ଆମେରିକୀୟ ମାଟିରୁ ଭାରତକୁ ମୁନୀରଙ୍କ ପରମାଣୁ ଧମକ, ଏମିତି କହିଲେ ..

ନନ୍ଦିଘାେଷ ବ୍ୟୁରୋ: ପୁଣି ଆରମ୍ଭ ହେଲା ପାକିସ୍ତାନର ଫମ୍ପା ଧମକାଣୀ । ଆମେରିକୀୟ ମାଟିରୁ ଭାରତକୁ ପୁଣି ପରମାଣୁ ଧମକ ଦେଲେ ଅସୀମ ମୁନୀର । ଆମେରିକା ମାଟିରୁ ମୁନିର କହିଛନ୍ତି ଯେ ଯଦି ଭାରତ ସହ ଭବିଷ୍ୟତରେ ଯୁଦ୍ଧ ହୁଏ ଏବଂ ଏଥିରେ ପାକିସ୍ତାନର ଅସ୍ତିତ୍ୱ ଉପରେ ବିପଦ ଘେରି ରହେ ତ ପୂରା କ୍ଷେତ୍ରକୁ ପରମାଣୁ ଯୁଦ୍ଧରେ ଉଡାଇଦେବୁ। ଆମେରିକାର ଟାମ୍ପା ସହରରେ ବିଜନେସମ୍ୟାନ ଅଦନାନ ଅସଦଙ୍କ ଦ୍ୱାରା ଆୟୋଜିତ ଡିନରରେ ଯୋଗ ଦେଇ ମୁନିର କହିଛନ୍ତି ଆମେ ଏକ ପରମାଣୁ ସମ୍ପନ୍ନ ରାଷ୍ଟ୍ର ଯଦି ଆମକୁ ଲାଗୁଛି ଯେ ଆମେ ବି ବୁଡ଼ିବାକୁ ଯାଉଛୁ, ତ ଅଧା ଦୁନିଆକୁ ସାଥିରେ ନେଇ ବୁଡ଼ିବୁ । ଏହି ବୟାନ ଟାମ୍ପାରେ ଆୟୋଜିତ ଏକ ଔପଚାରିକ ଡିନରରେ ଦେଇଛନ୍ତି ମୁନିର । ଯେଉଁଠି କିଛି ପାକିସ୍ତାନୀ ଓ କିଛି ଆମେରିକୀୟ ଅଧିକାରୀ ଉପସ୍ଥିତ ଥିଲେ ।

ପାକିସ୍ତାନ ସେନା ମୁଖ୍ୟ ବା ଫିଲ୍ଡ ମାର୍ଶାଲ ଅସୀମ ମୁନିର ତାଙ୍କର ଆମେରିକା ଗସ୍ତ ସମୟରେ ପୁଣି ଥରେ ଏକ ସ୍ପଷ୍ଟ ଧମକ ଦେଇଛନ୍ତି । ତାଙ୍କର ପରମାଣୁ ଧମକ ପରେ ମୁନିର ସିନ୍ଧୁ ଜଳ ଚୁକ୍ତିନାମା ପ୍ରସଙ୍ଗ ମଧ୍ୟ ଉଠାଇ କହିଥିଲେ ଯେ ଭାରତ ଚୁକ୍ତିନାମାକୁ ସ୍ଥଗିତ ରଖିବାର ନିଷ୍ପତ୍ତି ଯୋଗୁଁ ୨୫୦ ନିୟୁତ ଲୋକ ବିପଦର ସମ୍ମୁଖୀନ ହେଉଛନ୍ତି । ସେ ଚେତାବନୀ ଦେଇଥିଲେ ଯେ ସେମାନେ ଅପେକ୍ଷା କରିଛନ୍ତି ଭାରତ କେତେବେଳେ ଏକ ନଦୀବନ୍ଧ ନିର୍ମାଣ କରିବ ଏବଂ ସେମାନେ ୧୦ଟି କ୍ଷେପଣାସ୍ତ୍ର ସାହାଯ୍ୟରେ ଏହାକୁ ଧ୍ୱଂସ କରିବେ।

