତାଙ୍କ ସହ ଭିଡିଓ କନଫରେନ୍ସିଂ ଜରିଆରେ କଥା ହୋଇଛନ୍ତି । ଆଲୋଚନା କାଳରେ ପ୍ରଧାନମନ୍ତ୍ରୀ ବିରୋଧୀ ଦଳ ନେତାଙ୍କୁ ସରକରା ନେଇଥିବା ପଦକ୍ଷେପ ବାବଦରେ ସୂଚିତ କରିଛନ୍ତି । ସେ ମଧ୍ୟ ବିରୋଧୀ ଦଳ ନେତାଙ୍କୁ କରୋନା ବିରୋଧୀ ଯୁଦ୍ଧ ମିଶିକରି ଲଢିବା ପାଇଁ ଆହ୍ୱାନ ଦେଇଛନ୍ତି ।
ମୋଦି ବିରୋଧୀ ଦଳଙ୍କୁ ସରକାରଙ୍କ ପଦକ୍ଷେପ ବାବଦରେ ଜଣାଇଲେ
କରୋନା ସଂକଟ କାଳରେ ବିରୋଧୀ ଦଳଙ୍କୁ ଭରସାକୁ ନେଇ ପଦକ୍ଷେପ ନେବା ମୋଦି ସରକାରଙ୍କ ଯୋଜନା ଅଟେ । ଏହାମଧ୍ୟରେ ଖବର ମିଳୁଛି ଯେ, ଲକ୍ ଡାଉନକୁ ୧୪ ଏପ୍ରିଲରୁ ଆଗକୁ ବଢା ଯାଇପାରେ । ଦେଶର ୮ ରାଜ୍ୟ ଲକ୍ ଡାଉନକୁ ଜାରି ରଖିବା ସପକ୍ଷରେ ଅଛନ୍ତି । ଏହି ରାଜ୍ୟଙ୍କ ଭିତରେ ମହାରାଷ୍ଟ୍ର ଓ ଦିଲ୍ଲୀ ମଧ୍ୟ ରହିଛନ୍ତି ।
ବୈଠକରେ କିଏ କିଏ ସାମିଲ ଥିଲେ ?
ବୈଠକରେ କଂଗ୍ରେସ ନେତା ଅଧିର ରଂଜନ ଚୌଧୁରୀ, ରାଜ୍ୟସଭାରେ କଂଗ୍ରେସ ନେତା ଗୁଲାମ ନବୀ ଆଜାଦ, ସମାଜବାଦୀ ପାର୍ଟିର ରାମଗୋପାଳ ଯାଦବ, ବିଏସପିର ସତିଶ ମିଶ୍ର, ଟିଏମସିର ସୁଦିପ ବନ୍ଦୋପାଧ୍ୟୟ, ଏଲଜେପିର ଚିରାଗ ପାଶ୍ୱାନ ସାମିଲ ଥିଲେ । ୨୪ ମାର୍ଚ୍ଚରୁ ଲକ୍ ଡାଉନ୍ ଲାଗୁ ହେବା ପରଠାରୁ ବିରୋଧୀ ଦଳ ନେତାଙ୍କ ସହ ଏହା ହେଉଛି ପ୍ରଧାନମନ୍ତ୍ରୀଙ୍କ ପ୍ରଥମ ଆଲୋଚନା ।
ଦେଶରେ ଏପର୍ଯ୍ୟନ୍ତ ୧୪୯ ଜଣଙ୍କ ମୃତ୍ୟୁ
ଆଜି ଦେଶରେ କରୋନା ସଂକ୍ରମିତଙ୍କ ସଂଖ୍ୟା ୫ ହଜାର ଟପିଛି । ଗତ ୨୪ ଘଣ୍ଟା ମଧ୍ୟରେ ୩୫ ଜଣଙ୍କ ମୃତ୍ୟୁ ହୋଇଛି । ୨୪ ଘଣ୍ଟା ମଧ୍ୟରେ ୭୦୦ ନୂଆ ମାମଲା ସାମ୍ନାକୁ ଆସିଥିବା ବେଳେ ଦେଶରେ ଏଯାବତ ମୋଟ ୧୪୯ ଜଣ କରୋନାରେ ପ୍ରାଣ ହରାଇଲେଣି ।
