ଆତଙ୍କବାଦୀଙ୍କ କବଜାରେ ପାକିସ୍ତାନର ଆତଙ୍କବାଦୀ ମୁକାବିଲା କେନ୍ଦ୍ର, ୧୦ ଜଣଙ୍କୁ ପଣବନ୍ଦୀ

ଇସଲାମବାଦ : ପାକିସ୍ତାନର ଏକ ଆତଙ୍କବାଦୀ ମୁକାବିଲା କେନ୍ଦ୍ରକୁ କବଜା କଲେ ଆତଙ୍କବାଦୀ । ଉତ୍ତର-ପଶ୍ଚିମ ପାକିସ୍ତାନରେ ଥିବା ଏହି କେନ୍ଦ୍ରରେ ମୁତୟନ କର୍ମଚାରୀଙ୍କୁ ଆତଙ୍କବାଦୀମାନେ କବଜା କରିବା ସହ ସେମାନଙ୍କୁ ପଣବନ୍ଦୀ ରଖିଛନ୍ତି । ସେମାନଙ୍କ ସମସ୍ତ ଅସ୍ତ୍ରଶସ୍ତ୍ରକୁ ନିଜ କବଜାକୁ ନେଇଛନ୍ତି ଆତଙ୍କବାଦୀ ।

ସରକାର ଓ ଆତଙ୍କବାଦୀଙ୍କ ମଧ୍ୟରେ ଆଲୋଚନା ଚାଲିଥିଲେ ବି ସେପରି କିଛି ଅଗ୍ରଗତି ହୋଇନାହିଁ । ଖାଇବର ପାଖତୁନଖ୍ବା ପ୍ରଜାତନ୍ତ୍ରର ବାନ୍ନୁରେ ଥିବା ଏହି କେନ୍ଦ୍ରରେ ଆତଙ୍କବାଦୀମାନେ ଅଟକ ଥିବାବେଳେ ସେମାନେ ଅକସ୍ମାତ ଏକତ୍ରିତ ହୋଇ କର୍ମଚାରୀଙ୍କୁ ଆକ୍ରମଣ କରି ସେମାନଙ୍କ ଅସ୍ତ୍ରଶସ୍ତ୍ର ଛଡାଇ ନେଇଥିଲେ ।

ଆତଙ୍କବାଦୀଙ୍କ ଆକ୍ରମଣରେ ଜଣେ କର୍ମଚାରୀଙ୍କ ମୃତ୍ୟୁ ଘଟିଥିବା ସୂଚନା ମିଳିଛି ।ପ୍ରାୟ ୩୦ ତାଲିବାନ କର୍ମୀ ୧୦ ଜଣଙ୍କୁ ପଣବନ୍ଦୀ ରଖିଥିବା କୁହାଯାଇଛି । ଏହି ଘଟଣା ଲାଗି ନିଜକୁ ଦାୟୀ କରିଛି ତେହରିକ-ଇ-ତାଲିବାନ ପାକିସ୍ତାନ । ଆତଙ୍କବାଦୀଙ୍କୁ ଆଫଗାନିସ୍ତାନକୁ ଏୟାରଲିଫ୍ଟ କରିବା ଲାଗି ଦାବି କରାଯାଇଛି ।