ନନ୍ଦିଘୋଷ ବ୍ୟୁରୋ : ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କୁ ଭେଟିଲେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ଓ ଆର୍ମିଚିଫ ଫିଲଡ ମାର୍ଶାଲ ଅସିମ ମୁନୀର। ହ୍ବାଇଟହାଉସରେ ହୋଇଛି ଭେଟଘାଟ। ସରିଫ ଓ ମୁନୀରଙ୍କୁ ଗ୍ରେଡ ଲିଡର୍ସ ବୋଲି ସମ୍ବୋଧନ କରିଥିଲେ ଟ୍ରମ୍ପ। ଦକ୍ଷିଣ ଏସିଆର ଆଣବିକ ଶକ୍ତି ସମ୍ପନ୍ନ ରାଷ୍ଟ୍ର ପାକିସ୍ତାନ ପ୍ରଧାନମନ୍ତ୍ରୀଙ୍କ ସହ ଟ୍ରମ୍ପ ଅନେକ ପ୍ରସଙ୍ଗରେ ଆଲୋଚନା କରିଥିବା ସୂଚନା ମିଳିଛି।
ଏହି ଭେଟଘାଟ ବେଳେ ସରିଫଙ୍କ ସହ ଉପସ୍ଥିତ ଥିଲେ ସେନାମୁଖ୍ୟ ଫିଲଡ ମାର୍ଶାଲ ଅସିମ ମୁନୀର। ଦୁଇ ନେତାଙ୍କ ମଧ୍ୟରେ ଦ୍ବିପାକ୍ଷିକ ସମ୍ପର୍କ, ବାଣିଜ୍ୟ, ଆଞ୍ଚଳିକ ସ୍ଥିରତା, ବିଶ୍ବ ସମସ୍ୟା ପ୍ରସଙ୍ଗରେ ଆଲୋଚନା ହୋଇଥିବା ସୂଚନା ମିଳିଛି। ଟ୍ରମ୍ପଙ୍କୁ ସାକ୍ଷାତ କରିବା ପୂର୍ବରୁ ୮ ଆରବ ଓ ମୁସଲିମ ରାଷ୍ଟ୍ରର ନେତାମାନଙ୍କୁ ଭେଟିଥିଲେ। ପୂର୍ବରୁ ପାକିସ୍ତାନ ଆତଙ୍କୀଙ୍କ ଭୂସ୍ବର୍ଗ ପାଲଟିଛି କହିଥିବା ଟ୍ରମ୍ପଙ୍କ ସହ ସେହି ପାକିସ୍ତାନର ପ୍ରଧାନମନ୍ତ୍ରୀଙ୍କୁ ଗ୍ରେଟ ଲିଡର କହିବା ଚର୍ଚ୍ଚାର ବିଷୟ ହୋଇଛି। ଗତ ଜୁନରେ ଅସିମ ମୁନୀରଙ୍କୁ ୱାଶିଂଟନରେ ସ୍ବାଗତ କରିଥିଲେ ଟ୍ରମ୍ପ। ଭାରତ ଓ ପାକିସ୍ତାନ ମଧ୍ୟରେ ଅସ୍ତ୍ରବିରତି ନେଇ ଟ୍ରମ୍ପଙ୍କ ଭୂମିକା ଗୁରୁତ୍ବପୂର୍ଣ୍ଣ ଥିଲା ବୋଲି କହିଥିବା ମୁନୀର ଦର୍ଶାଇଥିଲେ। ୨୦୧୯ ପରଠାରୁ ଦୁଇ ନେତାଙ୍କ ମଧ୍ୟରେ ପ୍ରଥମ ଥର ଲାଗି ଏହି ଭେଟଘାଟ ହୋଇଛି।
