ପ୍ରବାସୀଙ୍କୁ ଫେରାଇ ଆଣିଲେ ସବ୍ୟସାଚୀ,ଫ୍ଲାଇଟରେ ଆସିଲେ ପୁରା ପରିବାର
ଭୁବନେଶ୍ୱର: ପୁଣି ଜଣେ ଅଭିନେତାଙ୍କ ଅଭିନବ ଉଦ୍ୟମ । ଲକ୍ଡାଉନ୍ ଯୋଗୁ ବେଙ୍ଗାଲୁରୁରେ ଫସିରହିଥିବା ବଲାଙ୍ଗୀର ଟିକରପଡାର ଏକ ଶ୍ରମିକ ପରିବାରକୁ ସହଯୋଗର ହାତ ବଢାଇଲେ ଅଭିନେତା ସବ୍ୟସାଚୀ । କାମ କରିବାକୁ ଯାଇ ପରିବାର ସହିତ ଦୁଇମାସ ହେଲା ବେଙ୍ଗାଲୁରୁରେ ଫସି ରହିଥିଲେ ପ୍ରଦୀପ ତାଣ୍ଡି ଓ ତାଙ୍କ ପରିବାର ।
ଏହି ସଙ୍କଟ ସମୟରେ ପ୍ରଦୀପଙ୍କ ମା’ ଆଠ ଦିନ ତଳେ ପାରାଲିସିସ୍ର ଶିକାର ହୋଇଥିଲେ । ଏପରି ଅବସ୍ଥାରେ ମା’ର ଚିକତ୍ସା କରି ଆର୍ଥିକ ସମସ୍ୟାର ସମ୍ମୁଖୀନ ହୋଇଥିଲେ ପ୍ରଦୀପ । ଏପରିକି ଘର ଭଡା ଦେବାକୁ ମଧ୍ୟ ଟଙ୍କାଟିଏ ନଥିବାରୁ ଘର ମାଲିକ ଘରୁ କାଢି ଦେଇଥିଲେ । ଫଳରେ ପ୍ରଦୀପଙ୍କ ସହ ପରିବାରର ୭ ଜଣ ସଦସ୍ୟ ବାଙ୍ଗଲୁରୁର ରାସ୍ତା କଡରେ ରହୁଥିଲେ ।
ଏହି ଖବର ସେଠାକାର ଜଣେ ସାମ୍ବାଦିକଙ୍କ ମାଧ୍ୟମରେ ସୋସିଆଲ୍ ମିଡିଆରେ ଭାଇରାଲ ହୋଇଥିଲା । ଏହି ଭାଇରାଲ ଭିଡିଓ ସବ୍ୟସାଚୀଙ୍କ ନଜରରେ ପଡିବା ପରେ ସଙ୍ଗେସଙ୍ଗେ ସେ ଏହି ପରିବାରକୁ ଉଦ୍ଧାର କରିବା ପାଇଁ ଉଦ୍ୟମ ଆରମ୍ଭ କରିଦେଇଥିଲେ । ପ୍ରଥମେ ରୋଗୀଣା ମା’ର ଚିକିତ୍ସାର ବ୍ୟବସ୍ଥା କରିଥିଲେ । ପରେ ପୁରା ପରିବାରକୁ ଏକ ଫ୍ଲାଇଟ୍ରେ ଓଡ଼ିଶାକୁ ଫେରାଇ ଆଣିଥିଲେ ସବ୍ୟସାଚୀ । ଭୁବନେଶ୍ୱରରେ ପହଞ୍ଚିବା ପରେ ସେମାନଙ୍କୁ ବଲାଙ୍ଗୀର ପଠାଯାଇଥିବା ସୂଚନା ମିଳିଛି ।
