କେବେ ବସିବ ବିଧାନସଭା ଅଧିବେଶନ ? ପୁଣି ବିଚାର ବିମର୍ଶ କରିବେ ବାଚସ୍ପତି
ଭୁବନେଶ୍ୱର: ସେପ୍ଟେମ୍ବର ୨୩ରେ ବସିବ ବିଧାନସଭାର ମୌସୁମୀ ଅଧିବେଶନ । ଏନେଇ ପୁଣି ବିଚାର ବିମର୍ଶ ଆରମ୍ଭ କରିଛନ୍ତି ବାଚସ୍ପତି । ଏଥର ଅଧିବେଶନ ସଂସଦୀୟ ଢାଞ୍ଚାରେ ବସିବାକୁ ଯାଉଛି । ତେଣୁ ବିଧାନସଭାରେ ପ୍ରଶ୍ନକାଳ ହେବ ନାହିଁ । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ମୁଖ୍ୟ ବିରୋଧୀ ବିଜେପି ଓ କଂଗ୍ରେସ । ବିରୋଧୀଙ୍କ ଯୁକ୍ତି ହେଲା ପ୍ରଶ୍ନକାଳ ବିନା ବିଧାନସଭା ଚାଲିବାର କୌଣସି ଅର୍ଥ ନାହିଁ । ସେପଟେ ବରିଷ୍ଠ ବିଧାୟକମାନଙ୍କ ପାଇଁ ହୋଇଥିବା ସ୍ୱତନ୍ତ୍ର ବ୍ୟବସ୍ଥାକୁ ନାପସନ୍ଦ କରିଛନ୍ତି ବରିଷ୍ଠ କଂଗ୍ରେସ ବିଧାୟକ ସୁର ରାଉତରାୟ ।
ସେପଟେ ଶାସକ ଦଳ କହିଛି, ବାଚସ୍ପତି ଯାହା ନିଷ୍ପତ୍ତି ନେବେ ସେହି ଅନୁସାରେ ଗୃହ ଚାଲିବ । ଏଠି ଯିଏ ମୁଖ୍ୟ ବିରୋଧୀ ସଂସଦରେ ସେମାନେ ଶାସକ ଦଳ ଦଳ । ସଂସଦ ଅଧିବେଶନରେ ବି ପ୍ରଶ୍ନକାଳ ବନ୍ଦ କରାଯାଇଛି । କୋଭିଡ୍ ଗାଇଡ୍ ଲାଇନ୍ ଓ ସ୍ଵାସ୍ଥ୍ୟ ବିଭାଗର ପରାମର୍ଶ ଏବଂ ସଂସଦ ଅଧିବେଶନ ନୀତି ନିୟମକୁ ବିଚାର କରି ବାଚସ୍ପତି ନିଷ୍ପତ୍ତି ନେବେ ବୋଲି କହିଛି ଶାସକ ଦଳ ।
ସୂଚନା ଅନୁସାରେ ସେପ୍ଟେମ୍ବର ୨୩ ରୁ ୩୦ ଯାଏଁ ବିଧାନସଭା ବସିବ ବୋଲି ସୂଚନା ମିଳିଛି । ଅଧିବେଶନ ବସିବାର ୨ ଦିନ ପୂର୍ବରୁ ସମସ୍ତ ବିଧାୟକଙ୍କ କୋଭିଡ୍ ଟେଷ୍ଟ କରାଯିବ । ଏହାର ପାଞ୍ଚ ଦିନ ପରେ ପୁଣି ଥରେ ଟେଷ୍ଟ କରାଯିବ । ତେବେ ସାମ୍ବାଦିକଙ୍କୁ ଅଧିବେଶନ ଅନୁମତି ମିଳିବ କି ନାହିଁ ତାହା ଏଯାଏ ସ୍ଥିର ହୋଇନାହିଁ ।
