ବିମାନରେ ନମାଜ ପଢାକୁ ବାରଣ କରିବାକୁ ଝରକା ଭାଙ୍ଗିବାକୁ ଉଦ୍ୟମ, ଭିଡିଓ ଭାଇରାଲ
1 min read
ଇସ୍ଲାମାବାଦ: ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସ (ପିଆଇଏ)ର ପେଶାୱାର-ଦୁବାଇ ବିମାନରେ ଯାତ୍ରୀଙ୍କ ତୁମୁଳକାଣ୍ଡ । ଭାଙ୍ଗିଦେଲେ ବିମାନର ଝରକା । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି । ବିମାନରେ ନମାଜ ପଢିବାକୁ ବାରଣ କରାଯିବାରୁ ଯାତ୍ରୀ ଜଣଙ୍କ ଏଭଳି କାଣ୍ଡ ଘଟାଇଛନ୍ତି । ଘଟଣା ପରେ ତାଙ୍କୁ ବିମାନ ଭିତରେ ବାନ୍ଧି ଦେଇଥିଲେ କ୍ରୁ ମେମ୍ବର ।
ପିଆଇଏର ପିକେ ୨୮୩ ନମ୍ବର ବିମାନ ଉଡାଣ ଭରିବା ପରେ ହଠାତ ଜଣେ ଯାତ୍ରୀ ବିମାନର ସିଟ୍କୁ ମୁଥା ମାରିବା ଆରମ୍ଭ କରିଦେଇଥିଲେ । ଏହାପରେ ଯାତ୍ରୀ ଜଣକ ତଳେ ବସି ପଡି ମୁଣ୍ଡରେ କପଡା ବାନ୍ଧି ନମାଜ ପଢିବା ଆରମ୍ଭ କରିଦେଇଥିଲେ । ବିମାନର କ୍ରୁ ମେମ୍ବର ତାଙ୍କୁ ଅଟକାଇବାରୁ ଯାତ୍ରୀ ଜଣକ ଆହୁରି ଉତ୍କ୍ଷିପ୍ତ ହୋଇ ଉଠିଥିଲେ ।
ସିଟ୍ ଗୁଡିକୁ ଗୋଇଠା ମାରିବା ସହ ସାର୍ଟ ଖୋଲି ବିମାନର ଝରକା ଭାଙ୍ଗିବାକୁ ଚେଷ୍ଟା କରିଥିଲେ । ପୁଣି କେତେବେଳେ ତଳେ ଶୋଇପଡି ଜିନିଷପତ୍ର ଗୁଡିକୁ ବାହାର କରିବାରେ ଲାଗି ପଡିଥିଲେ । ଯାହା ଦେଖିବା ପରେ ଆତଙ୍କିତ ହୋଇପଡିଥିଲେ ସହଯାତ୍ରୀ ।
ଦୀର୍ଘ ସମୟ ଧରି ଯାତ୍ରୀଙ୍କ ହଙ୍ଗାମାରେ ଅତିଷ୍ଠ ହୋଇ ତାଙ୍କୁ ବିମାନ ସିଟ୍ରେ ବାନ୍ଧି ପକାଇଥିଲେ କ୍ରୁ ମେମ୍ବର । ଏହାସହ ପ୍ରୋଟୋକଲ ଅନୁସାରେ ପାଇଲଟ ଦୁବାଇ ଏୟାର ଟ୍ରାଫିକ କଣ୍ଟ୍ରୋଲରଙ୍କ ସହ ଯୋଗାଯୋଗ କରିଥିଲେ । ଦୁବାଇ ବିମାନ ବନ୍ଦରରେ ଅବତରଣ କରିବା ପରେ ସୁରକ୍ଷାକର୍ମୀ ଯାତ୍ରୀ ଜଣଙ୍କୁ ଗିରଫ କରିଛନ୍ତି । ସେହିପରି ଯାତ୍ରୀ ଜଣଙ୍କୁ ବ୍ଲାକଲିଷ୍ଟ୍ କରିଛି ପାକିସ୍ତାନ ଏୟାରଲାଇନ୍ସ ।
