ପାକିସ୍ତାନ କାମଚଳା ପ୍ରଧାନମନ୍ତ୍ରୀଙ୍କ ଘୋଷଣା, ହେବନି ନୂଆବର୍ଷ ସେଲିବ୍ରେସନ

ଇସଲାମାବାଦ: ପାକିସ୍ତାନରେ ଚଳିତ ବର୍ଷ ପାଳନ ହେବ ନାହିଁ ନବବର୍ଷ । ସାରା ବିଶ୍ବ ନବବର୍ଷ ପାଳନ ଲାଗି ଉତ୍ସବମୁଖର ହୋଇଥିବାବେଳେ ପାକିସ୍ତାନରେ ଏହି ଉତ୍ସବ ପାଳନ ହେବ ନାହିଁ । ଏନେଇ ଘୋଷଣା କରିଛନ୍ତି ପାକିସ୍ତାନର କାମଚଳା ପ୍ରଧାନମନ୍ତ୍ରୀ ଅନଓ୍ବରୁଲ ହକ କାକର । ପାଲେଷ୍ଟାଇନବାସୀଙ୍କୁ ସମର୍ଥନ ଜଣାଇ ନବବର୍ଷ ପାଳନ କରାଯିବ ନାହିଁ ବୋଲି ସେ ଘୋଷଣା କରିଛନ୍ତି ।

ଏକ ବାର୍ତ୍ତାରେ ସେ କହିଛନ୍ତି- ପାଲେଷ୍ଟିନୀୟଙ୍କ ବିରୋଧରେ ଚାଲିଥିବା ଗଣହତ୍ୟାକୁ ତାଙ୍କ ଦେଶ ଓ ମୁସଲିମ ଭ୍ରାତୃତ୍ବବୋଧ ବିରୋଧ କରୁଛି । ବିଶେଷ କରି ଗାଜା ଓ ଓ୍ବେଷ୍ଟବ୍ୟାଙ୍କରେ ଚାଲିଥିବା ଶିଶୁ ସଂହାରକୁ ତାଙ୍କ ଦେଶ ବିରୋଧ କରୁଛି । ଗତ ଅକ୍ଟୋବର ୭ ପରଠାରୁ ୨୧ ହଜାର ପାଲେଷ୍ଟିନୀୟଙ୍କୁ ହତ୍ୟା କରାଗଲାଣି । ସେମାନଙ୍କ ମଧ୍ୟରେ ଅଛନ୍ତି ୯ ହଜାରରୁ ଅଧିକ ଶିଶୁ । ପାଲେଷ୍ଟିନୀୟଙ୍କୁ ସହାୟତା ଲାଗି ତାଙ୍କ ଦେଶ ରିଲିଫ ସାମଗ୍ରୀ ପଠାଇଥିବା କହିଛନ୍ତି କାକ୍କର ।