ଆସନ୍ତାକାଲିଠାରୁ ସଂସଦର ମୌସୁମୀ ଅଧିବେଶନ, ସୁରୁଖୁରୁରେ ଗୃହ ଚଳାଇବା ନେଇ ସର୍ବଦଳୀୟ ବୈଠକ

ନୂଆଦିଲ୍ଲୀ: ଆସନ୍ତାକାଲିଠାରୁ ସଂସଦର ମୌସୁମୀ ଅଧିବେଶନ । ସୁରୁଖୁରୁରେ ଗୃହ ଚଳାଇବା ନେଇ ଆଜି ସର୍ବଦଳୀୟ ବୈଠକରେ ହୋଇଛି ଆଲୋଚନା । ଚଳିତ ଅଧିବେଶନରେ ୨୪ଟି ବିଲ୍ ଆଣିବେ କେନ୍ଦ୍ର ସରକାର । କିଛିଦିନ ତଳେ କେନ୍ଦ୍ର ସରକାର ଆରମ୍ଭ କରିଥିବା ଅଗ୍ନିପଥ ଯୋଜନାକୁ ନେଇ ହୁଲସ୍ତୁଲ ହେବ ଗୃହ । ସେହିପରି ଦରଦାମ୍ ବୃଦ୍ଧି, ବେକାରୀ ସମସ୍ୟା ନେଇ ସରକାରଙ୍କୁ ଘେରିବାକୁ ପ୍ରସ୍ତୁତ ହୋଇଛନ୍ତି ବିରୋଧୀ । ଅଗଷ୍ଟ ୧୨ ତାରିଖ ପର୍ଯ୍ୟନ୍ତ ଏହି ଅଧିବେଶନ ଚାଲିବ ।

ଚଳିତ ଅଧିବେଶନରେ କାଣ୍ଟନମେଣ୍ଟ ବିଲ୍, ମଲ୍ଟିଷ୍ଟେଟ କୋ-ଅପରେଟିଭ ସୋମାଇଟିଜ ବିଲ୍, କଫି ପ୍ରୋତ୍ସାହନ ଓ ବିକାଶ ବିଲ୍ ପରି କେତେକ ବିଲ୍ ଆସିବ । ଏହା ସହ ପୂର୍ବରୁ ଉଭୟ ଗୃହରେ ପଡ଼ି ରହିଥିବା ୮ଟି ବିଲ୍ ନେଇ ଆଲୋଚନା ହେବା ସମ୍ଭାବନା ଅଛି । ଗୃହକାର୍ଯ୍ୟ ସୁରୁଖୁରୁରେ ଚଳାଇବା ଲାଗି ସମସ୍ତ ଦଳଙ୍କୁ ଅନୁରୋଧ କରିଛନ୍ତି ବାଚସ୍ପତି ଓମ ବିର୍ଲା । ସଂସଦ ଆରମ୍ଭ ହେବା ସହ ଆସନ୍ତାକାଲି ରାଷ୍ଟ୍ରପତି ନିର୍ବାଚନ ହେବ । ଉଭୟ ଗୃହର ସଦସ୍ୟମାନେ ଭୋଟ ଦେବେ ।