ନନ୍ଦିଘୋଷ ବ୍ୟୁରୋ: ଆଫଗାନିସ୍ତାନର ବିଭିନ୍ନ ସ୍ଥାନ ଉପରେ ପାକିସ୍ତାନର ହମଲା। କାବୁଲସ୍ଥିତ ତେହରିକ-ଇ-ତାଲିବାନ ପାକିସ୍ତାନର ବିଭିନ୍ନ ଶିବିର ଉପରେ ପାକିସ୍ତାନୀ ଜେଟ କରିଛନ୍ତି ଏୟାରଷ୍ଟ୍ରାଇକ। ଏହାକୁ ନେଇ ଆଫଗାନିସ୍ତାନ ଓ ପାକିସ୍ତାନ ମଧ୍ଯରେ ସମ୍ପର୍କ ତିକ୍ତ ହୋଇଛି। ତାଲିବାନ ବୈଦେଶିକ ମନ୍ତ୍ରୀ ଆମିର ଖାଁ ମୁତାକିଙ୍କ ଭାରତ ଗସ୍ତ ବେଳେ ପାକିସ୍ତାନର ରେଡ ଅଲଗା କିଛି ସୂଚୀତ କରୁଛି। ଭାରତ ଓ ଆଫଗାନିସ୍ତାନ ମଧ୍ଯରେ ସମ୍ପର୍କକୁ ଟାର୍ଗେଟ କରି ପାକିସ୍ତାନ ଏହି ହମଲା କରିଥିବା ଚର୍ଚ୍ଚା ହେଉଛି। ପାକିସ୍ତାନ ତାଲିବାନ ବା ତେହରିକ-ଇ-ତାଲିବାନ ପାକିସ୍ତାନକୁ ଆଫଗାନିସ୍ତାନ ସରକାର ପାଣ୍ଠି ପ୍ରଦାନ କରୁଥିବାରୁ ଏହା ବିରୋଧରେ ସ୍ବର ଉତ୍ତୋଳନ କରିଆସୁଥିଲା ପାକିସ୍ତାନ।
ଟିଟିପି ମୁଖ୍ୟ ନୁର ୱାଲି ମେହସୁଦଙ୍କୁ ଟାର୍ଗେଟ କରି କାବୁଲର ସାହିଦ ଅବଦୁଲ ହକ୍ ସ୍କୋୟାର ନିକଟରେ ଏହି ହମଲା କରାଯାଇଥିଲା। ୨୦୧୮ରେ ମେହସୁଦ ସଂଗଠନର ନେତୃତ୍ବ ନେଇଆସୁଥିଲେ। ଗତ କିଛି ବର୍ଷ ମଧ୍ୟରେ ପାକିସ୍ତାନର ବିଭିନ୍ନ ସାମରିକ ବ୍ୟକ୍ତିତ୍ବଙ୍କୁ ଟାର୍ଗେଟ କରିଆସୁଛି ଟିଟିପି। ସେପଟେ ପାକିସ୍ତାନରେ ତେହରିକ-ଏ-ଲବୈ-ପାକିସ୍ତାନ ପକ୍ଷରୁ ଆନ୍ଦୋଳନ ଡାକରା ଯୋଗୁ ଦେଶରେ ଇଣ୍ଟରନେଟ ସେବା ରଦ୍ଦ କରାଯାଇଛି।
