ଜବରଦସ୍ତ ଧର୍ମାନ୍ତରଣ,ଅପହରଣ,ଜମି କବଜା..ପାକିସ୍ତାନ ହିନ୍ଦୁଙ୍କ ପାଇଁ ଶତ୍ରୁ ତବଲିଗି
ନୂଆଦିଲ୍ଲୀ: ପାକିସ୍ତାନର ଦ୍ୱିତୀୟ ବୃହତ୍ତମ ପ୍ରଦେଶ ସିନ୍ଧରେ ହିନ୍ଦୁ ଉତ୍ପିଡନର ଏକ ଭିଡିଓ ପୁରା ଦୁନିଆ ଆଗରେ ପାକିସ୍ତାନର ମୁଖା ଖୋଲି ଦେଇଛି । ପାକିସ୍ତାନୀ ତବଲିଗି ଜମାତ୍ ସେଠାରେ କେମିତି ହିନ୍ଦୁଙ୍କ ଉପରେ ଅତ୍ୟାଚାର କରୁଛି ତାହା କହୁଛି ଏହି ଭିଡିଓ । ସିନ୍ଧ ପ୍ରଦେଶର ମଟିଆରି ଜିଲ୍ଲାର ଏହି ଭିଡିଓରେ ଜଣେ ହିନ୍ଦୁ ମହିଳା ଚିତ୍କାର କରି କହୁଛନ୍ତି ଯେ, ଆମେ ମରିବାକୁ ପସନ୍ଦ କରିବୁ କିନ୍ତୁ ଇସ୍ଲାମ ଗ୍ରହଣ କରିବୁ ନାହିଁ ।
ଇସଲାମ ଗ୍ରହଣ କଲେନି ବୋଲି ଜମାତି କଲେ ଅପହରଣ
ପାକିସ୍ତାନୀ ହିନ୍ଦୁ ମହିଳାଙ୍କ ଏହି ଭିଡିଓ ଲୋକଙ୍କୁ ବିଚଳିତ କରୁଛି । ଏହି ଭିଡିଓ କେବଳ ସଂଖ୍ୟାଲଘୁଙ୍କ ଉପରେ ଅତ୍ୟାଚାର କଥା କହୁନି ଅଧିକନ୍ତୁ ଏହା ଜମାତର ବର୍ବରତା କଥା କହୁଛି । ସିନ୍ଧର ହିନ୍ଦୁଙ୍କ କହିବା ହେଉଛି ତବଲିଗି ଜମାତ ସେମାନଙ୍କ ଉପରେ ଅତ୍ୟାଚାର କରିବା ସହ ସେମାନଙ୍କ ଘରକୁ ମଧ୍ୟ ଧ୍ୱଂସ କରିଦେଇଛି । କେବଳ ଏତିକି ନୁହେଁ ଜଣେ ହିନ୍ଦୁ ନାବାଳକ ଇସଲାମ୍ ଗ୍ରହଣ କରିବାକୁ ମନା କରିଦେବାକୁ ତା’ର ଅପହରଣ ମଧ୍ୟ ହୋଇଛି ।
ଭାଇରାଲ ହେଉଥିବା ଭିଡିଓରେ ଭିଲ ସମ୍ପ୍ରଦାୟର ହିନ୍ଦୁ ବଳପୂର୍ବକ ଧର୍ମାନ୍ତରଣକୁ ବିରୋଧ କରୁଥିବା ଦେଖାଯାଇଛି । ତବଲିଗି ଜମାତ୍ ବିରୋଧରେ ପ୍ରଦର୍ଶନ କରୁଥିବା ମହିଳା ଓ ଶିଶୁ ହାତ ଲେଖା ପୋଷ୍ଟର ଧରିଥିବା ଦେଖିବାକୁ ମିଳିଛି । ପ୍ରଦର୍ଶନ କାଳରେ ଜଣେ ହିନ୍ଦୁ ମହିଳା ମାଟିରେ ଶୋଇପଡିଥିଲେ ଓ ଚିତ୍କାର କରି କହିଥିଲେ ଯେ, ‘‘ ଆମେ ମରିବାକୁ ପସନ୍ଦ କରିବୁ କିନ୍ତୁ କେବେ ମଧ୍ୟ ଇସଲାମ୍ ଗ୍ରହଣ କରିବୁ ନାହି’’ ହିନ୍ଦୁ ମହିଳା ଜଣକ କହିଛନ୍ତି କି ତାଙ୍କ ସମ୍ପତ୍ତି ଉପରେ ଜବରଦସ୍ତ କବଜା କରାଯାଇ,ତାଙ୍କୁ ମାଡ ମରାଯାଇଛି । ଘରକୁ ଫେରିବାକୁ ଚାହୁଁଥିଲେ ତାଙ୍କୁ ଇସଲାମ ଧର୍ମ ଗ୍ରହଣ କରିବାକୁ ପଡିବ ବୋଲି ଜମାତ୍ ଧମକ ଦେଇଛି ।
ତବଲିଗି ଜମାତକୁ ଦୟା କରିବାକୁ ନିବେଦନ
ମହିଳାଙ୍କ କହିବା ହେଉଛି ତାଙ୍କ ପୁଅକୁ ତବଲିଗି ଅପହରଣ କରି ନେଇଛି । ପୁଅ ଉପରେ ଇସଲାମ ଗ୍ରହଣ କରିବାକୁ ଚାପ ପକାଯାଉଛି । ଏହି ଭିଡିଓ ସାମ୍ନାକୁ ଆସିବା ପରେ ପାକିସ୍ତାନର ଜଣେ ହିନ୍ଦୁ ସାଂସଦ ପୁରା ମାମଲାର ତଦନ୍ତ କରିବାକୁ ଦାବି କରିଛନ୍ତି ।
ଅନେକ ଦିନ ଧରି ଜମାତ୍ ଟାର୍ଗେଟରେ ହିନ୍ଦୁ
ପାକିସ୍ତାନୀ ହିନ୍ଦୁ ଆୟୋଗର ଅଭିଯୋଗ ହେଉଛି ଅନେକ ଦିନ ଧରି ହିନ୍ଦୁଙ୍କ ଧର୍ମାନ୍ତରଣ ପାଇଁ ଜମାତ୍ ଉଦ୍ୟମ କରୁଛି । କେବଳ ଜମାତ୍ ନୁହେଁ ପାକିସ୍ତାନୀ ସ୍କୁଲ ଗୁଡିକରେ ମଧ୍ୟ ହିନ୍ଦୁଙ୍କ ସହ ପାତର ଅନ୍ତର କରାଯାଉଛି । ସ୍କୁଲରେ ହିନ୍ଦୁ ପିଲାଙ୍କୁ ଇସଲାମ ପଢିବା ପାଇଁ ବାଧ୍ୟ କରାଯାଉଛି । ଏପରିକି ହିନ୍ଦୁଙ୍କ ପାଇଁ ଶ୍ମସାନର ପର୍ଯ୍ୟାପ୍ତ ବ୍ୟବସ୍ଥା ମଧ୍ୟ ନାହିଁ । ପାକ୍ ସୁପ୍ରିମ କୋର୍ଟ ୨୦୧୪ରେ ଧାର୍ମିକ ସହିଷ୍ଣୁତା,ପାଠ୍ୟକ୍ରମରେ ସୁଧାର,ମିଡିଆରେ ଅଭଦ୍ର ଭାଷା ପ୍ରୟୋଗ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଆଦେଶ ଦେଇଥିଲେ । କିନ୍ତୁ ଏପର୍ଯ୍ୟନ୍ତ ତାହା ଲାଗୁ ହୋଇନାହିଁ ।
