ବାଲେଶ୍ୱର: ଏସିଏଫ୍ ସୌମ୍ୟରଞ୍ଜନ ମହାପାତ୍ର ମୃତ୍ୟୁ ମାମଲାରେ ବିଦ୍ୟାଭାରତୀଙ୍କୁ ନୋଟିସ୍ କରିବ ପାରଳା ପୋଲିସ। ଗଜପତି ଯାଇ ତଦନ୍ତରେ ସହଯୋଗ କରିବା ପାଇଁ ତାଙ୍କୁ ନୋଟିସ୍ କରାଯିବ। ସେପଟେ ପୁଣି ପତ୍ନୀ ବିଦ୍ୟାଭାରତୀଙ୍କୁ ଜେରା କରୁଛି ପାରଳାଖେମୁଣ୍ଡି ପୋଲିସ। ମୟୂରଭଞ୍ଜ ଜିଲ୍ଲା କପ୍ତିପଦାରେ ପାରଳା ପୋଲିସର ୪ ଜଣିଆ ଟିମ୍ ବିଦ୍ୟାଙ୍କୁ ଜେରା କରୁଛି। କେମିତି ସୌମ୍ୟଙ୍କ ଦେହରେ ନିଆଁ ଲାଗିଲା? ଗୋଟେ ଘରେ ଥାଇ ମଧ୍ୟ କେମିତି ଜାଣିପାରିଲେନି ବିଦ୍ୟା ? ସୌମ୍ୟଙ୍କ ସହ ତାଙ୍କ ସମ୍ପର୍କ କେମିତି ଥିଲା ? ଚାକିରି ଓ ପାରିବାରିକ କାରଣରୁ ଚାପରେ ଥିଲେ କି ସୌମ୍ୟ ? ଭଳି ପ୍ରଶ୍ନ ବିଦ୍ୟାଙ୍କୁ ପୋଲିସ ପଚାରିଥିବା ଶୁଣିବାକୁ ମିଳୁଛି । ଏହା ଭିତରେ ଉଭୟ ବିଦ୍ୟା ଓ ସୌମ୍ୟଙ୍କ ଅନେକ ହାତଲେଖା ସାମନାକୁ ଆସିଛି।
ଏଥିରୁ ଉଭୟଙ୍କ ସଂପର୍କ ଠିକ୍ ନଥିବା ଅନୁମାନ କରାଯାଉଛି। ତେବେ ସୌମ୍ୟ ମୃତ୍ୟୁ ସହ ଏହାର କିଛି ସଂପର୍କ ରହିଛି କି, ସେନେଇ ଖୋଳତାଡ଼ କରିପାରେ ପାରଳା ପୋଲିସ। ଏହା ପୂର୍ବରୁ ବିଭିନ୍ନ ସ୍ଥାନରେ ମାମଲା ସହ ଜଡିତ ଲୋକଙ୍କୁ ଜେରା କରିବା ସହିତ ସିଡିଆର ଯାଞ୍ଚ କରିଛି ପୋଲିସ। ଡ୍ରାଇଭରଙ୍କୁ ମଧ୍ୟ ଟିମ୍ ପଚରା ଉଚରା କରିବ। ଡ୍ରାଇଭର ଘଟଣା ଦିନ ଓ ପୂର୍ବରୁ ବିଦ୍ୟାଭାରତୀଙ୍କ ପରିବାରକୁ ଭଡା ଗାଡିରେ ନେବା ଆଣିବା କରିଥିଲେ। ସେପଟେ ସୌମ୍ୟଙ୍କ ମୃତ୍ୟୁର ୩ ସପ୍ତାହ ପରେ ପୋଲିସ ପ୍ରାୟ ୨୫ରୁ ଅଧିକ ଲୋକଙ୍କ ବୟାନ ରେକର୍ଡ କରିଛି। ୬ ଜଣଙ୍କୁ ଜେରା କରାଯାଇଛି ତଥାପି ରହସ୍ୟର ଗୁମର ଖୋଲିନି।
