ବିଧାନସଭା ଗୃହରେ ବିରୋଧୀଙ୍କ ଦୁଇଦୁଇଥର ହଟ୍ଟଗୋଳ, ଗୃହ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବି
ଭୁବନେଶ୍ୱର: ବିଧାନସଭା ମୌସୁମୀ ଅଧିବେଶନର ଦ୍ୱିତୀୟ ଦିନରେ ବି ହଟ୍ଟଗୋଳ । ଗୃହ କାର୍ଯ୍ୟ ଆରମ୍ଭରୁ ବିରୋଧୀ ହୋ ହଲ୍ଲା ଆରମ୍ଭ କରି ଦେଇଛନ୍ତି । ନାରାବାଜି ଓହଙ୍ଗାମା ଯୋଗୁଁ ଅପରାହ୍ଣ ୪ଟା ପର୍ଯ୍ୟନ୍ତ ଗୃହକୁ ମୁଲତବି ରଖିଛନ୍ତି ବାଚସ୍ପତି । ଆଜି ଅଧିବେଶନ ଆରମ୍ଭରୁ ମାହାଙ୍ଗା ଡବଲ ମର୍ଡର ଓ ଚାଷୀ ପ୍ରସଙ୍ଗରେ ପୋଡିୟମରେ ଚଢି ହୋ ହଲ୍ଲା କରିଥିଲେ କଂଗ୍ରେସ ଓ ବିଜେପି ବିଧାୟକ । ଫଳରେ ବାଚସ୍ପତି ପ୍ରଥମେ ଦିନ ସାଢ଼େ ୧୧ଟା ପର୍ଯ୍ୟନ୍ତ ଗୃହକୁ ମୁଲତବି ଘୋଷଣା କରିଥିଲେ । ଏହାପରେ ପୁଣି ଗୃହ ଆରମ୍ଭ ହୋଇଥିଲା ।
ଶୂନ୍ୟକାଳ ଭଳି ପ୍ରଶ୍ନକାଳକୁ ଚଲାଇ ଦେଇନଥିଲେ ବିରୋଧୀ । ଅଚଳାବସ୍ଥା ଜାରି ରହିବାରୁ ବାଚସ୍ପତି ଅପରାହ୍ଣ ୪ଟା ପର୍ଯ୍ୟନ୍ତ ଗୃହକୁ ମୁଲତବି କରିଛନ୍ତି । ମରୁଡି ପ୍ରସଙ୍ଗରେ ପୁଣି ଥରେ ଆଲୋଚନା ହେବ ବୋଲି ସର୍ବଦଳୀୟ ବୈଠକ ପରେ ବାଚସ୍ପତି ଗୃହକୁ ସୂଚନା ଦେଇଛନ୍ତି । ଆଲୋଚନା ପାଇଁ କଂଗ୍ରେସ ଗୃହରେ ଦାବି କରିଥିଲା । ସରକାର ଆଲୋଚନା କରି ଏନେଇ ଉଚିତ ପଦକ୍ଷେପ ନେବେ ବୋଲି କହିଛନ୍ତି ବାଚସ୍ପତି । ଆଜି ଜଳସମ୍ପଦ, ଯୋଜନା ଓ ସଂଯୋଜନା, ପର୍ଯ୍ୟଟନ, ସୂଚନା ଓ ଲୋକସମ୍ପର୍କ, ଓଡ଼ିଶା ଭାଷା ସାହିତ୍ୟ ଓ ସଂସ୍କୃତି, ପରିବହନ ବିଭାଗର ପ୍ରଶ୍ନକାଳ ଥିଲା ।
ବିଧାନସଭାର ମୌସୁମୀ ଅଧିବେଶନରେ ମାତ୍ର ୮ଟି କାର୍ଯ୍ୟ ଦିବସ ରହିଛି। ଦୁଇ ଦିନ ହେଲା ବିରୋଧୀମାନେ ପ୍ରଶ୍ନକାଳ ଚଲାଇ ଦେଉନାହାନ୍ତି । ଫଳରେ ବହୁ ବିଧାୟକ ହତାସ ହୋଇଛନ୍ତି । ଦୀର୍ଘଦିନରୁ ସେମାନେ ଯେଉଁ ପ୍ରଶ୍ନର ଉତ୍ତର ଚାହୁଁଥିଲେ, ତାହା ମିଳିପାରିଲା ନାହିଁ । ପ୍ରଶ୍ନକାଳକୁ ଚଲାଇ ତାପରେ ନିଜ ନିଜ ଦାବି ଉପସ୍ଥାପନ କରିବାରେ କିଛି ଅସୁବିଧା ନାହିଁ ବୋଲି ବିଶେଷଜ୍ଞମାନେ କହିଛନ୍ତି । ବିରୋଧୀଙ୍କ ଏଭଳି ଆଭିମୁଖ୍ୟକୁ ସାଧାରଣରେ ନାପସନ୍ଦ କରାଯାଇଛି ।
