ରାଜ୍ୟସଭାରେ ପ୍ରଧାନମନ୍ତ୍ରୀଙ୍କ ଅଭିଭାଷଣକୁ ବିରୋଧୀଙ୍କ କଡ଼ା ସମାଲୋଚନା, କହିଲେ ଭ୍ରମିତ କରୁଛନ୍ତି ମୋଦି
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟସଭାରେ ରଖିଥିବା ଅଭିଭାଷଣକୁ ସମାଲୋଚନା କରିଛନ୍ତି ବିରୋଧିୀ । କଂଗ୍ରେସ ସାଂସଦ ମଲିକାର୍ଜୁନ୍ ଖଡଗେ କହିଛନ୍ତି ପ୍ରଧାନମନ୍ତ୍ରୀ ଗୃହର ସଦସ୍ୟଙ୍କୁ ଭ୍ରମରେ ପକାଇଛନ୍ତି । ପୂର୍ବତନ ପ୍ରଧାନମନ୍ତ୍ରୀ ଡଃ ମନମୋହନ ସିଂ ଓ ପୂର୍ବତନ କୃଷି ମନ୍ତ୍ରୀ ଶରଦ ପାଓ୍ବାରଙ୍କୁ ନେଇ ମୋଦି ଦେଇଥିବା ବୟାନ ସତ ନୁହେଁ । ବଡ କମ୍ପାନୀଙ୍କୁ ଫାର୍ମିଙ୍ଗ କଣ୍ଟ୍ରାକ୍ଟ ଦେବା କଥା କେବେ ବି କହିନଥିଲେ ମନମୋହନ ସିଂ ।
ତିନି କୃଷି ଆଇନ୍ ପ୍ରତ୍ୟାହାର ନେଇ ପ୍ରଧାନମନ୍ତ୍ରୀ କିଛି କହିବେ ବୋଲି ଆଶା ଥିଲା । ହେଲେ ସେଭଳି କିଛି କହିଲେ ନାହିଁ ମୋଦି । ଅନ୍ନଦାତାମାନେ ଦୀର୍ଘ ଦିନ ଧରି ଆନ୍ଦୋଳନରେ ବସିଥିଲେ ମଧ୍ୟ ଏଥି ପ୍ରତି ସରକାରଙ୍କ କୌଣସି ଆନ୍ତରିକତା ନଥିବା କହିଛି କଂଗ୍ରେସ ।
ସୂଚନଯୋଗ୍ୟ, ଦେଶରେ କୃଷି ଆନ୍ଦୋଳନ ତେଜିବାରେ ଲାଗିଥିବାବେଳେ ରାଜ୍ୟସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜର ଅଭିଭାଷଣ ରଖିଛନ୍ତି । ସେ ବିରୋଧୀଙ୍କୁ କଡ଼ା ଜବାବ ଦେବା ସହ ଆନ୍ଦୋଳନକାରୀ ଚାଷୀଙ୍କୁ ମଧ୍ଯ ଏକ ଖାସ ଅପିଲ୍ କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଏମଏସପି ଥିଲା, ଏମଏସପି ଅଛି ଆଉ ଆଗକୁ ବି ଏମଏସପି ରହିବ, ଚାଷୀ ଆନ୍ଦୋଳନ ବନ୍ଦ କରିଦେବା ଉଚିତ୍।
ମୋଦି ଲାଲ ବାହାଦୁର ଶାସ୍ତ୍ରୀଙ୍କ କଥା ମନେପକାଇ କହିଛନ୍ତି, ଶାସ୍ତ୍ରୀଙ୍କୁ ମଧ୍ଯ କୃଷି ନିୟମ ସଂଶୋଧନ ବେଳେ ଅନେକ ସମସ୍ୟାର ସମ୍ମୁଖୀନ ହେବାକୁ ପଡ଼ିଥିଲା । ହେଲେ ସେ ପଛକୁ ହଟି ନଥିଲେ । ସେତେବେଳେ ବାମପନ୍ଥୀମାନେ କଂଗ୍ରେସକୁ ଆମେରିକାର ଏଜେଣ୍ଟ ବୋଲି କହୁଥିଲେ, ଆଉ ଆଜି ସେମାନେ ମୋତେ ଦୁର୍ବ୍ୟବହାର କରୁଛନ୍ତି ଗାଳି ଦେଉଛନ୍ତି ।
ଏଥିସହ ମୋଦି ବିରୋଧୀଙ୍କୁ କଡ଼ା ଯବାବ ଦେଇ କହିଥିଲେ ଯେ, ପୂର୍ବ କେନ୍ଦ୍ରମନ୍ତ୍ରୀ ଶରଦ ପାୱାରଙ୍କ ସମେତ ବହୁ କଂଗ୍ରେସ ନେତା ମଧ୍ଯ କୃଷି ନିୟମ ସଂଶୋଧନ ବିଷୟରେ କହିଛନ୍ତି । ଶରଦ ପାୱାର ଏବେ ବି କୃଷି ସଂଶୋଧନକୁ ନେଇ କୌଣସି ପ୍ରକାରର ବିରୋଧ କରିନାହାଁନ୍ତି । ଆମକୁ ଯାହା ଠିକ୍ ଲାଗିଲା ତାହା କଲୁ । ଆଗକୁ ବି ସଂଶୋଧନ ଜାରି ରହିବ । ଏବେ ବିରୋଧୀ ୟୁଟର୍ଣ୍ଣ ନେଉଛନ୍ତି, କାହିଁକିନା ଏବେ ରାଜନୀତି ସରଗରମ୍ ଅଛି ।
