ଭକ୍ତଙ୍କ ଭାବାବେଗ ସହ ଖେଳ, ଅନଲାଇନ ଆପରେ ମହାପ୍ରଭୁଙ୍କ ବିଭିନ୍ନ ସେବା ପାଇଁ ରେଟଚାର୍ଟ

ପୁରୀ: ଅନଲାଇନରେ ଭକ୍ତଙ୍କ ଭାବନା ସହ ଖେଳ । ସ୍ବତନ୍ତ୍ର ଆପରେ ମିଳୁଛି ରେଟ୍ ଚାର୍ଟ । ଭକ୍ତଙ୍କୁ ଠକିବା ପାଇଁ ଉଦ୍ୟମ ଅଭିଯୋଗ । ଉତ୍ସବ ନାମକ ଆପ ଜରିଆରେ ଠକିବାକୁ ପ୍ରୟାସ । ହଜାର ହଜାର ଟଙ୍କା ଦେଇ ଶ୍ରୀମନ୍ଦିରରେ ମହାପ୍ରଭୁଙ୍କ ପୂଜା, ଅନ୍ନଦାନ ଆଟିକା, ଧ୍ବଜା ପରିବର୍ତ୍ତନ, ଶୁଖିଲା ଭୋଗ, ନିର୍ମାଲ୍ୟ ହୋମ ଡେଲିଭରୀ ସହ ମାସିକିଆ, ବର୍ଷିକିଆ ପୂଜା ଆଦି ବିଧିରେ ଅନଲାଇନ ମାଧ୍ୟମରେ ସାମିଲ ହେବାର ପ୍ରଲୋଭନ ଦେଇ ଠକେଇ ଉଦ୍ୟମ କରାଯାଉଛି । ଏନେଇ ଶ୍ରୀମନ୍ଦିର ପ୍ରଶାସନକୁ ଚିଠି ଲେଖି ସିଂହଦ୍ବାର ଥାନା ପୋଲିସ ଜଣାଇଥିବା ବେଳେ ରିପୋର୍ଟକୁ ଅପେକ୍ଷା କରାଯାଇଛି ।

ଶ୍ରୀବିଗ୍ରହଙ୍କ ନିକଟରେ ମାସିକିଆ ପୂଜା ପାଇଁ ୮ ହଜାର ୧୦୦ ଟଙ୍କା ପୈଠ କରିବାକୁ ଏହି ଉତ୍ସବ ଆପରେ କୁହାଯାଇଥିବା ବେଳେ ଏଭଳି କୌଣସି ନିଷ୍ପତ୍ତି ଶ୍ରୀମନ୍ଦିର ପ୍ରଶାସନ ନେଇ ନଥିବା ଜଣାପଡିଛି । ଶ୍ରୀମନ୍ଦିର ମୁଖ୍ୟ ପ୍ରଶାସକ ଘଟଣାକୁ ଗୁରୁତର ସହ ନେଇ ବିହିତ ପଦକ୍ଷେପ ନିଆଯିବ ବୋଲି କହିଛନ୍ତି । ଏହି ଘଟଣା ନେଇ ଶ୍ରୀମନ୍ଦିର ପ୍ରଶାସନ ,ପୋଲିସ ଓ ଜିଲ୍ଲା ପ୍ରଶାସନର ତ୍ୱରିତ ପଦକ୍ଷେପ ନେବାକୁ ସେବାୟତ ମନେ ଦାବି କରିଛନ୍ତି ।

ହିନ୍ଦୁ ଧର୍ମ ଓ ଶ୍ରୀଜଗନ୍ନାଥ ସଂସ୍କୃତି ପ୍ରତି ଏପରି ଅନଲାଇନ ମାଧ୍ୟମରେ ଟଙ୍କା ଆଦାୟ ଠିକ ନୁହେଁ ବୋଲି କହିଛନ୍ତି ବରିଷ୍ଠ ସେବାୟତ । ସେବାୟତମାନଙ୍କ ଅଧିକାର କ୍ଷୁର୍ଣ୍ଣ କରି ଏପରି ପୂଜା କରିବା ପାଇଁ ଅନଲାଇନରେ ଆଦାୟ, କୋଟିକୋଟି ଜଗନ୍ନାଥ ପ୍ରେମୀଙ୍କୁ ଆଘାତ ଦେଇଥିବା ବେଳେ ଏହା ଉପରେ କାର୍ଯ୍ୟନୁଷ୍ଠାନ ନେବା ଜରୁରୀ । ଜଗନ୍ନାଥ ମହାପ୍ରଭୁଙ୍କ ମହିମାକୁ ନେଇ ବହୁ ଗୋଷ୍ଠୀ ନିଜ ଫାଇଦା ନେଇ ଅନଲାଇନ ମାଧ୍ୟମରେ ଭକ୍ତଙ୍କୁ ଠକିବା ଘଟଣା ଧୀରେ ଧୀରେ ବଢ଼ିବାରେ ଲାଗିଛି ।