ତହସିଲ୍ କାର୍ଯ୍ୟାଳୟରେ ଦୁର୍ନୀତି ! ଗୋଟିଏ ଲୋକର ତିନି ଗୋଟି ଜମି ପଟ୍ଟାରେ ତିନି ପ୍ରକାର ଜାତି

ଗଜପତି: ଜଣେ ମଣିଷ, ହେଲେ ତିନି ଭିନ୍ନ ଭିନ୍ନ ଜାତି । ଅସମ୍ଭବ ଲାଗୁଥିଲେ ବି ସତ । ସରକାରୀ ନଥିପତ୍ରରେ ଜଣେ ବ୍ୟକ୍ତିଙ୍କ ତିନି ତିନୋଟି ଜାତି ଉଲ୍ଲେଖ ରହିଛି । ଗଜପତି ଜିଲ୍ଲା ନୂଆଗଡ଼ ତହସିଲ କାର୍ଯ୍ୟାଳୟରୁ ଜାରି ହୋଇଥିବା ଅଲଗା ଅଲଗା ତିନୋଟି ଜମି ପଟ୍ଟାରେ ଜଣେ ବ୍ୟକ୍ତିଙ୍କର ତିନୋଟି ଅଲଗା ଅଲଗା ଜାତି ନାଁ ଉଲ୍ଲେଖ ହୋଇଛି । ଯାହା ସରକାରୀ କର୍ମଚାରୀଙ୍କ ଦୁର୍ନୀତିକୁ ପଦାରେ ପକାଇଛି ।

ଗ୍ରାମ ଗାଇନ୍ତା ସାହି । ନାଁ ବଳରାମ ନାରା । ପିତା ଜଡିଆ ନାରା । ପଟ୍ଟା ନମ୍ବର- ୨୧ । ଜାତି ଗାଇନ୍ତା । ଆଉ ଏକ ପଟ୍ଟା ଖାତା ନମ୍ବର- ୬୨/୧୧୩ । ସମାଲ ଲୋକ ହେଲେ ଜାତୀ ଗୌଡ଼ । ସେହିଭଳି ଆଉ ଏକ ପ୍ଲଟ ନମ୍ବର-୭୬/୧୧କୁରେ ବି ସେହି ସମାନ ଲୋକ ହେଲେ ଜାତି ଶବର ଉଲ୍ଲେଖ ରହିଛି । ଗଜପତି ଜିଲ୍ଲା ନୂଆଗଡ଼ ତହସିଲ ପକ୍ଷରୁ ଏହି ପଟ୍ଟା ପ୍ରଦାନ କରାଯାଇଛି ।

ଅନୁନ୍ନତ ବର୍ଗ ଲୋକଙ୍କ ବିକାଶ ନିମନ୍ତେ ବିଭିନ୍ନ ଜାତିଭିତ୍ତିକ ସଂରକ୍ଷଣ ଓ ସୁବିଧା ସୁଯୋଗ ଯୋଗାଇ ଦେବା ପାଇଁ ଜାତିଗତ ପ୍ରମାଣପତ୍ର ଦେବା ବ୍ୟବସ୍ଥା ରହିଛି । ତେବେ ନୂଆଗଡ ତହସିଲ ଅନ୍ତର୍ଗତ ପାଇକ ଅନ୍ତରଡ଼ା ପଞ୍ଚାୟତର ରୁବୁଡିସିଂ ଗାଁରେ ଦେଖା ଦେଇଛି ବ୍ୟତିକ୍ରମ । ଦୁର୍ନୀତି କରି ଜଙ୍ଗଲ ଜମି ଅଧିକାର ଦିଆଯାଇଥିବା ଅଭିଯୋଗ କରିଛନ୍ତି ଅଞ୍ଚଳବାସୀ । ତେବେ ଅଭିଯୋଗ ପରେ ତଦନ୍ତ କରି ସମ୍ପୃକ୍ତ ଦୋଷୀଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଜିଲ୍ଲାପାଳ ।