ଯାତ୍ରା ଟିକେଟ କାଟିବାକୁ ଆସି ପୋଲିସଠୁ ଲାଠି ମାଡ଼ ଖାଇଲେ ଦର୍ଶକ, ଭାଇରାଲ ହେଉଛି ଭିଡିଓ

ଚାନ୍ଦବାଲି: ଯାତ୍ରା ଦେଖିବାକୁ ମନ ଥିଲା । ସେଥିପାଇଁ ଟିକେଟ୍ କାଟିବାକୁ ଆସିଥିଲେ । ହେଲେ ଟିକେଟ କାଟିବେ କ’ଣ ବାଜିଲା ପୋଲିସର ଲାଠି ମାଡ଼ । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ଚାନ୍ଦବାଲି ଅଞ୍ଚଳରେ ଘଟିଛି ଏଭଳି ଘଟଣା ।

ସୂଚନାଯୋଗ୍ୟ, ଚାନ୍ଦବାଲି ସହରରେ ଶ୍ରୀକୃଷ୍ଣ ପୂଜା କମିଟି ତରଫରୁ ସୂର୍ଯ୍ୟ ମନ୍ଦିର ଯାତ୍ରା ପାର୍ଟି ଯାତ୍ରା ପରିବେଷଣ କରୁଛି । ଟିକେଟ କାଟିବାକୁ ରାତିରୁ କାଉଣ୍ଟର ଆଗରେ ଲାଗୁଛି ଲମ୍ବା ଲାଇନ । ଆଜି ସକାଳେ ଟିକେଟ କାଉଣ୍ଟର ଖୋଲିବା ପରେ କାଉଣ୍ଟର ଆଗରେ ଭିଡ଼ ଲାଗିଥିଲା । ଏପରିକି ଟିକେଟ କାଟିବା ପାଇଁ ଦର୍ଶକଙ୍କ ମଧ୍ୟରେ ପ୍ରତିଯୋଗିତା ଆରମ୍ଭ ହୋଇଯାଇଥିଲା । ଦର୍ଶକଙ୍କ ଭିଡକୁ ନିୟନ୍ତ୍ରଣ କରିବାକୁ ସେଠାରେ ଚାନ୍ଦବାଲି ପୋଲିସର ଜଣେ କର୍ମଚାରୀ ପହଞ୍ଚି ଥିଲେ । ହେଲେ ପୋଲିସ ବାବୁ ଜଣଙ୍କ ୟୁନିଫର୍ମରେ ନଆସି ସାଧା ପୋଷାକରେ ଆସିଥିବାରୁ ତାଙ୍କ କଥା କେହି ଶୁଣି ନଥିଲେ । ଯାହାକୁ ନେଇ ପୋଲିସ ବାବୁଙ୍କ ରାଗ ପଞ୍ଚମ ହୋଇଯାଇଥିଲା ଓ ସେ ଦର୍ଶକଙ୍କ ଉପରେ ଲାଠିଚାର୍ଜ କରି ଦେଇଥିଲେ ।

ଜଣେ ଦର୍ଶକଙ୍କ ଗାଲକୁ ଶକ୍ତ ଚାପୁଡ଼ା ମାରିବା ସହ ଅନ୍ୟ ଜଣଙ୍କୁ ପିଟି ଥିଲେ । ଯାହାର ଭିଡିଓ ଏବେ ସୋସିଆଲ ମିଡିଆରେ ଏ ମୋବାଇଲରୁ ସେ ମୋବାଇଲକୁ ଘୁରି ବୁଲୁଛି । ପୋଲିସ ବାବୁଙ୍କ ଏପରି କାମକୁ ସବୁ ମହଲରୁ ନିନ୍ଦା କରାଯାଉଛି । ତେବେ ଏନେଇ ଚନ୍ଦବାଲି ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନି ।