ଜେଲରୁ ବାହାରିବା ପରେ ପ୍ରଧାନମନ୍ତ୍ରୀ ମୋଦିଙ୍କ ସମ୍ପର୍କରେ କଣ କହିଲେ ଚିଦାମ୍ବରମ ?
ନୂଆଦିଲ୍ଲୀ: ପ୍ରଧାନମନ୍ତ୍ରୀଙ୍କ ଉପରେ ପୂର୍ବତନ ଅର୍ଥମନ୍ତ୍ରୀଙ୍କ ଆକ୍ରମଣ । ଜେଲରୁ ଜାମିନରେ ଆସିବାର ଦିନକ ପରେ ମୋଦି ସରକାର ଉପରେ ଖୁବ୍ ବର୍ଷିଛନ୍ତି ପୂର୍ବତନ ଅର୍ଥମନ୍ତ୍ରୀ ପି.ଚିଦାମ୍ବରମ । ଆର୍ଥିକ ମାନ୍ଦାବସ୍ଥାକୁ ନେଇ ଚିଦାମ୍ବରମ ସମାଲୋଚନା କରିଛନ୍ତି ।
ଲଗାତାର ଖସୁଛି ଜିଡିପି
ଦେଶର ଅର୍ଥବ୍ୟବସ୍ଥା ବିଗିଡ଼ି ଯାଇଛି । ସରକାର ସମାଧାନର ବାଟ ଖୋଜୁ ନାହାଁନ୍ତି । ନୋଟବନ୍ଦୀ, ଜିଏସଟି ଓ ଟ୍ୟାକ୍ସ ଟେରରିଜିମ ପାଇଁ ଦେଶର ଅର୍ଥନୀତି ପଛକୁ ଠେଲି ହୋଇଯାଇଛି । ‘ଅଚ୍ଛେଦିନ’ର ନାରା ଦେଇଥିବା ସରକାର ‘ବୁରେଦିନ’ ନେଇ ଆସିଛି । ବିଗତ ୬ ମାସରେ ଦେଶର ଅଭିବୃଦ୍ଧି ହାର ୮ ପ୍ରତିଶତରୁ ୪.୫ ପ୍ରତିଶତକୁ ଖସି ଆସିଛି ।
କେମିତିକା ‘ଅଚ୍ଛେଦିନ’ ?
ଯଦି ବାର୍ଷିକ ବିକାଶ ଦର ୫ ପ୍ରତିଶତ ରୁହେ, ତେବେ ଆମେ ସୌଭାଗ୍ୟଶାଳୀ ଭାବୁ । ଦେଶର ବଡ଼ ଅର୍ଥନୀତିଜ୍ଞ ଡ. ଅରବିନ୍ଦ ସୁବ୍ରଣ୍ୟନ ୫ ପ୍ରତିଶତକୁ ନେଇ ଚେତାବନୀ ଦେଇଥିଲେ । କିନ୍ତୁ, ବର୍ତ୍ତମାନର ସ୍ଥିତି ତା’ଠାରୁ ଆହୁରି ସଙ୍ଗୀନ । ପିଏମ୍ ମୋଦି ସବୁବେଳେ ଏହି ପ୍ରସଙ୍ଗରେ ଚୁପ୍ ରହୁଛନ୍ତି । ମନ୍ତ୍ରୀମାନଙ୍କୁ ମିଛ କହିବାକୁ ଅନୁମତି ଦେଇଛନ୍ତି ।
ସତ ଉଗାଳୁଛି ସଂଖ୍ୟା
ଦେଶର ସବୁ ସେକ୍ଟରରେ ସ୍ଥିତି କହୁଛି ଅର୍ଥନୀତି ତଳମୁହାଁ । ଜିଡିପି ତଳମୁହାଁ, ବିଭିନ୍ନ ଉଦ୍ୟୋଗର ଅବସ୍ଥା ଖରାପ । ବେରୋଜଗାରୀ ବଢ଼ି ବଢ଼ି ଚାଲିଛି । ପିଆଜର ଦର ୧୦୦ ଟପିଛି ।.
କଶ୍ମୀର ପାଇଁ କୋହ
ଜେଲରୁ ବାହାରିବା ପରେ କଶ୍ମୀରର ୭୫ ଲୋକଙ୍କ ପାଇଁ ପି.ଚିଦାମ୍ବରମ ପ୍ରାର୍ଥନା କରିଛନ୍ତି । ଯେଉଁମାନେ ଗତ ଅଗଷ୍ଟ ୪ରୁ ଜେଲରେ ଅଛନ୍ତି । ଯଦି ଆମେ ଆମ ସ୍ୱାଧୀନତା କଥା କହୁଛୁ ତେବେ, ସେମାନଙ୍କ ସ୍ୱାଧୀନତାର ଲଢେଇ ଲଢ଼ିବା ଦରକାର ।
‘ମୋ ପୋଥି ପୂରା ପବିତ୍ର’
ମନ୍ତ୍ରୀ ଭାବେ ମୋ ରେକର୍ଡ ସମ୍ପୂର୍ଣ୍ଣ ଭଲ । ମୋ ସହିତ କାମ କରିଥିବା ଅଧିକାରୀ, ସମ୍ପର୍କରେ ଆସିଥିବା ଶିଳ୍ପପତି, ସାମ୍ବାଦିକ ଏହି ସମ୍ପର୍କରେ ଭଲଭାବେ ଜାଣିଛନ୍ତି ।
