ଦୁଇ ଦିନିଆ ଗୁଜୁରାଟ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
ନୂଆଦିଲ୍ଲୀ : ୪ଟି ରାଜ୍ୟରେ ବିଜେପି ବିପୁଳ ଭୋଟରେ ଜିତିବା ପରେ ଗୁଜୁରାଟ ବିଧାନସଭା ପାଇଁ ଅଣ୍ଟା ଭିଡ଼ିଛନ୍ତି ପ୍ରଧାନମନ୍ତ୍ରୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାରଠାରୁ ଦୁଇ ଦିନିଆ ଗୁଜରାଟ ଗସ୍ତରେ ଯାଉଛନ୍ତି । ଏହି ଗସ୍ତରେ ସେ ରୋଡ ଶୋ କରିବେ ଏବଂ ଏଥିରେ ପ୍ରାୟ ୪ଲକ୍ଷ ଲୋକ ସାମିଲ ହେବାନେଇ କୁହାଯାଉଛି । ଆଜି ଅପରାହ୍ନରେ ପ୍ରଧାନମନ୍ତ୍ରୀ ଗୁଜୁରାଟ ପଞ୍ଚାୟତ ମହାସମ୍ମେଳନରେ ଅଂଶଗ୍ରହଣ କରିବେ ଏବଂ ସମାବେଶକୁ ଉଦବୋଧନ ଦେବେ ।
ପ୍ରଧାନମନ୍ତ୍ରୀ ଆସନ୍ତାକାଲି ରାଷ୍ଟ୍ରୀୟ ପ୍ରତିରକ୍ଷା ବିଶ୍ୱବିଦ୍ୟାଳୟ (ଆରଆରୟୁ)ର ନବ ନିର୍ମିତ ସୌଧକୁ ଶନିବାର ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିବେ । ସେ ଆରଆରୟୁର ପ୍ରଥମ ସମାବର୍ତ୍ତନ ଉତ୍ସବରେ ମୁଖ୍ୟ ଅତିଥି ଭାବେ ମଧ୍ୟ ଅଭିଭାଷଣ ପ୍ରଦାନ କରିବେ। ସେହିପରି ପ୍ରଧାନମନ୍ତ୍ରୀ ଏକାଦଶ ଖେଳ ମହାକୁମ୍ଭ ଶୁଭାରମ୍ଭ ନେଇ ଘୋଷଣା କରିବା ସହ ଅଭିଭାଷଣ ପ୍ରଦାନ କରିବେ।
ସୂଚନାଯୋଗ୍ୟ, କରୋନା କାରଣରୁ ପ୍ରାୟ ୨ବର୍ଷ ପରେ ଏମିତି ଏକ ରୋଡ ଶୋ କରିବାକୁ ଯାଉଛନ୍ତି ପ୍ରଧାନମନ୍ତ୍ରୀ ଯେଉଁଥିରେ ଲକ୍ଷାଧିକ ଲୋକ ସାମିଲ ହେବା ନେଇ ଅନୁମତି ମିଳିଛି । ଗୁଜୁରାଟରେ ତିନି ପର୍ଯ୍ୟାୟ ପଞ୍ଚାୟତିରାଜ ବ୍ୟବସ୍ଥା ରହିଛି, ଯେଉଁଥିରେ ୩୩ ଟି ଜିଲ୍ଲା ପଞ୍ଚାୟତ, ୨୪୮ ତାଲୁକା ପଞ୍ଚାୟତ ଏବଂ ୧୪,୫୦୦ରୁ ଅଧିକ ଗ୍ରାମପଞ୍ଚାୟତ ରହିଛି ।
