ସୁଧୁରୁନି ଚୀନ୍‌, ସୀମା ସ୍ଥିତି ପରଖିବାକୁ ଯିବ ସଂସଦୀୟ କମିଟି

ନୂଆଦିଲ୍ଲୀ: ସୁଧୁରୁନି ଚୀନ୍ ।‌ ବାରମ୍ବାର ଆଲୋଚନା ପରେ ମଧ୍ୟ ଚୀନ ନିଜର ପ୍ରକୃତି ଛାଡୁନାହିଁ । ଭାରତ ପକ୍ଷରୁ ବାରମ୍ବାର ଶାନ୍ତି ବାର୍ତ୍ତା ଦିଆଯାଉଥିଲେ ମଧ୍ୟ ଚୀନ୍‌ର କଥା ଗୋଟେ କାମ ଆଉ ଗୋଟେ । ଉପରେ ଶାନ୍ତି ଚାହୁଁଛି ବୋଲି ଚୀନ୍‌ ଯେତେ ଡେଙ୍ଗୁରା ପିଟୁଥିଲେ ମଧ୍ୟ ବାସ୍ତବରେ ତାର ଆଚରଣ ସେୟା ନୁହେଁ । ଏହାସତ୍ତ୍ୱେ ଶାନ୍ତି ପାଇଁ ଦୁଇଦେଶ ମଧ୍ୟରେ ଲଗାତାର ଆଲୋଚନା ଜାରି ରହିଛି । ଚୀନର ପ୍ରତି ପଦକ୍ଷେପ ଉପରେ ନଜର ରଖିଛି ଭାରତୀୟ ସେନା । ଏଥର ଯଦି ଚୀନ କିଛି ପଦକ୍ଷେପ ନିଏ ତେବେ ଏହାର କଡ଼ା ଜବାବ ଦିଆଯିବ ବୋଲି ଭାରତ ପକ୍ଷରୁ ଚେତାବନୀ ମଧ୍ୟ ଦିଆଯାଇଛି ।

ସୀମାରେ ହିମ‌ ପ୍ରବାହ ଆରମ୍ଭ ହୋଇଯାଇଛି । ତେବେ ଏହାରି ଭିତରେ ସୀମା ସ୍ଥିତି କିପରି ରହିଛି ଯାଞ୍ଚ କରିବାକୁ ସଂସଦୀୟ କମିଟି ଏଲଏସି ଯିବ ବୋଲି କୁହାଯାଇଛି । PAC ଲେହ ଯାଇ ଭାରତୀୟ ସେନାର ସ୍ଥିତି ଓ ସେମାନଙ୍କ ପ୍ରସ୍ତୁତି ନେଇ ଆଲୋଚନା କରିବ । ଲୋକସଭାରେ କଂଗ୍ରେସ ନେତା ଅଧିର ରଞ୍ଜନ ଚୌଧରୀଙ୍କ ନେତୃତ୍ୱରେ ଏହି ଟିମ୍‌ ୨୮ କିମ୍ବା ୨୯ ଅକ୍ଟୋବରରେ ଲେହ ଯାତ୍ରା କରିବେ । ଏଥିପାଇଁ ଲୋକସଭା ବାଚସ୍ପତି ଓମ ବିର୍ଲା ଅନୁମତି ଦେଇସାରିଛନ୍ତି ।

ଏହି ଗସ୍ତ ସମୟରେ ସମସ୍ତ ସାଂସଦ ସେନାର ଉତ୍ତର କମାଣ୍ଡ ଅଧିକାରୀଙ୍କୁ ସାକ୍ଷାତ କରିବା ସହ ସୁରକ୍ଷାକାର୍ଯ୍ୟରେ ନିୟୋଜିତ କମାଣ୍ଡରଙ୍କ ସହ ବି ଆଲୋଚନା କରିବେ । ଫରଓ୍ୱାର୍ଡ ପୋଷ୍ଟକୁ ଯାଇ ସେନାଙ୍କୁ ବି ଭେଟିବ PAC । ଦୁଇ ଦିନିଆ ଗସ୍ତରେ ଥିବା ଏହି ଟିମ ଲେହସ୍ଥିତ DRDO ଅଫିସରେ ପହଞ୍ଚିବାର କାର୍ଯକ୍ରମ ମଧ୍ୟ ରହିଛି ।

ସେହିଭଳି ଗୋଟିଏପଟେ ଶାନ୍ତିର କଥା କରୁଥିବ ଚୀନ କିନ୍ତୁ ଅନ୍ୟପଟେ ସୀମାରେ ସେନା ଠୁଳ କରିବାରେ ଲାଗିଛି । ଚୀନର ଏହି ଦୋମୁହାଁ ଆଚରଣ ଯୋଗୁଁ ଲଦାଖରେ ସୃଷ୍ଟି ହୋଇଛି ଯୁଦ୍ଧ ପରିସ୍ଥିତି । ଦକ୍ଷିଣ ପ୍ୟାଙ୍ଗଙ୍ଗ ସି ର ୭୦ କିଲୋମିଟର ଅଞ୍ଚଳ ସମେତ ସୀମାରେଖାରେ ଭାରତର ସ୍ଥିତି ସୁଦୃଢ ହେବା ପରେ ଚୀନ ଏବେ ଚିନ୍ତାରେ ।