ନନ୍ଦିଘୋଷ ବ୍ୟୁରୋ : ଏସିଆ କପ୍ 2025 ସମୟରେ ପଡିଆ ମଝିରେ ଗନ୍ ସେଲିବ୍ରେସନ୍ ପାଇଁ ବିବାଦରେ ଥିଲେ ପାକିସ୍ତାନୀ ବ୍ୟାଟ୍ସମ୍ୟାନ୍ ସାହିବଜାଦା ଫରହାନ୍ । ଏସିଆ କପ୍ 2025ର ସୁପର ଫୋର୍ ମ୍ୟାଚ୍ ସମୟରେ, ଫରହାନ୍ ଅର୍ଦ୍ଧଶତକ ହାସଲ କରିବା ପରେ ପଡ଼ିଆରେ ଗନ୍ ସେଲିବ୍ରେସନ୍ କରିଥିଲେ। ଏହା ପରେ, ଭାରତ ICC ନିକଟରେ ଏକ ଆନୁଷ୍ଠାନିକ ଅଭିଯୋଗ ଦାଖଲ କରିଥିଲା, ଯାହା ପରେ ଏକ ଚେତାବନୀ ଜାରି କରିଥିଲା। ହେଲେ , ଏବେ ପୁଣି ତାଙ୍କ ବିବାଦୀୟ ସେଲିବ୍ରେସନ ଏବଂ ବ୍ୟାଟକୁ ନେଇ ଚର୍ଚ୍ଚା ଜୋର ଧରିଛି ।
ପାକିସ୍ତାନୀ ବ୍ୟାଟସମ୍ୟାନଙ୍କ ‘ଗନମୋଡ୍’ ଷ୍ଟିକର ବ୍ୟାଟ୍
ପ୍ରକୃତରେ, ଯେଉଁ କମ୍ପାନୀର ଲୋଗୋ ସାହିବଜାଦା ଫରହାନଙ୍କ ବ୍ୟାଟରେ ଅଛି, ସେହି କମ୍ପାନୀ ଖେଳାଳିଙ୍କ ପାଇଁ ଏକ ଷ୍ଟିକର ଜାରି କରିଛି। ବ୍ୟାଟ୍ ନିର୍ମାତା “ଗନମୋଡ୍” ନାମକ ଏକ ନୂତନ ବ୍ୟାଟ୍ ଷ୍ଟିକର ଲଞ୍ଚ କରିଛି, ଯାହା ଫରହାନଙ୍କ ଗନ୍ ସେଲିବ୍ରେସନକୁ ଇଙ୍ଗିତ କରୁଛି, ଯାହା ଭାରତ ବନାମ ପାକିସ୍ତାନ ସୁପର 4 ମ୍ୟାଚ୍ ସମୟରେ ବିବାଦ ସୃଷ୍ଟି କରିଥିଲା। ବ୍ୟାଟ୍ ନିର୍ମାତା ସିଏସ୍ ଇଣ୍ଟରନ୍ୟାସନାଲ୍ ମଧ୍ୟ ସାହିବଜାଦା ଫରହାନଙ୍କ ଷ୍ଟିକର ଲଞ୍ଚ କରିବାର ଏକ ଭିଡିଓ ସେୟାର କରିଛନ୍ତି।
ଏହି ଭିଡିଓରେ ସାହିବଜାଦା ଫରହାନ ଆଗାମୀ ମ୍ୟାଚ୍ଗୁଡ଼ିକରେ ତାଙ୍କ ବ୍ୟାଟରେ ଏହି ଷ୍ଟିକର ବ୍ୟବହାର କରିବାକୁ ଇଚ୍ଛା ପ୍ରକାଶ କରିଛନ୍ତି। ତଥାପି, ସୋସିଆଲ ମିଡିଆରେ ବଢ଼ୁଥିବା ହଙ୍ଗାମା ପରେ, ବ୍ୟାଟ୍ ନିର୍ମାଣକାରୀ କମ୍ପାନୀ ଖୁବ୍ ଶୀଘ୍ର ତାଙ୍କ ଆକାଉଣ୍ଟରୁ ଭିଡିଓଟିକୁ ହଟାଇ ଦେଇଛନ୍ତି । ଏହି ସମୟରେ, ପ୍ରଶଂସକମାନେ ସୋସିଆଲ ମିଡିଆରେ ସାହିବଜାଦା ଫରହାନଙ୍କୁ ମଧ୍ୟ ପ୍ରବଳ ଟ୍ରୋଲ୍ କରିଛନ୍ତି।
ICCକୁ ଦେଇଥିଲେ ସ୍ପଷ୍ଟୀକରଣ
ସାହିବଜାଦା ଫରହାନ ଏକ ସୁପର ଫୋର୍ ମ୍ୟାଚରେ ଭାରତ ବିପକ୍ଷରେ ୪୫ ବଲ୍ ରେ ୫୮ ରନ୍ କରିଥିଲେ। ତାଙ୍କର ଅର୍ଦ୍ଧଶତକ ପୂରଣ କରିବା ପରେ, ସେ ଗନ୍ ସେଲିବ୍ରେସନ୍ କରିଥିଲେ। ତଥାପି, ପହଲଗାମ୍ ଆକ୍ରମଣ ଏବଂ ଭାରତର ଅପରେସନ୍ ସିନ୍ଦୁର ପରିପ୍ରେକ୍ଷୀରେ ଏହି ସେଲିବ୍ରେସନକୁ ସମ୍ବେଦନଶୀଳ ବୋଲି ବିବେଚନା କରାଯାଇଥିଲା। ଏହା ପରେ, ଫରହାନ ICC ସମ୍ମୁଖରେ ସ୍ପଷ୍ଟ କରିଥିଲେ ଯେ ଏହା ଏକ ବ୍ୟକ୍ତିଗତ ସେଲିବ୍ରେସନ ଥିଲା, ସୁସଲିମ୍ ସଂସ୍କୃତିର ଏକ ଅଂଶ। ସେ କହିଥିଲେ ଯେ ବିବାହ ଭଳି ଖୁସି ଅବସରରେ ଏପରି ସେଲିବ୍ରେସନ ସାଧାରଣ ଏବଂ ଏଥିରେ କୌଣସି ରାଜନୈତିକ ଉଦ୍ଦେଶ୍ୟ ନଥିଲା। ଏହା ପରେ, ICC ତାଙ୍କୁ କେବଳ ଏକ ଚେତାବନୀ ଦେଇ ମୁକ୍ତ କରିଥିଲେ।
