କୋଲାବ ଜଳ ଭଣ୍ଡାର ବିଚ୍ଛିନ୍ନାଞ୍ଚଳ ଲୋକଙ୍କର ସରୁନି ଦୁଃଖ, ଏବେବି ବିପଦପୂର୍ଣ୍ଣ ଭାବେ ମେଡିକାଲ ଯାଉଛନ୍ତି ରୋଗୀ

କୋରାପୁଟ: ବିଛିନ୍ନାଞ୍ଚଳ ପାଇଁ ଆସିଥିବା ବୋଟ୍ ଆମ୍ବୁଲାନ୍ସ ଆସିବା ଦିନରୁ ଅଚଳ । ୬ ମାସ ପରେ ବି ଆମ୍ବୁଲାନ୍ସ ସେବା ପାଇବାରୁ ବଞ୍ଚିତ ଲୋକେ । ଲମତାପୁଟ ସି୍ଦିଘାଟ ଥିବା ବୋଟ ଆମ୍ବୁଲାନ୍ସ ୬ ମାସ ହେଲା ପଡି ଖତ ଖାଉଛି । ଏପଟେ ଲୋକେ ବାଧ୍ୟହୋଇ ଦେଶୀଡଙ୍ଗାରେ ରୋଗୀଙ୍କୁ ନେବାଆଣିବା କରୁଛନ୍ତି । ରାତିଅଧରେ ଡଙ୍ଗା ଚଳାଚଳ କରୁନଥିବାରୁ ରୋଗୀ ମୃତ୍ୟୁ ମୁଖରେ ପଡୁଥିବା ଅଭିଯୋଗ ହୋଇଛି ।

କୋଲାବ ଜଳ ଭଣ୍ଡାର ଭିତରେ ବିଛିନ୍ନାଞ୍ଚଳ ଭାବେ ରହିଛି ୪ଟି ପ଼଼ଞ୍ଚାୟତ । ସେମାନଙ୍କ ଯିବା ଆସିବାର ଏକ ମାତ୍ର ସାହା ଦେଶୀ ଡଙ୍ଗା । ତେବେ ଏହି ୪ଟି ପଞ୍ଚାୟତର ୩୦ ହଜାର ଲୋକଙ୍କୁ ଉପଯୁକ୍ତ ସ୍ୱାସ୍ଥ୍ୟ ସେବା ଯୋଗାଇବା ପାଇଁ ସରକାର ଯୋଗାଇଥିଲେ ଗୋଟିଏ ବୋଟ୍ ଆମ୍ବୁଲାନ୍ସ । ଏହି ଆମ୍ବୁଲାନ୍ସ ମଧ୍ୟ ସିନ୍ଦିଗୁଡା ଘାଟରୁ ଚାଲିବା ପାଇଁ ସ୍ଥିର ହୋଇଥିଲା । ହେଲେ ଆସିବା ଦିନଠୁ ପଡି ରହିଛି ଏହି ଆମ୍ବୁଲାନ୍ସ । ଫଳରେ ଲୋକେ ଉପାୟଶୁନ୍ୟ ହୋଇ ପୁଣି ରୋଗୀଙ୍କୁ ମେଡିକାଲ ନେବାପାଇଁ ଦେଶୀ ଡଙ୍ଗାର ସାହାରା ଲୋଡୁଛନ୍ତି । ଏଥିପ୍ରତି ସରକାର ନଜର ଦେବାକୁ ଦାବି କରିଛନ୍ତି ବିଛିନ୍ନାଞ୍ଚଳବାସିନ୍ଦା ।

ବେଳେ ବେଳେ ଠିକ୍ ସମୟରେ ରୋଗୀ ମେଡିକାଲରେ ପହଞ୍ଚି ନପାରିବାରୁ ମୃତ୍ୟୁ ଘଟୁଛି । ଏମିତିକି ଆମ୍ବୁଲାନ୍ସ ସେବା ନଥିବାରୁ ପ୍ରସୂତିଙ୍କ ଅଧବାଟରେ ପ୍ରସବ ହେଉଛି । ଏନେଇ ବହବୁବାର ପାଣି ଘେରରେ ଥିବା ଲୋକଙ୍କ ପାଇଁ ବୋଟ୍ ଆମ୍ବୁଲାନ୍ସ ଟିଏ ଦାବି ହୋଇଛି । ହେଲେ ଏଥିପ୍ରତି ପ୍ରଶାସନର କୌଣସି ନିଘା ନଥିବା ଅଭିଯୋଗ ହୋଇଛି । ସେପଟେ ବୋଟ ଆମ୍ବୁଲାନ୍ସରେ ଥିବା କିଛି ତୃଟିକୁ ମରାପତି କରାଯାଇ କାର୍ଯ୍ୟରେ ଲଗାଯିବ ବୋଲି କହିଛନ୍ତି ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ।