ନିରଞ୍ଜନଙ୍କ ପରେ କିଏ ହେବ ପିସିସି ସଭାପତି ? ତାରା ନେଲେ ସୁରଙ୍କ ନାଁ

ଭୁବନେଶ୍ୱର: ବଦଳିବେ ପିସିସି ସଭାପତି । ମୁହଁ ଖୋଲିଲେ ତାରା । ବାରମ୍ବାର କଂଗ୍ରେସ ନେତା ଦିଲ୍ଲୀ ଯିବା ଓ କଂଗ୍ରେସ ନେତୃତ୍ୱ ପରିବର୍ତ୍ତନ ନେଇ ବରିଷ୍ଠ ବିଧାୟକ ତାରା ପ୍ରସାଦ ବାହିନୀପତି ମୁହଁ ଖୋଲିଛନ୍ତି । ରୋକଠୋକ୍ କହିଛନ୍ତି, ବିଧାୟକଙ୍କ ମଧ୍ୟରୁ ଜଣଙ୍କୁ ପିସିସି ସଭାପତି କରାଯାଉ । ବିଧାୟକଙ୍କ ମଧ୍ୟରୁ କେହିବି ପିସିସି ସଭାପତି ହୁଅନ୍ତୁ । ସୁର ଭାଇ ହେଲେ ବି ଆମେ ସ୍ୱାଗତ କରିବୁ ବୋଲି କହିଛନ୍ତି ତାରା ବାହିନୀପତି ।

ଏହା ପଛର କାରଣ ବି ଦର୍ଶାଇଛନ୍ତି ତାରା । କହିଛନ୍ତି, ଜିଲ୍ଲାକୁ ଗଲେ ସର୍କିଟ୍ ହାଉସ୍ ମିଳିବ । ଏଥିପାଇଁ ବିଧାୟକ କହିଲେ କଥା ରହିବ । ଜିଲ୍ଲା ସଭାପତିମାନଙ୍କୁ ଜିଲ୍ଲାପାଳ ବାସୀ ପାଣିରେ ପଚାରୁ ନାହାନ୍ତି । ଜଣେ ବିଧାୟକ ହେଲେ ଏ ସମସ୍ୟା ରହିବ ନାହିଁ । ଏଥିସହ ପୂର୍ବରୁ ଯେଉଁମାନେ ପିସିସି ସଭାପତି ରହି ସାରିଛନ୍ତି ସେମାନଙ୍କୁ ନେତୃତ୍ୱ ଦିଆନଯାଉ ବୋଲି କହିଛନ୍ତି ତାରା । କିନ୍ତୁ ବିଧାୟକଙ୍କୁ ହିଁ ପିସିସି ସଭାପତି କରନ୍ତୁ ବୋଲି ତାରା କହିଛନ୍ତି ।

ତେବେ ଏନେଇ କେହି ତାଙ୍କ ସହ ଆଲୋଚନା କରିନାହାନ୍ତି । ପିସିସି ସଭାପତି ପରିବର୍ତ୍ତନ ନେଇ କଂଗ୍ରେସ ପ୍ରଭାରୀ ତାଙ୍କ ସହ ଆଲୋଚନା କଲେ ସେ ଏନେଇ ପ୍ରସ୍ତାବ ଦେବେ । ବିଧାୟକ ପିସିସି ସଭାପତି ହେଲେ ଲୋକେ ମଧ୍ୟ କଂଗ୍ରେସକୁ ଗ୍ରହଣ କରିବେ ବୋଲି ତାରା ଯୁକ୍ତି ବାଢ଼ିଛନ୍ତି । ପଞ୍ଚାୟତ ଓ ପୌର ନିର୍ବାଚନରେ ପରାଜୟ ପରେ ଏବେ କଂଗ୍ରେସରେ ପିସିସି ସଭାପତି ହଟାଇବା ଦାବି ଜୋର୍ ଧରିଥିବା ବେଳେ ତାରାଙ୍କ ବିଧାୟକ ଫର୍ମୁଲା ଶୀର୍ଷ ନେତୃତ୍ୱ କିଭଳି ଗ୍ରହଣ କରୁଛନ୍ତି ତା ଉପରେ ସମସ୍ତଙ୍କ ନଜର ।