ପ୍ରତିଶ୍ରୁତି ମନେ ପକାଇ ପ୍ରଧାନମନ୍ତ୍ରୀ ମୋଦିଙ୍କୁ ଚିଠି ଲେଖିଲେ ରାଉରକେଲାବାସୀ
1 min read
ରାଉରକେଲା: IGHକୁ ନେଇ ତେଜିଲା ଆନ୍ଦୋଳନ । ୬ ବର୍ଷ ମଧ୍ୟରେ ପ୍ରଧାନମନ୍ତ୍ରୀ ପ୍ରତିଶ୍ରୁତି ଦେଇ ପାଳନ କରି ନଥିବାରୁ ଚିଠି ଲେଖି ଅବଗତ କରାଇଛନ୍ତି ରାଉରକେଲାବାସୀ । ୨୦୧୫ ଏପ୍ରିଲ ପହିଲାରେ ସୁପରସ୍ପେଶିଆଲିଟି ହସ୍ପିଟାଲ ପାଇଁ ପ୍ରତିଶ୍ରୁତି ଦେଇଥିଲେ ପ୍ରଧାନମନ୍ତ୍ରୀ । ୬ ବର୍ଷ ବିତିଯାଇଥିଲେ ସୁଦ୍ଧା ପ୍ରତିଶ୍ରୁତି ପୂରଣ ହୋଇ ନଥିବାରୁ ହଜାର ହଜାର ପୋଷ୍ଟକାର୍ଡ ଲେଖି ଅବଗତ କରାଇଛି ରାଉରକେଲା ନାଗରିକ ମଞ୍ଚ ।
ରାଉରକେଲା ଇସ୍ପାତ ଜେନେରାଲ ହସପିଟାଲକୁ ମେଡିକାଲ କଲେଜ ଓ ସୁପର ସ୍ପେଶିଆଲିଟି ହସ୍ପିଟାଲ କରିବା ପାଇଁ ପ୍ରଧାନମନ୍ତ୍ରୀ ୨୦୧୫ ମସିହା ଏପ୍ରିଲ ଏକ ତାରିଖ ଦିନ ରାଉରକେଲା ଗସ୍ତରେ ଆସି ସହରଵାସୀଙ୍କୁ ପ୍ରତିଶ୍ରୁତି ଦେଇଥିଲେ । ଏହାରି ଭିତେର ୬ ବର୍ଷ ବିତିଛି । ହେଲେ କେବଳ କୋଠା ଉଦଘାଟନ କରିଛନ୍ତି ରାଷ୍ଟ୍ରପତି । ନା ଅଛନ୍ତି ବିଶେଷଜ୍ଞ ଡାକ୍ତର ନା ସ୍ପେଶିଆଲିଟି ସୁବିଧା । ତେଣୁ ହଜାର ହଜାର ସହରବାସୀ ପ୍ରଧାନମନ୍ତ୍ରୀ ତାଙ୍କ ପ୍ରତିଶ୍ରୁତିକୁ ପାଳନ କରି ମେଡିକାଲ କଲେଜ ତୁରନ୍ତ କରିବା ପାଇଁ ଦାବି କରି ଚିଠି ଲେଖିଛନ୍ତି ।
ଦଳମତ ନିର୍ବିଶେଷରେ ବିଭିନ୍ନ ରାଜନୀତିକ ଦଳ, ଶ୍ରମିକ ସଂଗଠନ, ଗଣ ସଂଗଠନ, ସାମାଜିକ ସଂଗଠନ, ସାଂସ୍କୃତିକ ସଂଗଠନ, ଯୁବ ଓ ଛାତ୍ର ସଂଗଠନ ସହିତ ମହିଳା ସଂଗଠନର ସଦସ୍ୟମାନେ ଏକାଠି ହୋଇ ପ୍ରଧାନମନ୍ତ୍ରୀଙ୍କ ନିକଟକୁ ଚିଠି ଲେଖିଛନ୍ତି । ହସ୍ପିଟାଲରେ ବିଶେଷଜ୍ଞ ଡାକ୍ତର ନିଯୁକ୍ତି କରି ଏମ୍ସକୁ ହସ୍ତାନ୍ତର କରିବା ପାଇଁ ଦାବି ହୋଇଛି ।
ମେଡିକାଲ କଲେଜ ପ୍ରତିଷ୍ଠା କରିବା ପାଇଁ ପ୍ରଧାନମନ୍ତ୍ରୀ ଦେଇଥିବା ପ୍ରତିଶ୍ରୁତି ପାଳନ କରିବା ଦାବିରେ ଲକ୍ଷାଧିକ ସହରବାସୀ ପ୍ରଧାନମନ୍ତ୍ରୀଙ୍କ ନିକଟକୁ ଚିଠି ପଠାଇବେ ବୋଲି ନାଗରିକ ସୁରକ୍ଷା କମିଟି ପକ୍ଷରୁ ସୂଚନା ଦିଆଯାଇଛି ।
