ଓ୍ବାନ ନେସନ ଓ୍ବାନ ଇଲେକ୍ସନ ପ୍ରସ୍ତାବକୁ କ୍ୟାବିନେଟ ମଞ୍ଜୁରୀ, କେମିତି ହେବ ଆଇନରେ ପରିଣତ

ନୂଆଦିଲ୍ଲୀ: ୱାନ ନେସନ ୱାନ ଇଲେକ୍ସନ ପ୍ରସ୍ତାବକୁ କେନ୍ଦ୍ର କ୍ଯାବିନେଟରେ ମଞ୍ଜୁରୀ ମିଳିଛି । ଗୋଟିଏ ଦିନରେ ହେବ ଲୋକସଭା ଓ ବିଧାନସଭା ନିର୍ବାଚନ । ନିର୍ବାଚନ ସରିବାର ୧୦୦ ଦିନ ମଧ୍ୟରେ ହେବ ପୌର ନିର୍ବାଚନ । ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ପ୍ଯାନେଲ ରିପୋର୍ଟ ଉପରେ ମୋହର ମାରିଛି ମୋଦି  କ୍ଯାବିନେଟ । ଦେଶର ରହିବ ଗୋଟିଏ ଭୋଟର ତାଲିକା । ୨୦୨୯ ଲୋକସଭା ନିର୍ବାଚନ ପରେ ଏହାକୁ ଲାଗୁ କରିବାକୁ ପ୍ରସ୍ତାବ ଦେଇଛି ପ୍ଯାନେଲ । କ୍ଯାବିନେଟର ଏହି ପ୍ରସ୍ତାବକୁ ନେଇ ଦେଶରେ ଆଲୋଚନା ହେବ । ସମସ୍ତଙ୍କ ମତାମତ ଗ୍ରହଣ କରିବା ପରେ ଏହାକୁ ଲାଗୁ କରାଯିବ ବୋଲି କେନ୍ଦ୍ର ସରକାର କହିଛନ୍ତି । ସଂସଦର ଆସନ୍ତା ଶୀତକାଳୀନ ଅଧିବେଶନରେ ଆଗତ ହୋଇପାରେ ଏହି ବିଲ୍ ।

ଗତ ମାର୍ଚ୍ଚରେ ଏହି ରିପୋର୍ଟ ପ୍ରଦାନ କରିଥିଲେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ । ଏଥିରେ ରହିଛି, ଦେଶରେ ଗୋଟିଏ ସାଧାରଣ ଭୋଟର ତାଲିକା ରହିବ । ଦୁଇଟି ପର୍ଯ୍ୟାୟରେ ଭୋଟ ପାଇଁ ପ୍ରସ୍ତାବ ଦିଆଯାଇଛି । ପ୍ରଥମ ପର୍ଯ୍ୟାୟରେ ଲୋକସଭା ଓ ବିଧାନସଭା ନିର୍ବାଚନ । ଦ୍ଵିତୀୟ ପର୍ଯ୍ୟାୟରେ ହେବ ପୌର ନିର୍ବାଚନ । ପ୍ରଥମ ନିର୍ବାଚନ ସରିବାର ୧୦୦ ଦିନ ମଧ୍ୟରେ ହେବ ପୌର ନିର୍ବାଚନ । ୨୦୨୯ ଲୋକସଭା ନିର୍ବାଚନ ପରେ ଲାଗୁ କରିବାକୁ ପ୍ରସ୍ତାବ ରହିଛି । ରାଷ୍ଟ୍ରପତି ଗୋଟିଏ ତାରିଖ ସ୍ପଷ୍ଟ କରିବେ । ସେହିଦିନ ଅନୁଷ୍ଠିତ ହେବ କେନ୍ଦ୍ର ଓ ରାଜ୍ୟର ବିଧାନସଭା ନିର୍ବାଚନ । ଏଥିଲାଗି ୫ରୁ ୬ ସମ୍ବିଧାନ ସଂଶୋଧନ ଆବଶ୍ୟକ ପଡ଼ିବ । କ୍ଯାବିନେଟର ଏହି ପ୍ରସ୍ତାବକୁ ନେଇ ସାରା ଦେଶରେ ଆଲୋଚନା ହେବ । ଏହା ପରେ ଯାଇ ଲାଗୁ ହେବ ଏକ ଦେଶ ଏକ ନିର୍ବାଚନ ଆଇନ । ଏହାଦ୍ଵାରା ସାରା ଦେଶରେ ଗୋଟିଏ ସମୟରେ ନିର୍ବାଚନ ଅନୁଷ୍ଠିତ ହୋଇପାରିବ । ଏହି ବ୍ୟବସ୍ଥା ଦ୍ଵାରା ସମୟ ବଞ୍ଚିବା ସହ କୋଟି କୋଟି ଟଙ୍କାର ଖର୍ଚ୍ଚକୁ ମଧ୍ୟ ରୋକାଯାଇପାରିବ ।

