ମୋ ଝିଅକୁ ରକ୍ତ ଦେଲେ ନାହିଁ ମାରିଦେଲେ, ଉତ୍ୟକ୍ତ ଲୋକେ ସୁପରିଟେଣ୍ଡଙ୍କୁ ଘୋଷାଡ଼ିି ପିଟିଲେ

ବାରିପଦା: ହସ୍ପିଟାଲ ସୁପରିଟେଣ୍ଡେଟଙ୍କୁ ଠେଲା ପେଲା । ରକ୍ତ ଅଭାବରୁ ମୃତ୍ୟୁ ଅଭିଯୋଗ । ହସ୍ପିଟାଲରେ ଚିକିତ୍ସା ଅବହେଳାର ସାଙ୍ଘାତି ଅଭିଯୋଗ । ପଦାରେ ପଡ଼ିଛି ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଅବ୍ୟବସ୍ଥା । ପିଆରଏମ୍ ହସ୍ପିଟାଲ ସମ୍ମୁଖରେ ପରିବାର ଲୋକଙ୍କ ଧାରଣା । ମୃତକ ହେଲେ ସାମାଖୁଣ୍ଟା ବ୍ଲକ ସପନଚୁଆ ଗ୍ରାମର ୧୭ ବର୍ଷୀୟା ସୁପ୍ରିୟା ପାତ୍ର । ଗତ ଶନିବାର ଠାରୁ ଝିଅ ରକ୍ତହିନତା ରୋଗ ପାଇଁ ମେଡିକାଲ କଲେଜରେ ଭର୍ତ୍ତି ହୋଇଥିଲା ।

ରକ୍ତ ଅଭାବରୁ ଝିଅ ଅଧିକ ଅସୁସ୍ଥ ହୋଇପଡ଼ିଥିଲେ । ସେଥିପାଇଁ ଝିଅଙ୍କ ବାପା ଡାକ୍ତରଙ୍କୁ ରକ୍ତ ଯୋଗାଇ ଦେବାକୁ ଅନୁରୋଧ କରିଥିଲେ। ହେଲେ ଡିୟୁଟିରେ ଥିବା ଡ଼ାକ୍ତର ମାନେ ତାଙ୍କ କଥା ଶୁଣି ନ ଥିଲେ । ତେବେ ଆଜି ସକାଳୁ ଝିଅର ମୃତ୍ୟୁ ହୋଇଥିଲା । ଏହା ପରେ ପରିବାର ଓ ସମ୍ପର୍କୀୟ ମାନେ ଝିଅ ଶବ ଧରି ମେଡ଼ିକାଲ କଲେଜ ମୁଖ୍ୟ ଫାଟକରେ ଧାରଣା ଦେଇଥିଲେ ।

ଅଭିଯୋଗ ଅନୁସାରେ ଡିୟୁଟିରେ ଥିବା କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ । କିନ୍ତୁ ମେଡ଼ିକାଲ କଲେଜ ସୁପରିଟେଣ୍ଡେଟ ଏକଥାରେ ରାଜି ହୋଇ ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ । କିନ୍ତୁ ସମ୍ପର୍କୀୟ ଲୋକ ଉତେଜିତ ହୋଇ ସୁପରିଟେଣ୍ଡଙ୍କ ଚାମ୍ବରରେ ପଶି ଠେଲାପେଲା କରିବା ସହ ସାର୍ଟ ଚିରିଦେଇଥିବା ଦେଖିବାକୁ ମିଳିଥିଲା । ଘଟଣା ସ୍ଥଳରେ ବାରିପଦା ପୋଲିସ ଉପଖଣ୍ଡ ଅଧିକାରୀ, ତହସିଲଦାର ଉପସ୍ଥିତ ରହି ମୃତକଙ୍କ ସମ୍ପର୍କୀୟଙ୍କୁ ବୁଝାସୁଝା କରିଥିଲେ ।

ଅନୁକମ୍ପା ମୂଳକ ଭାବେ ଜିଲ୍ଲା ରେଡକ୍ରସ ପକ୍ଷରୁ ଦଶ ହଜାର ଟଙ୍କା ସହ ୧୫ ଦିନ ମଧ୍ୟରେ ତଦନ୍ତ ପରେ ସରକାରୀ ନିୟମ ଅନୁଯାୟୀ ଦୋଷୀକୁ ଦଣ୍ଡ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି । ତେବେ ଝିଅ ଟି ରକ୍ତହୀନତା ରୋଗରେ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଥିଲା ବୋଲି ହସ୍ପିଟାଲ ସୁପରିଣ୍ଟେଡେଣ୍ଟ କହିଛନ୍ତି । ଏ ସମ୍ପର୍କରେ ବାରିପଦା ଟାଉନ ଥାନା ରେ ଉଭୟ ପକ୍ଷରୁ ଅଭିଯୋଗ କରାଯାଇଛି । ଏହା ପରେ ଧାରଣାରେ ବସିଥିବା ପରିବାର ଲୋକ ଆନ୍ଦୋଳନରୁ ପ୍ରତ୍ୟାହୃତ କରିଥିଲେ ।