ସେ କହିଛନ୍ତି ଯେ ସିନ୍ଧୁ ନଦୀ ଭାରତୀୟମାନଙ୍କର ସମ୍ପତ୍ତି ନୁହେଁ। ଆମର କ୍ଷେପଣାସ୍ତ୍ରର ଅଭାବ ନାହିଁ, ଅଲ୍-ହାମଦୁଲିଲ୍ଲାହ ..ବ୍ଲାକ୍-ଟାଇ ରାତ୍ରୀଭୋଜନକୁ ନିମନ୍ତ୍ରିତ ବ୍ୟକ୍ତିମାନଙ୍କୁ ମୋବାଇଲ୍ ଫୋନ୍ କିମ୍ବା ଅନ୍ୟ କୌଣସି ଡିଜିଟାଲ୍ ଡିଭାଇସ୍ ବହନ କରିବାକୁ ଅନୁମତି ଦିଆଯାଇ ନଥିଲା ଏବଂ ଭାଷଣର କୌଣସି ପାଠ୍ୟ ଉପଲବ୍ଧ କରାଯାଇ ନଥିଲା ବୋଲି ଖବର ସଂସ୍ଥା ରିପୋର୍ଟ କରିଛି। ମୁନିର ତାଙ୍କ ଭାଷଣରେ ଅନେକ ଥର ଭାରତ ସହିତ ବିବାଦର ଉଲ୍ଲେଖ କରିଥିବା ଜଣାପଡ଼ିଛି।

ଏହାସହିତ ମୁନୀର ଭାରତକୁ କଟାକ୍ଷ କରି କହିଛନ୍ତି “ଆମେ ଭାରତର ପୂର୍ବ ଦିଗରୁ ଆରମ୍ଭ କରିବୁ, ଯେଉଁଠାରେ ସେମାନେ ସେମାନଙ୍କର ସବୁଠାରୁ ମୂଲ୍ୟବାନ ସମ୍ପଦ ସ୍ଥାପନ କରିଛନ୍ତି, ଏବଂ ତା’ପରେ ପଶ୍ଚିମ ଦିଗକୁ ଯିବୁ” ସେ ଆହୁରି ମଧ୍ୟ କହିଛନ୍ତି ପାକିସ୍ତାନ ପ୍ରତିଦ୍ୱନ୍ଦ୍ୱୀ ଶକ୍ତିକୁ କିପରି ସନ୍ତୁଳିତ କରାଯିବ ସେ ବିଷୟରେ ମାଷ୍ଟରକ୍ଲାସ୍ ଦେବା ଆରମ୍ଭ କରିବା ଉଚିତ। ଆମର ସଫଳତାର ପ୍ରକୃତ କାରଣ ହେଉଛି ଆମେ କୃପଣ ନୁହଁ। ଆମେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ନୋବେଲ ପୁରସ୍କାର ପାଇଁ ମନୋନୀତ କରିଛୁ।

ଭାରତ ସହ ଚାରି ଦିନ ଯାଏ ଚାଲିଥିବା ସଂଘର୍ଷ ପରେ ମୁନିରଙ୍କର ଏହା ଦ୍ୱିତୀୟ ଅମେରିକୀୟ ଗସ୍ତ। ପ୍ରଥମ ଥର ସେ ଆମେରକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସାକ୍ଷାତ କରିଥିଲେ। ଚଳିତ ଥର ପାକିସ୍ତାନର ସେନା ମୁଖ୍ୟ ଆମେରିକାର ଶୀର୍ଷ ରାଜନୈତିକ ଓ ସାମରିକ ନେତାଙ୍କୁ ସାକ୍ଷାତ୍ କରିଛନ୍ତି। ପାକିସ୍ତାନର ସେନା ପ୍ରମୁଖ ବରିଷ୍ଠ ରାଜନୈତିକ ଓ ସେନା ନେତୃତ୍ୱ ସହ ପାକିସ୍ତାନୀ ପ୍ରବାସୀଙ୍କ ସହ କଥାବାର୍ତ୍ତା ହୋଇଛନ୍ତି। ଏହା ବ୍ୟତୀତ, ଟାମ୍ପାରେ, ମୁନିର ବିଦାୟୀ ଆମେରିକୀୟ ସେଣ୍ଟ୍ରାଲ କମାଣ୍ଡ (ସେଣ୍ଟକମ୍‌) କମାଣ୍ଡର ଜେନେରାଲ ମାଇକେଲ ଇ.କୁରିଲ୍ଲାଙ୍କ ଅବସରକାଳୀନ ଉତ୍ସବ ଓ ଆଡମିରାଲ ବ୍ରେଡ୍‌ କୁପରଙ୍କ ଦ୍ୱାରା କମାଣ୍ଡ ସମ୍ଭାଳିବାର ଅବସରରେ ଆୟୋଜିତ କମାଣ୍ଡ ପରିବର୍ତ୍ତନ ଉତ୍ସବରେ ଯୋଗ ଦେଇ ଥିଲେ।