ବିହାର SIR ପ୍ରସଙ୍ଗରେ ଜୋର ଧରୁଛି ରଣନୀତି ; ଆଜି ବିରୋଧୀଙ୍କ ବଡ଼ ବୈଠକ
1 min read
ନନ୍ଦିଘୋଷ ବ୍ୟୁରୋ: ବିହାର ଏସଆଇଆର ପ୍ରସଙ୍ଗରେ ଜୋର ଧରୁଛି ରଣନୀତି। ଆଜି ବିହାର ସ୍ବତନ୍ତ୍ର ଭୋଟର ତାଲିକା ପ୍ରସଙ୍ଗରେ ବିରୋଧୀ ଦଳଙ୍କ ବଡ଼ ବୈଠକ। ସୁପ୍ରିମକୋର୍ଟ ଦେଇଥିବା ନିର୍ଦ୍ଦେଶକୁ ସ୍ବାଗତ କରିଥିଲେ ଇଣ୍ଡିମେଣ୍ଟ ନେତା । ନିର୍ବାଚନକୁ ଅଧିକ ସ୍ବଚ୍ଛ କରିବା ଲାଗି ଚାଲିଥିବା ଅଭିଯାନ କ୍ରମେ ଆଜି ପ୍ରତିବାଦ ଆନ୍ଦୋଳନ କରିବେ ବିରୋଧୀ ଦଳ। ବିହାର ଏସଆଇଆର ପ୍ରସଙ୍ଗରେ ସ୍ବତନ୍ତ୍ର ଆଲୋଚନା ଲାଗି ବିରୋଧୀ ଦାବି କରୁଥିଲେ ବି ସରକାର କରୁନାହାନ୍ତି କର୍ଣ୍ଣପାତ । ଆସନ୍ତା ୨୧ ତାରିଖ ସଂସଦ ଅଧିବେଶନର ଶେଷ ଦିନ ହୋଇଥିଲେବି ବିହାର ପ୍ରସଙ୍ଗରେ ସ୍ବତନ୍ତ୍ର ଆଲୋଚନା ହୋଇ ପାରୁନଥିବାରୁ ବିରୋଧୀ ପ୍ରକାଶ କରିଛନ୍ତି କ୍ଷୋଭ।
ଏସଆଇଆର ପ୍ରସଙ୍ଗରେ କଂଗ୍ରେସ ସାଂସଦ କେ.ସି. ବେଣୁଗୋପାଳ କହିଥିଲେ- ବିରୋଧୀଙ୍କ ଦାବି ସରକାର ନଶୁଣିବା ଯାଏଁ ଜାରି ରହିବ ଆନ୍ଦୋଳନ। ଗତ ୧୪ ତାରିଖରେ ବିହାର ଏସଆଇଆର ପ୍ରସଙ୍ଗରେ ସୁପ୍ରିମକୋର୍ଟ ଯେଉଁ ନିଷ୍ପତ୍ତି ଶୁଣାଇଥିଲେ ତାହାକୁ ସ୍ବାଗତ କରିଥିଲେ ବିରୋଧୀ। ଚିଠା ଭୋଟର ତାଲିକାରୁ ବାଦ୍ ପଡିଥିବା ୬୫ ଲକ୍ଷ ଭୋଟରଙ୍କ ନାମ ସର୍ଚ୍ଚ କରାଯାଇପାରୁଥିବା ତାଲିକାରେ ପ୍ରକାଶ କରିବାକୁ ଇସିଆଇଙ୍କୁ ନିର୍ଦ୍ଦେଶ ଦେଇଥିଲେ ଜଷ୍ଟିସ ସୂର୍ଯ୍ୟକାନ୍ତ ଓ ଜଷ୍ଟିସ ଜୟମାଲ୍ୟ ବାଗଚୀଙ୍କୁ ଗଠିତ ସୁପ୍ରିମକୋର୍ଟଙ୍କ ଦୁଇ ଜଣିଆ ଖଣ୍ଡପୀଠ। ଏହା ସହ ଏହି ୬୫ ଲକ୍ଷ ଭୋଟରଙ୍କୁ କାହିଁକି ତାଲିକାରୁ ବାଦ୍ କରାଯାଇଛି ତାହାର କାରଣ ବି ଦର୍ଶାଇବାକୁ କହିଥିଲେ ଅଦାଲତ। ଗତ ଅଗଷ୍ଟ ୧ ତାରିଖରେ ପ୍ରକାଶ ପାଇଥିଲା ଚିଠା ଭୋଟର ତାଲିକା । ଚୂଡ଼ାନ୍ତ ତାଲିକା ପ୍ରକାଶ ପାଇବ ସେପ୍ଟେମ୍ବର ୩୦ରେ ।
