କେରଳରେ ବ୍ୟାପିଲା ପ୍ରାଇମେରୀ ଆମୋଇବିକ ମେନିଙ୍ଗୋଏନସେଫାଲିଟିସ ବା ପିଏଏମ। ଏନେଇ ସ୍ବାସ୍ଥ୍ୟ ବିଭାଗ ପକ୍ଷରୁ ଜାରି କରାଯାଇଛି ଆଲର୍ଟ। ମସ୍ତିଷ୍କ ସହ ଜଡିତ ଏହି ରୋଗରେ ମୃତ୍ୟୁ ସମ୍ଭାବନା ଅଧିକ ଥିବାରୁ ସ୍ବାସ୍ଥ୍ୟ ବିଭାଗ ତତ୍ପର ହୋଇଛି। ନାଏଗ୍ଲେରିଆ ଫୋଲେରି ନାମକ ଏକ ଆମୋଇବା ଏହି ସଂକ୍ରମଣର ପ୍ରମୁଖ କାରଣ ହୋଇଛି। ଏହି ଆମୋଇବା ସାଧାରଣତଃ ମସ୍ତିଷ୍କକୁ ନଷ୍ଟ କରୁଥିବାରୁ ମୃତ୍ୟୁ ସମ୍ଭାବନା ଅଧିକ ରହିଛି। ବର୍ତ୍ତମାନ ସୁଦ୍ଧା ଏହି ଆମୋଇବା ଯୋଗୁ ୧୯ଜଣଙ୍କ ମୃତ୍ୟୁ ଘଟିଥିବାବେଳେ ୬୧ ଜଣ ସଂକ୍ରମିତ ହୋଇଥିବା ସୂଚନା ମିଳିଛି। ବିଶେଷ କରି କୋଝିକୋଡ ଓ ମାଲାପୁରମ ଜିଲ୍ଲାରେ ଏହି ରୋଗ ବିସ୍ତାରିତ ହେବାରେ ଲାଗିଛି। ଏହି ଆମୋଇବା ସୁସ୍ଥ ଶିଶୁ ଓ କିଶୋରମାନଙ୍କୁ ଆକ୍ରମଣ କରିଥାଏ। ବଡ଼କଥା ହେଉଛି ଏହି ରୋଗକୁ ଚିହ୍ନଟ କରିବା କଷ୍ଟସାଧ୍ୟ ହୋଇଥିବାରୁ ମୃତ୍ୟୁ ସଂଖ୍ୟା ଅଧିକ ହୋଇଥାଏ। ଏହାକୁ ରୋକିବା ଲାଗି ଜାତୀୟ ରୋଗ ନିୟନ୍ତ୍ରଣ କେନ୍ଦ୍ର ସହ କେରଳ ସ୍ବାସ୍ଥ୍ୟ ବିଭାଗ ସମନ୍ବୟ ରକ୍ଷା କରି ପଦକ୍ଷେପ ନେଉଥିବା ସୂଚନା ମିଳିଛି।
