ଭାରତର ରାଫେଲକୁ ଟକ୍କର ଦେବାକୁ ପାକିସ୍ତାନକୁ ଚୀନ ଦେବ J-10C ଜେଟ୍

ଇସଲାମାବାଦ: ଭାରତକୁ ଚେକ୍ ଦେବାକୁ ଚୀନ-ପାକିସ୍ତାନର ପୁଣି ମେଣ୍ଟ । ରାଫେଲକୁ ଚେକ ଦେବାକୁ ଚୀନଠାରୁ ପାକିସ୍ତାନ କିଣିବ ୨୫ଟି ଶକ୍ତିଶାଳୀ ଲଢୁଆ ଜେଟ୍ J-10C । ଏନେଇ ସୂଚନା ଦେଇଛନ୍ତି ପାକିସ୍ତାନ ଆଭ୍ୟନ୍ତରୀଣ ମନ୍ତ୍ରୀ ଶେଖ୍ ରସିଦ । ୩ ମାସ ମଧ୍ୟରେ ଏହି ଜେଟ୍ ପାକିସ୍ତାନ ହାସଲ କରିବ ଏବଂ ମାର୍ଚ୍ଚ 23ରେ ଆୟୋଜିତ ହେବାକୁ ଥିବା ଫ୍ଲାଏ ପାଷ୍ଟ କାର୍ଯ୍ୟକ୍ରମରେ ଏହା ଅଂଶଗ୍ରହଣ କରିବ ବୋଲି ସେ କହିଛନ୍ତି ।

ଭାରତର ରାଫେଲକୁ ଏହି ଜେଟ ଟକ୍କର ଦେବା ଲାଗି ଉଦ୍ଦିଷ୍ଟ ବୋଲି ସେ କହିଛନ୍ତି । ବର୍ତ୍ତମାନ ଚୀନ ବାୟୁ ସେନା J-7E ଲଢୁଆ ଜେଟକୁ ବ୍ୟବହାର କରିବା ବଦଳରେ J-10C ଲଢୁଆ ଜେଟ ବ୍ୟବହାର କରୁଛି । ସୀମାନ୍ତର ବିଭିନ୍ନ ସ୍ଥାନରେ ଏହାକୁ ମୁତୟନ କରିଛି ଡ୍ରାଗନ । ତାଇଓ୍ବାନ ଓ ପୂର୍ବ ଚୀନ ସାଗରରେ ଚୀନ ଏହି ଶକ୍ତିଶାଳୀ ଜେଟ ମୁତୟନ କରିଥିବାବେଳେ ପାକିସ୍ତାନକୁ ଏହାକୁ ବିକ୍ରି କରିବା ଉଠାଇଛି ପ୍ରଶ୍ନ ।

ଯଦିଓ J-10C ତୁଳନାରେ ରାଫେଲ ଅଧିକ ଆଧୁନିକ ଏବଂ ଏହାର ସୁପିରିୟର ସେନସର, ଇଲେକ୍ଟ୍ରୋନିକ ଓ୍ବାରଫେର ସିଷ୍ଟମ ଉନ୍ନତ ତଥାପି ପାକିସ୍ତାନକୁ ଚୀନର ଏହି ଜେଟ ବିକ୍ରି ଘଟଣାକୁ ନେଇ ଭାରତ ଚିନ୍ତା ବଢ଼ିଛି ।