କୋଭିଡ୍ କଟକଣା ଭାଙ୍ଗି ୩୦୦ ଥର ବସ୍ ଉଠ୍, ଆଖି ବୁଜିଲେ ବ୍ୟକ୍ତି
ମାନିଲା: କୋଭିଡ୍ କଟକଣା ଭାଙ୍ଗିବା ଯୋଗୁଁ ଜଣେ ବ୍ୟକ୍ତିଙ୍କ ଜୀବନ ଚାଲି ଯାଇଛି । ଫିଲିପ୍ପାଇନ୍ସରେ ଘଟିଛି ଏଭଳି ଘଟଣା । କାଭିଟେ ପ୍ରୋଭିନ୍ସରେ ରହୁଥିବା ଡରେନ୍ ମାନାଗ ଏପ୍ରିଲ୍ ୧ରେ ପାଣି କିଣିବାକୁ ଘରୁ ବାହାରକୁ ଯାଉଥିଲେ । ତାଙ୍କ ଦୋଷ ଥିଲା ଲକଡାଉନ୍ ସମୟରେ ପାଣି ପାଇଁ ସେ ଘରୁ ବାହାରିବା । ବାଟରେ ପୋଲିସ ତାଙ୍କୁ ଧରିଥିଲା । ପରେ ୧୦୦ ଥର ବସ୍ ଉଠ୍ ହେବାକୁ କହିଥିଲା ପୋଲିସ ।
ରିପୋର୍ଟ ଅନୁସାରେ ବ୍ୟକ୍ତିଜଣଙ୍କୁ ଲଗାତାର ୩୦୦ ଥର ବସ୍ ଉଠ୍ କରାଯାଇଥିଲା । ଘରକୁ ଫେରିବା ପରେ ବ୍ୟକ୍ତି ଜଣଙ୍କ ଅସୁସ୍ଥତା ଅନୁଭବ କରିଥିଲେ । ପରେ ତାଙ୍କର ମୃତ୍ୟୁ ହୋଇଛି ।
ଫିଲିପ୍ପାଇନ୍ସରେ ୮ ଲକ୍ଷରୁ ଅଧିକ କରୋନା ସଂକ୍ରମିତ ଚିହ୍ନଟ ହୋଇଥିବା ୧୪ ହଜାରରୁ ଅଧିକ ମୃତ୍ୟୁ ହୋଇଛି । ଗତ ମାସରେ ସଂକ୍ରମଣ ବୃଦ୍ଧି ପାଇବାରୁ କର୍ତ୍ତୃପକ୍ଷ ୨୫ ମିଲିୟନ ଲୋକଙ୍କୁ ଲକଡାଉନ୍ ଭିତରେ ରଖିଛନ୍ତି ।
ବସ୍ ଉଠ୍ ପରେ ବ୍ୟକ୍ତିଙ୍କ ମୃତ୍ୟୁର ତଦନ୍ତ ନିର୍ଦ୍ଦେଶ ଦେଇଛନ୍ତି ସ୍ଥାନୀୟ ମେୟର । ବସ୍ ଉଠ୍ କରାଇଥିବା ପୋଲିସ ଅଧିକାରୀଙ୍କ ବିରୋଧରେ ଅପରାଧିକ ମାମଲା ରୁଜୁ କରାଯାଇଛି । କରୋନା କଟକଣା ନାଁରେ ଅତ୍ୟଧିକ ଅମାନୁଷିକ ନିର୍ଯାତନା ଦେବାରୁ ବ୍ୟକ୍ତିଜଣଙ୍କ ମୃତ୍ୟୁ ହୋଇଥିବା ଅଭିଯୋଗ ହେଉଛି ।
