ନନ୍ଦିଘୋଷ ବ୍ୟୁରୋ: ଆଜିଠୁ ଦୁଇଦିନ ଧରି ପାକିସ୍ତାନରେ ସାଂଘାଇ ସହଯୋଗ ସଂଗଠନ (ଏସସିଓ) ଶିଖର ସମ୍ମିଳନୀ ଅନୁଷ୍ଠିତ ହେବାକୁ ଯାଉଛି। ଏଥିପାଇଁ ବୈଦେଶିକ ମନ୍ତ୍ରୀ ଏସ ଜୟଶଙ୍କର ଭାରତୀୟ ପକ୍ଷରୁ ପହଞ୍ଚିଛନ୍ତି। ଏହି ଅବସରରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ଭାରତ ସହ ସମ୍ପର୍କ ସମ୍ପର୍କରେ ନିଜର ମତ ଦେଇଛନ୍ତି। ସେ କହିଛନ୍ତି ଯେ ଯଦି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏସସିଓ ଶିଖର ସମ୍ମିଳନୀରେ ଯୋଗଦେବାକୁ ପାକିସ୍ତାନ ଆସିଥାନ୍ତେ ତେବେ ଭଲ ହୋଇଥାନ୍ତା ।
ଏକ ସାକ୍ଷାତକାରରେ ନୱାଜ ସରିଫ କହିଛନ୍ତି ଯେ ମୁଁ ଆରମ୍ଭରୁ ଭାରତ ସହ ଭଲ ସମ୍ପର୍କକୁ ସମର୍ଥନ କରିଆସୁଛି । ମୁଁ ଆଶା କରୁଛି ଯେ ଆମ ମଧ୍ୟରେ ସମ୍ପର୍କ ପୁଣି ସୁଦୃଢ ହେବ ଏବଂ ମୁଁ ଆଗାମୀ ସମୟରେ ପ୍ରଧାନମନ୍ତ୍ରୀଙ୍କ ମୋଦୀଙ୍କ ସହ ବସି କଥାବାର୍ତ୍ତା କରିବାର ସୁଯୋଗ ପାଇବି।
ସାକ୍ଷାତକାର ସମୟରେ ନୱାଜ ସରିଫ ପାକିସ୍ତାନର ଆର୍ଥିକ ପରିସ୍ଥିତି ବିଷୟରେ କହି ନିଜର ଦୁଃଖ ବୟାନ କରିଛନ୍ତି । ସେ କହିଛନ୍ତି ଯେ ଭାରତ ଚନ୍ଦ୍ରକୁ ଯାଉଥିବା ବେଳେ ତାଙ୍କ ଦେଶ ସମଗ୍ର ବିଶ୍ୱରୁ ଟଙ୍କା ମାଗୁଛି। ତାଙ୍କର ୬୦୦ ବିଲିୟନ ଡଲାରର ଭଣ୍ଡାର ଅଛି । ସେ ଜି -20 ଶିଖର ସମ୍ମିଳନୀ ଆୟୋଜନ କରୁଥିବାବେଳେ ଆମେ ଚୀନ୍ ସମେତ ଆରବ ଦେଶମାନଙ୍କ ଆଗରେ ପ୍ରତ୍ୟେକଙ୍କୁ ୧ ବିଲିୟନ ଡଲାର ଭିକ୍ଷା ମାଗୁଛୁ। ଏଭଳି ପରିସ୍ଥିତିରେ ଆମ ପାଇଁ କେଉଁ ସମ୍ମାନ ବାକି ଅଛି ?
ତେବେ ଏହା ପ୍ରଥମ ଘଟଣା ନୁହେଁ ଯେ ନୱାଜ ସରିଫ ଭାରତ ସହ ସମ୍ପର୍କ ବିଷୟରେ କଥାବାର୍ତ୍ତା କରିଛନ୍ତି। ଅତୀତରେ ମଧ୍ୟ ସମ୍ପର୍କକୁ ସୁଦୃଢ କରିବା ଉପରେ ସେ ଗୁରୁତ୍ୱାରୋପ କରିଛନ୍ତି । ସାକ୍ଷାତକାରରେ ନୱାଜ ସରିଫ ଭାରତକୁ ଦେଇଥିବା ପ୍ରତିଶ୍ରୁତି ଭାଙ୍ଗିବା ତାଙ୍କ ଭୁଲ ବୋଲି ସ୍ବୀକାର କରିଛନ୍ତି । ସେ କହିଛନ୍ତି ଯେ କାର୍ଗିଲ ଯୁଦ୍ଧରେ ଯାହା ଘଟିଲା ତାହା ଆମର ଭୁଲ । ଆମେ ଲାହୋର ଚୁକ୍ତିନାମା ଗ୍ରହଣ କରିନାହୁଁ । ଏଥିପାଇଁ ଆମେ ଦୋଷୀ । ଆମେ ଏହା କରିବା ଉଚିତ୍ ନୁହେଁ ।