କିଏ କରୁଛନ୍ତି ସମର୍ଥନ, କିଏ କରୁଛନ୍ତି ବିରୋଧ

ୱାନ ନେସନ ୱାନ ଇଲେକ୍ସନ ପ୍ରସ୍ତାବକୁ ସମର୍ଥନ କରିଥିଲେ ୩୨ ରାଜନୈତିକ ଦଳ । କେନ୍ଦ୍ରର ଏନଡିଏ ମେଣ୍ଟରେ ବିଜେପିକୁ ବାଦ ଦେଲେ ଚନ୍ଦ୍ରବାବୁ ନାଇଡୁଙ୍କ ଟିଡିପି, ନୀତୀଶ କୁମାରଙ୍କ ଜେଡିୟୁ, ଚିରାଗ ପାସୱାନଙ୍କ ଏଲଜେପି ଭଳି ସହଯୋଗୀ ଦଳ ରହିଛନ୍ତି । ଏକ ଦେଶ ଏକ ନିର୍ବାଚନ ପ୍ରସ୍ତାବକୁ ନେଇ ପୂର୍ବତନ ରାଷ୍ଟ୍ରପତି କୋବିନ୍ଦ ଦେଶର ୬୨ଟି ରାଜନୈତିକ ଦଳଗୁଡିକର ସହ ଆଲୋଚନା କରିଥିଲେ । ୧୫ଟି ରାଜନୈତିକ ଦଳ ଏହାର ବିରୋଧ କରିଥିଲେ । କଂଗ୍ରେସ, ସମାଜବାଦୀ ପାର୍ଟି, ଆମ ଆଦମୀ ପାର୍ଟି, ସିପିଏମ ଓ ବିଏସପି ଭଳି ୧୫ଟି ରାଜନୈତିକ ଦଳ ଏହାର ଘୋର ବିରୋଧ କରିଥିଲେ । ଝାଡ଼ଖଣ୍ଡ ମୁକ୍ତି ମୋର୍ଚ୍ଚା, ଟିଡିପି, ଇଣ୍ଡିଆନ ୟୁନିଅନ ମୁସଲିମ ଲିଗ୍ ଭଳି ୧୫ଟି ଦଳ କୌଣସି ଜବାବ ରଖି ନଥିଲେ ।

କେମିତି ଆଇନରେ ହେବ ପରିଣତ ?

ବିଲକୁ ଆଇନରେ ପରିଣତ କରିବାକୁ ହେଲେ ସଂସଦରେ ଗୃହୀତ କରିବାକୁ ପଡିବ । ସଂସଦରେ ଦୁଇ ତୃତୀୟାଂଶ ସଦସ୍ୟଙ୍କ ସମର୍ଥନରେ ଏହି ବିଲ ପାର୍ଲାମେଣ୍ଟରେ ଗୃହୀତ ହେବ । ଲୋକସଭାରେ ଏହି ବିଲ୍ ପାସ କରିବାକୁ ୩୬୨  ଓ ରାଜ୍ୟସଭାରେ ୧୬୩ ସଦସ୍ୟଙ୍କ ସମର୍ଥନ ଆବଶ୍ୟକ । ସଂସଦର ଦୁଇ ସଦନରେ ଏହି ବିଲ୍ ପାସ ହେବା ପରେ ଅତି କମରେ ୧୫ ରାଜ୍ୟର ଅନୁମୋଦନ ଲାଭ କରିବାକୁ ପଡ଼ିବ । ମୋଟ ୨୯ ରାଜ୍ୟ ମଧ୍ୟରୁ ୧୫ ରାଜ୍ୟର ବିଧାନସଭାରେ ଏହି ବିଲ୍ ଗୃହୀତ ହେବା ଆବଶ୍ୟକ । ଏହାପରେ ବିଲରେ ରାଷ୍ଟ୍ରପତିଙ୍କ ଦସ୍ତଖତ ପରେ ବିଲ୍ ଆଇନରେ ପରିଣତ ହେବ । ଆସନ୍ତା ଶୀତକାଳୀନ ଅଧିବେଶନରେ ଏହି ବିଲକୁ ପାର୍ଲାମେଣ୍ଟରେ ଆଗତ କରିବାକୁ ଯୋଜନା କରିଛନ୍ତି କେନ୍ଦ୍ର ସରକାର ।