ବ୍ୟୁଟି ପାର୍ଲର ମାଲିକାଣୀଙ୍କଠାରୁ କୋଟିଏରୁ ଅଧିକ ଟଙ୍କାର ଠକେଇ

ବାରିପଦା: ବ୍ୟୁଟି ପାର୍ଲର ଉପରେ ଠକଙ୍କ ନଜର । ପାର୍ଲର ମାଲିକାଣୀ ଓ ବିୟୁଟିସିଆନଙ୍କୁ ହାତ କରି ଠକିଲେ କୋଟିଏରୁ ଅଧିକ ଟଙ୍କା । ଏମିତି ଏକ ଠକେଇର ମାଷ୍ଟର ମାଇଣ୍ଡକୁ ବାରିପଦା ଓ ବାଲେଶ୍ବର ପୋଲିସ ମିଳିତ ଭାବେ ଧରିଛନ୍ତି । ଠକ ଜଣଙ୍କ ହେଲେ ସୀତାକାନ୍ତ ମହାପାତ୍ର । ବ୍ୟୁଟି ପାର୍ଲର ସାମଗ୍ରୀ ଦେବା ନାଁରେ କୋଟିଏରୁ ଅଧିକ ଟଙ୍କା ଚୂନ ଲଗାଇ ଥିବା ହୋଇଛି ଅଭିଯୋଗ ।

ପୋଲିସ ସୂଚନା ଅନୁସାରେ, ସୀତାକାନ୍ତ ରାଜ୍ୟର ବିଭିନ୍ନ ଜିଲ୍ଲାରେ ଥିବା ବିୟୁଟି ପାର୍ଲରକୁ ସାମଗ୍ରୀ ଯୋଗାଉଥିଲେ । ପରେ ନିଜେ ଏକ ସଂସ୍ଥା ଖୋଲି ସାମଗ୍ରୀ ଦେବା ଆରମ୍ଭ କରିଥିଲେ । ବେପାର ବଢ଼ାଇବା ବାହାନାରେ ପାର୍ଲର ମାଣିକାଣୀ ଏବଂ ବ୍ୟୁଟିସିଆନମାନଙ୍କୁ ବିଭିନ୍ନ ପ୍ରଲୋଭନ ଦେଖାଇଥିଲା । ବର୍ଷକରେ ଟଙ୍କା ଦୁଇଗୁଣା କରିଦେବାର ଲୋଭ ଦେଖାଇ ସେମାନଙ୍କୁ ଏଜେଣ୍ଟ କରିବା ସହ ତାଙ୍କ ପାଖରୁ ଟଙ୍କା ଲୁଟି ନେଇଥିଲେ । ବାରିପଦା ଲାଲବଜାରର ଏକ ବିୟୁଟି ପାର୍ଲରରୁ ଏମିତି ୧୨ଲକ୍ଷ ଟଙ୍କା ଠକି ନେଇଥିବା ଅଭିଯୋଗ ହୋଇଛି । ଏହା ସହିତ ରାଜ୍ୟର ବିଭିନ୍ନ ଅଞ୍ଚଳରୁ ଏକାଧିକ ଅଭିଯୋଗ ପରେ ସୀତାକାନ୍ତକୁ ଗିରଫ କରିଛି ପୋଲିସ ।