ପାକିସ୍ତାନୀ NSAଙ୍କ ବୟାନ୍, ତାଲିବାନକୁ ସମର୍ଥନ ଦିଅ ନଚେତ ହୋଇପାରେ ୯/୧୧ ଭଳି ଆକ୍ରମଣ
1 min read
ଇସଲାମାବାଦ: ପାକିସ୍ତାନ ବର୍ତ୍ତମାନ ବିଶ୍ୱ ସମ୍ମୁଖରେ ଖୋଲାଖୋଲି ଭାବେ ତାଲିବାନକୁ ସମର୍ଥନ କରୁଛି। ସୋମବାର ପାକିସ୍ତାନୀ ଜାତୀୟ ସୁରକ୍ଷା ପରାମର୍ଶଦାତା ମୋଇଦ ୟୁସୁଫଙ୍କ ବିବୃତ୍ତିରେ ଏହାର ପ୍ରମାଣ ଦେଖିବାକୁ ମିଳିଛି। ଅବଶ୍ୟ ବର୍ତ୍ତମାନ ନିଜର ଏହି ବିବୃତ୍ତିକୁ ବଦଳାଇ ଦେଇଛନ୍ତି। ଜାତୀୟ ଗଣମାଧ୍ୟମକୁ ଦେଇଥିବା ଏକ ସାକ୍ଷାତକାରରେ ମୋଇଦ ୟୁସୁଫ କହିଛନ୍ତି ଯେ ଯଦି ଆଫଗାନିସ୍ତାନର ନୂତନ ନେତୃତ୍ୱକୁ ସ୍ୱୀକୃତି ନ ଦିଆଯାଏ ତେବେ ପାଶ୍ଚାତ୍ୟ ଦେଶମାନେ ପୁଣି ଥରେ ୯/୧୧ ଭଳି ଆକ୍ରମଣର ଶିକାର ହୋଇପାରନ୍ତି। ଏଭଳି କହି ୟୁସୁଫ ପାଶ୍ଚାତ୍ୟ ଦେଶଗୁଡ଼ିକୁ ଖୋଲାଖୋଲି ଆକ୍ରମଣରଚେତାବନୀ ଦେଇଛନ୍ତି।
ସେ କହିଛନ୍ତି, ‘ଯଦି ୯୦ ଦଶକର ଭୁଲ ପୁନରାବୃତ୍ତି ହୁଏ ଏବଂ ଆଫଗାନିସ୍ତାନ ଏକୁଟିଆ କରିଦିଆଯାଏ, ତେବେ ଏହାର ପରିଣାମ ମଧ୍ୟ ସେହିଭଳି ହୋଇପାରେ। ଯଦି ସୁରକ୍ଷା ବ୍ୟବସ୍ଥାରେ ଟିକେ ବି ତ୍ରଟି ହୁଏ, ତେବେ ଏହାର ପରିଣାମ ପାକିସ୍ତାନ ହେଉ କି ପାଶ୍ଚାତ୍ୟ ଦେଶ ସମସ୍ତଙ୍କ ପାଇଁ ବିପଦଜନକ ହେବ।’
ତେବେ ଏହି ବିବାଦିୟ ବୟାନକୁ ନେଇ ସମାଲୋଚୋନା ହେବା ପରେ ୟୁସୁଫ ବର୍ତ୍ତମାନ ଖବରକାଗଜକୁ ସାକ୍ଷାତକାର ପ୍ରତ୍ୟାହାର କରିବାକୁ କହିଛନ୍ତି। ବାର୍ତ୍ତାଳାପକୁ ବିକୃତ କରାଯାଇଛି ବୋଲି ସେ କହିଛନ୍ତି।
ପ୍ରଧାନମନ୍ତ୍ରୀ ଇମ୍ରାନ ଖାନ ବି ତାଲିବାନକୁ କରିଛନ୍ତି ପ୍ରଶଂସା:
ଜଣାଇଦେବାକୁ ଚାହୁଁ ଯେ ଆଫଗାନିସ୍ତାନରେ ତାଲିବାନ କ୍ଷମତାକୁ ଆସିବା ପରେ ପାକିସ୍ତାନ ବିଶ୍ୱର ସେହିସବୁ ଦେଶ ମଧ୍ୟରେ ଅଛି ଯେଉଁମାନେ ଖୁସି ବ୍ୟକ୍ତ କରିଛନ୍ତି। ପ୍ରଧାନମନ୍ତ୍ରୀ ଇମ୍ରାନ ଖାନ ନିଜେ ତାଲିବାନକୁ ଅଭିନନ୍ଦନ ଜଣାଇଛନ୍ତି। ଏପରିକି ତାଲିବାନର କ୍ଷମତାକୁ ‘ଦାସତ୍ୱର ଶିକୁଳି ଭାଙ୍ଗିବା’ ଭଳି ପଦକ୍ଷେପ ବୋଲି ସେ କହିଥିଲେ। ତାଙ୍କ ପରେ ପାକିସ୍ତାନ ଅଧିକୃତ କାଶ୍ମୀରରେ ଜୈଶ-ଏ-ମହମ୍ମଦ ଏବଂ ଲଶ୍କର-ଏ-ତୋଇବା ଭଳି ଆତଙ୍କବାଦୀ ସଂଗଠନ ମଧ୍ୟ ତାଲିବାନକୁ ସମର୍ଥନ କରି ରାଲି କରିଥିଲେ। ଏହି ସମାବେଶର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା। ପାକିସ୍ତାନ ବ୍ୟତୀତ ରୁଷ, ଚୀନ୍ ଏବଂ ତୁର୍କୀ ଭଳି ଦେଶ ମଧ୍ୟ ଆରମ୍ଭରୁ ତାଲିବାନ ସହିତ ଭଲ ସମ୍ପର୍କରେ ଥିବା ଦେଖିବାକୁ ମିଳୁଛି।
