ଆରମ୍ଭ ହେବ ସ୍ମାର୍ଟ ମିଟର ସତ୍ୟାଗ୍ରହ, ନିଷ୍ପତ୍ତି ପରିବର୍ତ୍ତନ କରାନଗଲେ ମାଡ଼ ଚେତାବନୀ

ଭୁବନେଶ୍ବର: ବାରମ୍ବାର ବିଜୁଳି କାଟୁଛନ୍ତି । ଲୋକଙ୍କୁ ଖରାରେ ଡହଳ ବିକଳ କରୁଛନ୍ତି । ସେପଟେ ସ୍ମାର୍ଟ ମିଟର ଲଗାଇ ଲୋକଙ୍କୁ ଆହୁରି ଶୋଷଣ କରିବା ପ୍ରକ୍ରିୟାକୁ ଜୋରଦାର ବିରୋଧ ଆରମ୍ଭ ହୋଇଯାଇଛି । ଯାହାକୁ ନେଇ ଓଡିଶା ରାଜ୍ୟ ବିଦ୍ୟୁତ ଉପଭୋକ୍ତା ମହାସଂଘ ସ୍ମାର୍ଟ ମିଟର ସତ୍ୟାଗ୍ରହର ଡାକରା ଦେଇଛି । ସ୍ୱାଧୀନତା ପୂର୍ବର ଲବଣ ସତ୍ୟାଗ୍ରହ ଭଳି ଓଡ଼ିଶାରେ ଖୁବ ଶୀଘ୍ର ସ୍ମାର୍ଟ ମିଟର ବିରୋଧରେ ଏହି ସତ୍ୟାଗ୍ରହ ହେବ । ସମସ୍ତ ସମଭାବାପନ୍ନ ରାଜନୈତିକ ଦଳ ସହିତ ଗଣସଂଗଠନ ସାଧାରଣ ଲୋକେ ଏହି ସତ୍ୟାଗ୍ରହରେ ସାମିଲ ହେବା ସହ ସରକାର ଓ ବିଦ୍ୟୁତ ବିତରକ କମ୍ପାନୀ ବିରୋଧରେ ଯୁଦ୍ଧଂଦେହୀ ଡାକରା ଦିଆଯାଇଛି ।

ରାଜ୍ୟବ୍ୟାପୀ ହେବାକୁ ଥିବା ଏହି ସତ୍ୟାଗ୍ରହରେ ସମସ୍ତ ସମଭାବାପନ୍ନ ରାଜନୈତିକ ଦଳ ସମେତ ଗଣସଂଗଠନ, ଏନଜିଓ ତଥା ସାଧାରଣ ଲୋକେ ସାମିଲ ହେବେ । ସବୁଆଡେ ସ୍ମାର୍ଟ ମିଟର ଭଙ୍ଗାଯିବା ସହ ଜାଳି ଦିଆଯିବ । ସରକାର ତଥା ବିଦ୍ୟୁତ କମ୍ପାନୀର ଏହି ନିଷ୍ପତ୍ତିକୁ ଜୋରଦାର ପ୍ରତିବାଦ କରାଯିବ । ରାଜ୍ୟରେ ଅସମ୍ଭବ ଭାବେ ଏବେ ଦରଦାମ ବଢିଥିବାବେଳେ ଲୋକଙ୍କ ପାଖରେ ରୋଜଗାର ନାହିଁ । ଏଭଳି ସ୍ଥିତିରେ ପ୍ରିପେଡ ସ୍ମାର୍ଟ ମିଟର ଲଗାଇବା ଲୋକଙ୍କ ପ୍ରତି ଘୋର ଅନ୍ୟାୟ । ଏହି ମିଟର ଲଗାଇଲେ ୭୦ରୁ ୮୦ ପ୍ରତିଶତ ବିଜୁଳି ବିଲ ବଢିବ ବୋଲି ଅଭିଯୋଗ ହୋଇଛି । ସରକାର ଦୁଇ ମାସ ପାଇଁ ମିଟର ରେଣ୍ଟ ଛାଡ଼ ପାଇଁ କହିଛନ୍ତି । କିନ୍ତୁ ଆଗକୁ ରେଣ୍ଟ ସାଧାରଣ ଗ୍ରାହକଙ୍କୁ ହିଁ ଦେବାକୁ ପଡିବ । ତେଣୁ କମ୍ପାନୀକୁ ଲାଭ ଦେବାକୁ ଲୋକଙ୍କୁ ଲୁଣ୍ଠନର ଏହା ବଡ଼ ଅସ୍ତ୍ର ବୋଲି କୁହାଯାଇଛି । ବିଜୁଳି କମ୍ପାନୀଗୁଡିକ ଏହି ସ୍ମାର୍ଟ ମିଟର ମାଧ୍ୟମରେ ଚାରି ଲକ୍ଷ କୋଟି ଲାଭ କରିବେ । ସେହି ଅର୍ଥ ସାଧାରଣ ବିଜୁଳି ଗ୍ରାହକଙ୍କଠାରୁ ଲୁଟ କରାଯିବାର ଯୋଜନା ହୋଇଛି । ଏହାକୁ ନେଇ ଶକ୍ତି ବିଭାଗକୁ ସତର୍କ କରିଛି ବିଦ୍ୟୁତ ଉପଭୋକ୍ତା ମହାସଂଘ । ଗୁଣାତ୍ମକ ଓ ମାଗଣା ବିଜୁଳି ଦେବାକୁ ସରକାର କହିଥିଲେ ମଧ୍ୟ ରାଜ୍ୟବ୍ୟାପୀ ଏବେ ଘଣ୍ଟା ଘଣ୍ଟା ଅଘୋଷିତ ବିଜୁଳି କାଟ ହେଉଛି । ତେଣୁ ଆଗେ ଗୁଣାତ୍ମକ ବିଜୁଳି ଯୋଗାଣ ପାଇଁ ସରକାର ଉଦ୍ୟମ କରନ୍ତୁ ଓ ସ୍ମାର୍ଟ ମିଟର ଲଗାଇବା ନିଷ୍ପତ୍ତି ପ୍ରତ୍ୟାହାର କରନ୍ତୁ ବୋଲି ଦାବି କରିଛି ମହାସଂଘ ।

ସେପଟେ ରାଜନୈତିକ ଦଳଗୁଡିକ ମଧ୍ୟ ବିଦ୍ୟୁତ ବିତରକ କମ୍ପାନୀ ଓ ସରକାରଙ୍କ ଏହି ଆଭିମୁଖ୍ୟକୁ ତୀବ୍ର ନିନ୍ଦା କରିଛନ୍ତି । ଗତକାଲି ରାଜ୍ୟବ୍ୟାପୀ ସ୍ମାର୍ଟ ମିଟର ଓ ବିଜୁଳି ବିଭ୍ରାଟ ପ୍ରସଙ୍ଗକୁ ନେଇ ବିରୋଧ ହୋଇଛି । ପ୍ରଥମେ ବିରୋଧ କଲା ପରେ ସ୍ମାର୍ଟ ମିଟର ସ୍ଥଗିତ ରଖିଥିଲେ । ଏବେ ଜବରଦସ୍ତ ଲଗାଉଛନ୍ତି । କିନ୍ତୁ ଏଥିରୁ ବିରତ ନ ରହିଲେ ଯେଉଁ କର୍ମଚାରୀମାନେ ସ୍ମାର୍ଟ ମିଟର ଲଗାଇବାକୁ ଯିବେ ସେମାନେ ମାଡ଼ ଖାଇବେ ଓ ସେଥିପାଇଁ ସରକାର ଦାୟୀ ରହିବେ ବୋଲି ଚେତାଇ ଦେଇଛି ସିପିଆଇ । ଚାରିଆଡେ ସ୍ମାର୍ଟ ମିଟର ବିରୋଧରେ ପ୍ରତିବାଦ ହେବା ସହ ପ୍ରବଳ ଖରାରେ ବିଜୁଳି କାଟକୁ ମଧ୍ୟ ଜୋରଦାର ବିରୋଧ କରାଯିବ । ସେପଟେ କଂଗ୍ରେସର କହିବା କଥା ଲୋକଙ୍କୁ ସ୍ମାର୍ଟ ତାରିକାରେ ଲୁଟ କରିବାକୁ ଏହା ସରକାରଙ୍କ ଷଡଯନ୍ତ୍ର । ୩୦୦ ୟୁନିଟ ମାଗଣା ବିଜୁଳି ଦେବାର କଥା କହି ଓଡ଼ିଶାର ବିଜୁଳି ଗ୍ରାହକଙ୍କୁ ଏଭଳି ଲୁଟିବା ବିରୋଧରେ ତୀବ୍ର ପ୍ରତିବାଦ କରାଯିବ ବୋଲି ଚେତାଇ ଦେଇଛି କଂଗ୍ରେସ ।

ସ୍ମାର୍ଟ ମିଟରକୁ ବିରୋଧ କରିବା ସହ ପ୍ରତିଶ୍ରୁତି ଅନୁଯାୟୀ ବିଜେପି ସରକାର ୩୦୦ ୟୁନିଟ ମାଗଣା ବିଜୁଳି ନ ଦେଲେ ଆଗାମୀ ଦିନରେ ରାଜ୍ୟବ୍ୟାପୀ ବିଶାଳ ସତ୍ୟାଗ୍ରହ ଓ ଜନ ଆନ୍ଦୋଳନ ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ ହୋଇଛି ।