ଓଡ଼ିଶା ସୀମା ଅତିକ୍ରମ କଲେ ପ୍ରବାସୀ ଓଡ଼ିଆ : ଗଞ୍ଜାମ ଜିଲ୍ଲା ଅଭିମୁଖେ ସୁରତ ଫେରନ୍ତା
ବ୍ରହ୍ମପୁର: ଓଡ଼ିଶା ପହଞ୍ଚିଲେ ପ୍ରବାସୀ ଓଡ଼ିଆ । ୪ଟି ବସ୍ ଏବେ ସୋନପୁର ଜିଲ୍ଲା ଅତିକ୍ରମ କରିଛି । ଆଉ କିଛି ଘଣ୍ଟା ପରେ ଜନ୍ମମାଟିରେ ପହଞ୍ଚିବେ ସୁରତ ଫେରନ୍ତା । ବସ୍ ଗୁଡିକୁ ପୋଲିସ ଏସ୍କଟ କରିଆଣୁଛି । ସୋନପୁର, ବୌଦ୍ଧ, ଫୁଲବାଣୀ ଦେଇ ଗଞ୍ଜାମ ଜିଲ୍ଲାରେ ପ୍ରବେଶ କରିବ । ୪ଟି ବସରେ ଗଞ୍ଜାମ ଜିଲ୍ଲାର ୧୦ରୁ ଅଧିକ ପଞ୍ଚାୟତର ୨୦୦ରୁ ଅଧିକ ଲୋକ ଆସୁଛନ୍ତି । ଗତ ରବିବାର ଦିନ ପ୍ରବାସୀ ଓଡିଆ ପରିବାରର ନେତୃତ୍ୱରେ ପାଣ୍ଡେସର ଓ ପଟେଲ ନଗର ଅଞ୍ଚଳରୁ ୪ଟି ବସ ବାହାରିଥିଲା । ସେପଟେ ଦ୍ୱିତୀୟ ପର୍ଯ୍ୟୟରେ ଆଉ ୪ ଟି ବସ ସୁରତରୁ ଓଡ଼ିଶା ବାହାରିଛି । ଓଡ଼ିଆ ସମାଜ ଟ୍ରଷ୍ଟ ପକ୍ଷରୁ ୪ଟି ବସରେ ୧୪୪ ଜଣ ପ୍ରବାସୀ ଓଡିଆ ଓଡ଼ିଶା ଆସୁଛନ୍ତି । ବର୍ତ୍ତମାନ ସୁଦ୍ଧା ୮ଟି ବସ ବାହାରିଥିବା ବେଳେ ଆସନ୍ତା ଦିନରେ ସୁରତ ପ୍ରଶାସନର ଅନୁମତି ମିଳିବା ପରେ ଅନେକ ବସ ଓଡିଶା ଯିବାର କାର୍ଯ୍ୟକ୍ରମ ରହିଛି । ବସରେ ଆସୁଥିବା ପ୍ରବାସୀ ଓଡିଆ ମାନେ ମାସ୍କ ପିନ୍ଧିଛନ୍ତି । ସଭିଏଁ ନିଜସ୍ୱ ଖର୍ଚ୍ଚରେ ଓଡିଶା ଆସୁଛନ୍ତି । ଗଞ୍ଜାମ ଜିଲ୍ଲାରେ ପହଞ୍ଚିଲା ପରେ ସଭିଙ୍କୁ କ୍ୱାରେଣ୍ଟାଇନ୍ରେ ରଖାଯିବ ।
