ବୃଦ୍ଧ ମାଲିକଙ୍କ ଶବକୁ ଜଗିଛି ପୋଷ କୁକୁର, କାହାରିଙ୍କୁ ପୂରାଇ ଦେଉନି ପାଖ

ଅନୁଗୁଳ: ମାଲିକ ଓ ପାଳିତ କୁକୁରର ସମ୍ପର୍କ । ମାଲିକଙ୍କ ମୃତ୍ୟୁ ପରେ ବି ପାଖ ଛାଡୁନି ତାଙ୍କ ପୋଷା କୁକୁର । ଶବ ପାଖରେ ଜଗ ରହିଛି । ଯିଏ ପାଖକୁ ଯାଉଛନ୍ତି ଭୁକିବା ସହ କାମୁଡ଼ି ଗୋଡାଉଛି । ଏମିତି ଘଟଣା ଦେଖିବାକୁ ମିଳିଛି ଅନୁଗୁଳରେ । ଏଠାରେ ଜଣେ ବୃଦ୍ଧଙ୍କ ଶରୀର ଏକ ଗଛରେ ଛୁଲୁଛି । ଆଉ ତଳେ ବୃଦ୍ଧଙ୍କ ଶବକୁ ଜଗି ବସିଛି ତାଙ୍କ ପୋଷା କୁକୁର । ଯାହା ସମସ୍ତଙ୍କୁ ଚକିତ କରିଛି ।

ଅନୁଗୁଳ ରାଣୀଗୋଡ଼ା ଗାଁର ଏ ଘଟଣା ଘଟିଛି । ରାଣୀଗୋଡ଼ାର ମଣିଆ ବେହେରା ଗାଁ ପୋଖରୀ ହୁଡାରେ ଗାଈ ପାଳନ କରି ଦୁଗ୍ଧ ବ୍ୟବସାୟ କରି ଆସୁଥିଲେ । କିଛିଦିନ ତଳେ ପୋଖରୀ ନିଲାମ ହୋଇଥିଲା । ନିଲାମଧାରୀ ବଦଳିବା ପରେ ନୂଆଁ ନିଲାମଧାରୀ ସେଠାରୁ ଗାଈଗୋରୁ ବାହାର କରିବାକୁ ଧମକ ଦେବା ସହ ମଣିଆଙ୍କୁ ଅନେକ ସମୟରେ ଗାଳି ଗୁଲଜ କରୁଥିଲେ ।

ଆଜି ସକାଳୁ ମଣିଆଙ୍କ ମୃତଦେହ ପୋଖରୀ ହୁଡାରେ ଥିବା ଏକ ଗଛରେ ଝୁଲୁଥିବା ସ୍ଥାନୀୟ ଲୋକ ଦେଖି ପରିବାର ଲୋକଙ୍କୁ ଖବର ଦେଇଥିଲେ । ଖବର ପ୍ରଚାର ପରେ ସେଠାରେ ଲୋକଙ୍କ ଭିଡ଼ ଜମିଥିଲା । ସେହି ସମୟରେ ମଣିଆଙ୍କ ପୋଷା କୁକୁର ଝୁଲନ୍ତା ମୃତଦେହ ତଳେ ଶୋଇ ରହିଥିବା ଦେଖିବାକୁ ମିଳିଥିଲା । ମୃତଦେହ ପାଖକୁ କେହି ଯିବାକୁ ଚେଷ୍ଟା କଲେ ତାକୁ କାମୁଡି ଗୋଡ଼ାଇଥିଲା । ଖବର ପାଇ ଅନୁଗୁଳ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ହେଲେ ପୋଲିସକୁ ମଧ୍ୟ ପାଖକୁ ଯିବାକୁ ଦେଇ ନଥିଲା ପୋଷା କୁକୁରଟି ।