ହ୍ୱାଇଟ୍ ହାଉସ୍ ବାହାରେ ପଥର ମାଡ଼: ଅଣ୍ଡରଗ୍ରାଉଣ୍ଡ ହେଲେ ଟ୍ରମ୍ପ
ଓ୍ୱାସିଂଟନ: ଆମେରିକାର ୨ଡଜନରୁ ଅଧିକ ସହରରେ କୃଷ୍ଣକାୟ ନାଗରିକଙ୍କ ମୃତ୍ୟୁକୁ ନେଇ ଗତ କିଛି ଦିନ ଧରି ତୀବ୍ର ବିରୋଧ ହୋଇଆସୁଛି । ନ୍ୟୁଜ୍ ଏଜେନ୍ସର ସୂଚନା ମୁତାବକ ଓ୍ୱାସିଂଟନ ହ୍ୱାଇଟ୍ ହାଉସର ବାହାରେ ବହୁ ସଂଖ୍ୟାରେ ଲୋକେ ବିକ୍ଷୋଭ ପ୍ରଦର୍ଶନ କରୁଛନ୍ତି ।
ପରିସ୍ଥିତିକୁ ଦେଖି ରାଷ୍ଟ୍ରପତିଙ୍କୁ ଅଣ୍ଡରଗ୍ରାଉଣ୍ଡ ବଙ୍କର ମଧ୍ୟକୁ ଯିବାକୁ ପଡ଼ିଲା । ଆବଶ୍ୟ ପରବର୍ତ୍ତୀ ସମୟରେ ଅଧିକାରୀଙ୍କ ପକ୍ଷରୁ କୁହାଗଲା ରାଷ୍ଟ୍ରପତିଙ୍କ ପ୍ରତି ସେଭଳି କିଛି ବିପତ୍ତି ନଥିଲା । ସୂଚନା ମୁତାବକ, ଶୁକ୍ରବାର ସିକ୍ରେଟ ସର୍ଭିସ ଏଜେନ୍ସିର ପରାମର୍ଶ ପରେ ଟ୍ରମ୍ପ ବଙ୍କରକୁ ନିଆଯାଇଥିଲେ ।
ପାଖାପାଖି ଘଣ୍ଟାଏ ସେ ବଙ୍କରରେ ରହିଥିଲେ । ଆବଶ୍ୟ ନାଗରିକଙ୍କ ମୃତ୍ୟୁକୁ ବିରୋଧ କରୁଥିବା ପ୍ରଦର୍ଶନକାରୀ ହିଂସ୍ର ହୋଇଯାଇଥିଲେ । ସେମାନେ ଗୁଡ଼ାଏ ସ୍ଥାନରେ ବିଲ୍ଡିଂରେ ନିଆଁ ଲଗାଇବା ସହିତ ଦୋକାନ ଲୁଟ୍ କରିଥିଲେ । ହ୍ୱାଇଟ୍ ହାଉସ୍ ବାହାରେ ମଧ୍ୟ ପ୍ରଦର୍ଶନକାରୀ ପଥର ଫୋପାଡ଼ୁଥିବା ଦେଖିବାକୁ ମିଳୁଥିଲା ।
ହ୍ୱାଇଟ ହାଉସ ବାହାରେ ବହୁ ସଂଖ୍ୟାରେ ପ୍ରଦର୍ଶନକାରୀ ଏକଜୁଟ ହୋଇଥିଲେ । ଯେଉଁଥିପାଇଁ ସୁରକ୍ଷାକର୍ମୀଙ୍କୁ ନାକେଦମ ହେବାକୁ ପଡ଼ିଥିଲ । ପ୍ରଦର୍ଶନକାରୀ ଗେଟ୍ ପର୍ଯ୍ୟନ୍ତ ପଥର ଫୋପାଡ଼ିବାରେ ଲାଗିଥିଲେ । ରବିବାର ବେଳକୁ ପ୍ରଦର୍ଶନକାରୀ ହ୍ୱାଇଟ୍ ହାଉସ୍ ନିକଟରେ ପହଞ୍ଚିଥିଲେ । ସୁରକ୍ଷା ଦୃଷ୍ଟିରୁ ମେୟର ରାତି ୧୧ ପରେ କର୍ଫ୍ୟୁ ଘୋଷଣା କରିଥିଲେ ।
ପୋଲିସ କଷ୍ଟଡିରେ କୃଷ୍ଣକାୟ ନାଗରିକ ଜଜ୍ ଫ୍ଳାୟର୍ଡଙ୍କ ମୃତ୍ୟୁ ହୋଇଛି । ସେମାନଙ୍କୁ ନ୍ୟାୟ ଦେବା ପାଇଁ ପ୍ରଦର୍ଶନ ଆରମ୍ଭ ହୋଇଛି । ଆମେରିକାରେ ଦୀର୍ଘ ସମୟ ଧରି କୃଷ୍ଣକାୟ ଭେଦଭାବର ଶିକାର ହେଉଛନ୍ତି । ଜଜ୍ ଫ୍ଳୟାର୍ଡ ମାମଲା ପୂରା ବ୍ୟବସ୍ଥାରେ ପରିବର୍ତ୍ତନ ଦାବି କରୁଛି ।
ସୂଚନା ଯୋଗ୍ୟ ଯେ, ହ୍ୱାଇଟ୍ ହାଉସ୍ରେ ଜରୁରୁୀକାଳୀନ ସମୟରେ ବିଶେଷ ସୁରକ୍ଷା ପାଇଁ ବଙ୍କର ନିର୍ମାଣ କରାଯାଇଛି । ଆତଙ୍କବାଦୀ ଆକ୍ରମଣ ଭଳି ଘଟଣାରେ ସୁରକ୍ଷିତ ରହିବା ପାଇଁ ଏହାକୁ ବ୍ୟବହାର କରିଥାନ୍ତି ।
