ପିପିଲି: ପଥର ମୂର୍ତ୍ତି ତିଆରି ପ୍ରତିଷ୍ଠାନରୁ ବିଭିନ୍ନ ଦେବଦେବୀଙ୍କ ମୂର୍ତ୍ତି ଚୋରି ଅଭିଯୋଗରେ ଜଣେ କିନ୍ନରକୁ ଗିରଫ କରିଛି ପିପିଲି ପୋଲିସ। ଗିରଫ ଅଭିଯୁକ୍ତ ସତ୍ୟବାଦୀ ଥାନା ଜୟପୁର ଗାଁର ଚାନ୍ଦିନୀ ମୁଦୁଲି। ପୋଲିସ ତା’ଠାରୁ ଶିବଲିଙ୍ଗ ସହ ବିଭିନ୍ନ ଦେବଦେବୀଙ୍କର ୧୬ଟି ମୂର୍ତ୍ତି ଜବତ କରିଛି।
ପିପିଲି ଥାନା ଶିଉଳା ଗାଁର ଜାତୀୟ ରାଜପଥ ପାର୍ଶ୍ଵରେ ଏକ ପଥର ମୂର୍ତ୍ତି ତିଆରି ପ୍ରତିଷ୍ଠାନରୁ ଗତ ଅକ୍ଟୋବର ମାସଠାରୁ ମୂର୍ତ୍ତି ଚୋରି କରୁଥିଲା ଅଭିଯୁକ୍ତ। ସିସିଟିଭିରେ ଚୋରିର ଦୃଶ୍ଯ କଏଦ ହୋଇଛି। ଚାନ୍ଦିନୀ ମୁଦୁଲି ଏକାଧିକ ଥର ମୂର୍ତ୍ତି ଚୋରି କରିନେଉଥିବା ଦୃଶ୍ଯ ସିସିଟିଭିରେ କଏଦ ହୋଇଛି। ଏନେଇ ଥାନାରେ ଅଭିଯୋଗ ପରେ ପୋଲିସ ତଦନ୍ତ କରି ଅଭିଯୁକ୍ତକୁ ଗିରଫ କରିବା ସହ ତା ନିକଟରୁ ୪ଟି କାଳୀମାତାଙ୍କ ମୂର୍ତ୍ତି, ୫ଟି ଲକ୍ଷ୍ମୀ ମୂର୍ତ୍ତି, ୨ଟି ସରସ୍ବତୀ ମୂର୍ତ୍ତି, ୩ଟି ହନୁମାନ ମୂର୍ତ୍ତି ଓ ୨ଟି ଶିବଲିଙ୍ଗ ଜବତ କରିଛି।
