ଭୋଟ୍ ଦେବା ପୂର୍ବରୁ ଜାଣନ୍ତୁ, ଟେଣ୍ଡର ଭୋଟ୍ ଓ ଚ୍ୟାଲେଞ୍ଜ ଭୋଟ୍ ସମ୍ପର୍କରେ…
ଭୁବନେଶ୍ୱର: ପ୍ରଥମ ପର୍ଯ୍ୟାୟ ପଞ୍ଚାୟତ ନିର୍ବାଚନ ପାଇଁ ଆସନ୍ତାକାଲି ସନ୍ଧ୍ୟାରେ ପ୍ରଚାର ଶେଷ ହେବ । ବୁଧବାର ହେବ ଭୋଟ୍ ଗ୍ରହଣ । ଏଥିପାଇଁ ସବୁ ପ୍ରକାର ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ପଞ୍ଚାୟତ ନିର୍ବାଚନରେ ନକଲି ଭୋଟରଙ୍କ ପାଇଁ ରାଜ୍ୟ ନିର୍ବାଚନ କମିଶନଙ୍କ ସତର୍କବାଣୀ । ନକଲି ଭୋଟର ସାଜି ଭୋଟ୍ ଦେଲେ ପୋଲିସର ଜିମା ଦିଆଯିବ । ରାଜ୍ୟ ନିର୍ବାଚନ ଆୟୋଗଙ୍କ ସଚିବ ରବୀନ୍ଦ୍ର କୁମାର ସାହୁ ଏହି ସୂଚନା ଦେଇଛନ୍ତି । ଏହାସହ ପଞ୍ଚାୟତ ନିର୍ବାଚନରେ ଟେଣ୍ଡର ଭୋଟ୍ ଓ ଚ୍ୟାଲେଞ୍ଜ ଭୋଟକୁ ନେଇ ସୋସିଆଲ୍ ମିଡିଆରେ ହେଉଥିବା ଗୁଜବ ଉପରେ ସେ ସ୍ପଷ୍ଟୀକରଣ ଦେଇଛନ୍ତି ।
ଚ୍ୟାଲେଞ୍ଜ ଭୋଟ୍ କ’ଣ ?
ଯଦି ପ୍ରାର୍ଥୀଙ୍କ ଏଜେଣ୍ଟ କୌଣସି ଭୋଟରଙ୍କ ପରିଚୟ ଉପରେ ଆପତ୍ତି କରନ୍ତି । ତେବେ ଏଜେଣ୍ଟ ୨ ଟଙ୍କା ଦେଇ ତାଙ୍କର ପରିଚୟକୁ ଚ୍ୟାଲେଞ୍ଜ କରି ପାରିବେ । ପ୍ରିଜାଇଡିଂ ଅଫିସରମାନେ ସ୍ପଟ୍ ଉପରେ ଯାଞ୍ଚ କରିବେ । ଯଦି ଅଭିଯୋଗ ସତ୍ୟ ପ୍ରମାଣିତ ହୁଏ, ତେବେ ସେହି ଲୋକଙ୍କୁ ପୋଲିସର ଜିମା ଦିଆଯିବ । ଅଭିଯୋଗ ମିଛ ହୋଇଥିଲେ ସେ ଭୋଟ୍ ଦେଇପାରିବେ ।
ଟେଣ୍ଡର ଭୋଟ୍ କ’ଣ ?
ସେହିପରି ଯଦି ଜଣଙ୍କ ସ୍ଥାନରେ ଅନ୍ୟ ଜଣେ ଭୋଟ୍ ଦେଇଥିବେ, ସେ କ୍ଷେତ୍ରରେ ସେହି ଭୋଟରଙ୍କୁ ଟେଣ୍ଡର ଭୋଟ୍ ପାଇଁ ଅନୁମତି ଦିଆଯିବ । ସେହି ବାଲଟ୍ ପେପରକୁ ଅଲଗା ରଖାଯିବ । ଭୋଟରଙ୍କ ପରିଚୟପତ୍ର ଓ ଅଲଗା ଦସ୍ତାବିଜକୁ ନେଇ ପ୍ରିଜାଇଡିଂ ଅଫିସର ସନ୍ତୁଷ୍ଟ ହେଲେ ସେ ଭୋଟ୍ ଦେଇ ପାରିବେ । ଗଣତି ସମୟରେ ତାଙ୍କ ଭୋଟକୁ କାଉଣ୍ଟ କରାଯିବ ।
ରାଜ୍ୟରେ ପ୍ରଥମ ପର୍ଯ୍ୟାୟ ଭୋଟ୍ ୧୬ ତାରିଖରେ ପଡ଼ିବ । ପରେ ୧୮, ୨୦, ୨୨ ଓ ୨୪ ତାରିଖରେ ଭୋଟ୍ ଗ୍ରହଣ ହେବ ।
