ସରିଲା I.N.D.I.A ବୈଠକ, ପ୍ରଧାନମନ୍ତ୍ରୀ ପଦ ପାଇଁ ଖଡଗେଙ୍କ ନାମ ରଖିଲେ ମମତା
ନୂଆଦିଲ୍ଲୀ: ସରିଲା ଦିଲ୍ଲୀରେ ଚାଲିଥିବା ଇଣ୍ଡିଆ ମେଣ୍ଟର ବୈଠକ । ମଙ୍ଗଳବାର ହୋଇଥିବା ଏହି ବୈଠକରେ ଟିଏମସି ଅଧ୍ୟକ୍ଷା ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରଧାନମନ୍ତ୍ରୀ ପଦ ପାଇଁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କ ନାମ ପ୍ରସ୍ତାବ ଦେଇଛନ୍ତି । ମିଳିଥିବା ସୂଚନା ଅନୁସାରେ ଅନ୍ୟ କିଛି ନେତା ମମତାଙ୍କ ପ୍ରସ୍ତାବକୁ ସମର୍ଥନ କରିଛନ୍ତି । ହେଲେ ଖଡଗେ କହିଥିଲେ, ଏବେ ନିର୍ବାଚନ ସମୟ । ଏବେ ନିର୍ବାଚନ ଜିତିବା ପାଇଁ କାମ କରିବାକୁ ପଡ଼ିବ । ପ୍ରଧାନମନ୍ତ୍ରୀ ପ୍ରାର୍ଥୀ ପରେ ଦେଖିବା ।
ବୈଠକରେ ଆଗାମୀ ଲୋକସଭା ନିର୍ବାଚନରେ ସିଟ୍ ବଣ୍ଟନ, ମିଳିତ ଜନସଭା ଓ ନୂଆ କରି ରଣନୀତି କରାଯିବା ଉପରେ ଆଲୋଚନା ହୋଇଛି । ଅଶୋକ ହୋଟେଲରେ ଆୟୋଜିତ ଏହି ବୈଠକରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ଶରଦ ପାଓ୍ବାର, ମମତା ବାନାର୍ଜୀ, ଲାଲୁ ପ୍ରସାଦ ଯାଦବ, ନୀତୀଶ କୁମାର, ସୋନିଆ ଗାନ୍ଧୀ, ରାହୁଲ ଗାନ୍ଧୀ, ଅରବିନ୍ଦ କେଜରିଓ୍ବାଲ, ଏମକେ ଷ୍ଟାଲିନ, ଅଖିଳେଶ ଯାଦବ, କେସି ବେଣୁଗୋପାଳ, ରଞ୍ଜନ ସିଂହ, ଉଦ୍ଧବ ଠାକରେ, ଆଦିତ୍ୟ ଠାକରେ, ମହବୁବା ମୁଫତି, କୃଷ୍ଣା ପଟେଲ ଏବଂ ପଲ୍ଲବୀ ପଟେଲଙ୍କ ସମେତ ଅନ୍ୟ ନେତାମାନେ ସାମିଲ ହୋଇଥିଲେ ।
