ହଟିଲା ସ୍ୱର୍ଗଦ୍ୱାରରେ ଶବଦାହ କଟକଣା, ମାନିବାକୁ ପଡ଼ିବ ଏହି ନିୟମ
ପୁରୀ: ଏଣିକି ବାହାର ଜିଲ୍ଲାର ଲୋକ ବି ପୂର୍ବଭଳି ପୁରୀ ସ୍ୱର୍ଗଦ୍ୱାର ଶବଦାହ କରିପାରିବେ । ଜିଲ୍ଲା ବାହାର ଲୋକଙ୍କ ପାଇଁ ଜିଲ୍ଲା ପ୍ରଶାସନ ଲାଗୁ କରିଥିବା ପୂର୍ବ କଟକଣାକୁ ଉଠାଇ ନେଇଛି । ଫଳରେ ପୂର୍ବଭଳି ବାହାର ଜିଲ୍ଲା ଲୋକ ସ୍ୱର୍ଗଦ୍ୱାର ଆସି ଶେଷକୃତ୍ୟ କରିପାରିବେ ।
ତେବେ ଶବଦାହ ବେଳେ ସମସ୍ତଙ୍କୁ କୋଭିଡ୍ ନିୟମ ପାଳନ ସହ ଅନ୍ୟ ସମସ୍ତ ନିୟମ ମାନିବାକୁ ପଡ଼ିବ । କିନ୍ତୁ, ସ୍ୱର୍ଗଦ୍ୱାରରେ କରୋନାରେ ମୃତ୍ୟୁବରଣ କରିଥିବା ବ୍ୟକ୍ତିଙ୍କ ଶବଦାହ କରାଯାଇ ପାରିବ ନାହିଁ । ଏହା ଉପରେ ପୂର୍ବଭଳି କଟକଣା ବଳବତ୍ତର ରହିବ । ଏନେଇ ପୁରୀ ଜିଲ୍ଲାପାଳ ବଲୱନ୍ତ ସିଂ ସୂଚନା ଦେଇଛନ୍ତି ।
ପୂର୍ବରୁ କରୋନା ସଂକ୍ରମଣକୁ ଦୃଷ୍ଟିରେ ରଖି ଜିଲ୍ଲା ବାହାର ଲୋକଙ୍କ ଶବଦାହ ଉପରେ ଜିଲ୍ଲା ପ୍ରଶାସନ କଟକଣା ଲଗାଇଥିଲା । ଏବେ ରାଜ୍ୟ ସହ ଜିଲ୍ଲାରେ ସଂକ୍ରମଣ ଖସୁଥିବା ବେଳେ ପ୍ରଶାସନ ପ୍ରତିବନ୍ଧକ ହଟାଇ ଦେଇଛି । ଏଯାବତ୍ ପୁରୀ ଜିଲ୍ଲାରେ ୧୧ ହଜାର ୮୪୩ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ୧୧ ୪୯ ଜଣ ସୁସ୍ଥ ହୋଇଛନ୍ତି । ୭୧୬ଟି ସକ୍ରିୟ ସଂକ୍ରମଣ ରହିଥିବା ବେଳେ ଜିଲ୍ଲାରେ ୭୫ ଜଣ ସଂକ୍ରମିତଙ୍କ ମୃତ୍ୟୁ ହୋଇଛି ।
