୧୦ ଦିନରେ ୧୦ ଥର ବଢ଼ିଲାଣି ପେଟ୍ରୋଲ ଓ ଡିଜେଲ ଦର
ଭୁବନେଶ୍ୱର: ସବୁଠି ପେଟ୍ରୋଲ ଦରରେ ଲାଗିଛି ନିଆଁ । କିଛି ଦିନ ହେଲା ସାରା ଦେଶରେ ତେଲ ଦର କମିବାର ନାଁ ଧରୁନାହିଁ । ଗତ ୧୦ ଦିନରେ ୧୦ ଥର ବଢ଼ିଲାଣି ଦର । ଆଜି ଭୁବନେଶ୍ୱରରେ ପ୍ଲେନ୍ ପେଟ୍ରୋଲ ଲିଟର ପିଛା ୮୩ ଟଙ୍କା ୪୯ ପଇସା ଥିବା ବେଳେ ସ୍ପିଡ୍ ପେଟ୍ରୋଲର ଦାମ ରହିଛି ୮୬ ଟଙ୍କା ୪୯ ପଇସା । ସେହିପରି ଡିଜେଲର ଦାମ ୭୯ ଟଙ୍କା ୬୦ ପଇସା ରହିଛି ।
ଗତ ୨ ବର୍ଷରେ ତେଲ ଦର ସର୍ବୋଚ୍ଚ ସ୍ତରରେ ପହଞ୍ଚିବା ପ୍ରତିବାଦରେ ଆଜି ରାଜରାସ୍ତାକୁ ଓହ୍ଲାଇଛି ସିପିଆଇ । ମହାମାରୀ କାଳରେ ଲୋକ ୨ ବେଳା ଦୁଇ ମୁଠା ଖାଇବାକୁ ପାଉନଥିବା ବେଳେ ତେଲ ଓ ରନ୍ଧନ ଗ୍ୟାସ ଦରବୃଦ୍ଧିକୁ ବିରୋଧ କରିଛି ସିପିଆଇ । ଅନ୍ତର୍ଜାତୀୟ ସ୍ତରରେ ଅଶୋଧିତ ଦର ବୃଦ୍ଧି ଯୋଗୁଁ ଦେଶରେ ତେଲ ଦର ବଢ଼ି ଚାଲିଛି ।
ଅନ୍ତର୍ଜାତୀୟ ବଜାରରେ ବ୍ରେଣ୍ଟ କ୍ରୁଡ ମୂଲ୍ୟ ୪୭.୪୪ ଡଲାର ଓ ଇଣ୍ଡିଆନ ବାସ୍କେଟ ମୂଲ୍ୟ ୪୭.୪୧ ଡଲାରକୁ ବଢିଛି । ଏହା ଫଳରେ ଅନ୍ତର୍ଜାତୀୟ ବଜାରରେ ତେଲ ଦର ବଢ଼ି ଚାଲିଥିବା କହିଛନ୍ତି ଅଲ୍ ଓଡିଶା ପେଟ୍ରୋଲ ପମ୍ପ ଡିଲର ଆସୋସିଏସନ ସାଧାରଣ ସମ୍ପାଦକ । ଅଶୋଧିତ ତୈଳ ଦର ବୃଦ୍ଧି କମିବାରେ ନାଁ ଧରୁନଥିବା ବେଳେ ସରକାର ଟିକସ କମାଇଲେ ଲୋକେ କିଛି ରିହାତି ପାଇବେ ବୋଲି ମତ ପ୍ରକାଶ ପାଇଛି ।
