ପିଲାଙ୍କ ଆଡମିସନ ଟଙ୍କାକୁ ଆତ୍ମସାତ କଲେ କଲେଜ ଟ୍ରଷ୍ଟି ମୁଖ୍ୟ

କେନ୍ଦ୍ରାପଡା: ପିଲାଙ୍କ ଆଡମିସନ ଟଙ୍କାକୁ ଆତ୍ମସାତ କଲେ କଲେଜ ଟ୍ରଷ୍ଟି ମୁଖ୍ୟ । ଏଭଳି ଅଭିଯୋଗ ଆସିଛି କେନ୍ଦ୍ରାପଡା ଜିଲ୍ଲା ଡେରାବିଶ ଗୁହାଳସିଂ ସ୍ଥିତ ଶ୍ରୀ ବଳଦେବ ଜୀଉ ନର୍ସିଙ୍ଗ କଲେଜର ଟ୍ରଷ୍ଟି ବୋର୍ଡ ମୁଖ୍ୟ କଳାକାର ରାଉତଙ୍କ ବିରୋଧରେ । କଳାକାର ରାଉତ ନିଜକୁ କଲେଜର ଚେୟାରମ୍ୟାନ ପରିଚୟ ଦେଇ କିଛି ଛାତ୍ରଛାତ୍ରୀଙ୍କଠାରୁ ଏକ ଲକ୍ଷ ପନ୍ଦର ହଜାର ଟଙ୍କା ଲେଖାଏଁ ଟଙ୍କା ଆଣିଥିଲେ । ହେଲେ ଟଙ୍କାକୁ କଲେଜକୁ ନଦେଇ ନିଜେ ଆତ୍ମସାତ କରିଥିବା ଅଭିଯୋଗ ହୋଇଛି । ଏନେଇ ଛାତ୍ରଛାତ୍ରୀଙ୍କ ସନ୍ଦେହ ହେବାରୁ ସେମାନେ କଲେଜ ଅଧ୍ୟକ୍ଷାଙ୍କୁ ଜଣାଇଥିଲେ । କଳାକାର ରାଉତ କଲେଜର ରସିଦ ଖାତାରୁ କିଛି ରସିଦ ପୃଷ୍ଠା ଚୋରି କରି ବେଆଇନ ଭାବେ ପିଲାଙ୍କୁ ନକଲି ରସିଦ ଦେଇଥିଲେ । କଲେଜ ରସିଦ ଖାତାରୁ ରସିଦ ଚୋରି ହୋଇଥିବା ନେଇ କଲେଜ ଷ୍ଟାପ ଓ କର୍ମଚାରୀଙ୍କ ପକ୍ଷରୁ ମଧ୍ୟ ଅଧ୍ୟକ୍ଷାଙ୍କୁ ମଧ୍ୟ ଲିଖିତ ଅଭିଯୋଗ କରାଯାଇଥିଲା । ଏନେଇ କଲେଜ ଅଧ୍ୟକ୍ଷା କଳାକାର ରାଉତଙ୍କ ବିରୋଧରେ କେନ୍ଦ୍ରାପଡ଼ା ଟାଉନ ଥାନାରେ ଅଭିଯୋଗ କରିଛନ୍ତି ।

ଡେରାବିଶ ବ୍ଲକ ଶିକ୍ଷା ଅଧିକାରୀ ମଧ୍ୟ ଘଟଣାର ତଦନ୍ତ କରୁଛନ୍ତି । ଏନେଇ ଅଭିଯୁକ୍ତ କଳାକାର ରାଉତଙ୍କ କୌଣସି ପ୍ରତିକ୍ରିୟା ମିଳିପାରିନି ।