ଦେଶର ତିନି ଶ୍ରେଷ୍ଠ ଥାନା ମଧ୍ୟରେ ପାଟପୁର ଥାନା

ଭୁବନେଶ୍ବର: ଦେଶରେ ଶ୍ରେଷ୍ଠ ଥାନା ଭିତରେ ଓଡ଼ିଶାର ପାଟପୁର ଥାନା । ଶ୍ରେଷ୍ଠ ୩ଟି ଥାନା ମଧ୍ୟରେ ସ୍ଥାନ ପାଇଛି ଗଞ୍ଜାମ ଜିଲ୍ଲାର ପାଟପୁର ଥାନା । ୨୦୨୪ ବର୍ଷ ପାଇଁ ପାଟପୁର ଥାନା ଏହି ସଫଳତା ହାସଲ କରିଛି । କେନ୍ଦ୍ର ଗୃହମନ୍ତ୍ରାଳୟ ପକ୍ଷରୁ ଏଥିପାଇଁ ଡିଜିପି ୱାଇ.ବି. ଖୁରାନିଆଙ୍କୁ ଚିଠି ଲେଖି ଅବଗତ କରାଯାଇଛି । ଏଥିପାଇଁ ଆସନ୍ତା ନଭେମ୍ବର ୨୯ ତାରିଖରେ ପୁରସ୍କାର ଦିଆଯିବ ।

ସୂଚନାଯୋଗ୍ୟ, ଲୋକସେବା ଭବନରେ ନଭେମ୍ଵର ୨୯ରୁ ଡିସେମ୍ଵର ୧ ତାରିଖ ଯାଏଁ ହେବାକୁ ଥିବା ଡିଜିପି ଓ ଆଇଜି ସମ୍ମିଳନୀ ଅବସରରେ ନିଜେ ପୁରସ୍କାର ଦେବେ କେନ୍ଦ୍ର ଗୃହମନ୍ତ୍ରୀ । ତେଣୁ ଥାନା ଅଧିକାରୀ ନିଜେ ଉପସ୍ଥିତ ରହି ପୁରସ୍କାର ଗ୍ରହଣ କରିବାକୁ କୁହାଯାଇଛି ।