ପୃଥିବୀକୁ କେବେ ବି ଆସିନାହାନ୍ତି କୌଣସି ଏଲିୟନ, ଚର୍ଚ୍ଚାରେ ପଡ଼ିଲା ପୂର୍ଣ୍ଣଚ୍ଛେଦ

ପେଣ୍ଟାଗନ: ଏଲିୟନ ଅଛନ୍ତି କି ନାହିଁ ? ଯଦି ଅଛନ୍ତି ପୃଥିବୀକୁ ଆସିଛନ୍ତି କି ନାହିଁ ? ବିଭିନ୍ନ ସମୟରେ ୟୁଏଫଓ ଦେଖିବା ନେଇ ହେଉଥିବା ଦାବି କେତେ ସତ ? ଏଲିୟନ ପୃଥିବୀକୁ ଆସିବା ନେଇ ଚାଲିଥିବା ଚର୍ଚ୍ଚା ଉପରେ ପୂର୍ଣ୍ଣଚ୍ଛେଦ ପକାଇଛି ପେଣ୍ଟାଗନ । କୌଣସି ଏଲିୟନ ପୃଥିବୀକୁ ଆସି ନଥିବା ସ୍ପଷ୍ଟ କରିଛି ପେଣ୍ଟାଗନ ।

ଦୀର୍ଘଦିନ ଧରି ପୃଥିବୀକୁ ଅଜଣା ଉଡ଼ନ୍ତା ବସ୍ତୁ ବା ୟୁଏଫଓ ଆସିଥିବା ନେଇ ନାନା ଚର୍ଚ୍ଚା ଚାଲିଥିଲା । ବିଭିନ୍ନ ରାଷ୍ଟ୍ର ପକ୍ଷରୁ ଏହାକୁ ନେଇ ଗବେଷଣା ବି ଚାଲିଥିଲା । ତେବେ ଶେଷରେ ପେଣ୍ଟାଗନ ଏହି କଳ୍ପନାଜଳ୍ପନାର ଅନ୍ତ କରିଛି । ପେଣ୍ଟାଗନ ପକ୍ଷରୁ ପ୍ରକାଶିତ ରିପୋର୍ଟରେ କୁହାଯାଇଛି, ୟୁଏଫଓ ନେଇ ଗତ ଦ୍ବିତୀୟ ବିଶ୍ବଯୁଦ୍ଧ ପରଠାରୁ ଆମେରିକା ସରକାରଙ୍କ ପକ୍ଷରୁ ଚାଲିଥିବା ଗବେଷଣା ଏହା ପ୍ରମାଣିତ କରିଛି ଯେ ପୃଥିବୀ ବାହାରର କୌଣସି ବସ୍ତୁ ଆସିବାର ପ୍ରମାଣ ନାହିଁ। ଯେଉଁ ଉଡନ୍ତା ବସ୍ତୁ ଉଡିଥିବା କୁହାଯାଉଛି ତାହା ମାମୁଲି ବସ୍ତୁ ଓ କପୋଳକଳ୍ପିତ ।

ୟୁଏଫଓ ପ୍ରସଙ୍ଗରେ ୨୦୨୨ରେ ପେଣ୍ଟାଗନ ପକ୍ଷରୁ ଯେଉଁ ଘୋଷଣା କରାଯାଇଥିଲା ତାହାକୁ ଆଧାର କରି ଏହି ରିପୋର୍ଟ ପ୍ରକାଶ କରାଯାଇଛି । ଏଲିୟନ ପ୍ରସଙ୍ଗରେ ଗବେଷଣା ଲାଗି ବିଗତ ୧୯୪୫ରୁ ଆମେରିକା ସରକାରଙ୍କ ପକ୍ଷରୁ ଆର୍ଥିକ ସହାୟତା ପ୍ରଦାନ କରାଯାଉଥିଲା । ବିଗତ ୧୯୪୦ ଦଶକରୁ ୟୁଏଫଓ ପ୍ରସଙ୍ଗରେ ଆମେରିକା ମିଲିଟାରୀ ଖଣ୍ଡନ କରିଆସୁଥିଲା ।