ପ୍ରେମ ବିବାହ କରିବାରୁ ବଞ୍ଚି ଥାଉ ଥାଉ ଝିଅର ଶୁଦ୍ଧିକ୍ରିୟା କଲେ ପରିବାର

ପଟ୍ଟାମୁଣ୍ଡାଇ: ଝିଅର ପ୍ରେମ ବିବାହକୁ ବିରୋଧ । ଝିଅ ଜୀବିତ ଥାଉ ଥାଉ ଶୁଦ୍ଧିକ୍ରିୟା କଲେ ପରିବାର ଲୋକ । କେନ୍ଦ୍ରାପଡ଼ା ଜିଲ୍ଲା ଆଳି ନୂଆବଜାର ଅଞ୍ଚଳରେ ଏଭଳି ଘଟଣା ଦେଖିବାକୁ ମିଳିଛି । ବାପାମାଆ ଝିଅର ପିଣ୍ଡଦାନ କରିଛନ୍ତି । ଆଳି ନୂଆବଜାର ଅଞ୍ଚଳର ଜଣେ ଯୁବକଙ୍କ ସହ ସେହି ଅଞ୍ଚଳର ଜଣେ ଯୁବତୀଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା । କିନ୍ତୁ ଯୁବତୀଙ୍କ ପରିବାର ଲୋକ ଏହାକୁ ବିରୋଧ କରିଆସୁଥିଲେ । ତେବେ ସବୁ ବାଧା ବନ୍ଧନକୁ ତୁଟାଇ ଗତ ସୋମବାର ପ୍ରେମିକା -ପ୍ରେମିକ ଆଳିର ଲକ୍ଷ୍ମୀବରାହ ମନ୍ଦିରରେ ବିବାହ କରିଥିଲେ । ଏହି ବିବାହକୁ ଝିଅପକ୍ଷ ଲୋକ ବିରୋଧ କରିବା ସହ ଝିଅର ଶୁଦ୍ଧିକ୍ରିୟା କରିଛନ୍ତି । ଏପରିକି ନିଜ ଘର ସାମ୍ନାରେ ଝିଅର ଫୋଟୋରେ ଫୁଲମାଳ ପକାଇ ଶ୍ରଦ୍ଧାଞ୍ଜଳି ଦେଇଥିଲେ । ଏହି ଘଟଣା ଏବେ କେନ୍ଦ୍ରାପଡ଼ା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।