ଓମିକ୍ରନ୍ ଆତଙ୍କ, ଦିଲ୍ଲୀରେ ଲାଗୁ ହେଲା ୟେଲୋ ଆଲର୍ଟ

ନୂଆଦିଲ୍ଲୀ: ସାରା ଦେଶରେ ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢ଼ିବାରେ ଲାଗୁଛି । ଭାରତର ୨୧ଟି ରାଜ୍ୟରେ ଓମିକ୍ରନ ମାମଲା ଦେଖିବାକୁ ମିଳିଛି । ବର୍ତ୍ତମାନ ଭାରତରେ ୨୧ଟି ରାଜ୍ୟରୁ ମୋଟ ୬୫୩ ଜଣ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇସାରିଛନ୍ତି । ଏହି ମାମଲା ମଧ୍ୟରୁ କେବଳ ରାଜଧାନୀ ଦିଲ୍ଲୀରେ ୧୬୫ ପଜିଟିଭ୍ କେସ୍ ସାମ୍ନାକୁ ଆସିଛି ।

ଦିଲ୍ଲୀରେ ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା ବଢ଼ୁଥିବାର ଦେଖି ଦିଲ୍ଲୀରେ ୟେଲୋ ଆଲର୍ଟ ଜାରି କରିଛନ୍ତି ଦିଲ୍ଲୀ ସରକାର । ଏଥି ସହ ଗ୍ରେଡେଡ୍ ରେସପନ୍ସ ଆକସନ୍ ପ୍ଲାନ ମଧ୍ୟ ଲାଗୁ କରାଯାଇଛି । ୟେଲୋ ଆଲର୍ଟ ଜାରି ହେବା ଫଳରେ ଦିଲ୍ଲୀରେ କିଛି କଟକଣା ପରିବର୍ତ୍ତନ ହୋଇଛି । ୟେଲୋ ଆଲର୍ଟ ଜାରି ହେବା ଫଳରେ ବିବାହ ଓ ଅନ୍ତିମ ସଂସ୍କାରରେ ୨୦ରୁ ଅଧିକ ଲୋକଙ୍କୁ ସାମିଲ କରିବାକୁ ଅନୁମତି ମିଳିବ ନାହିଁ । ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିବ । ରାତି ୧୦ରୁ ସକାଳ ୫ ପର୍ଯ୍ୟନ୍ତ ନାଇଟ କର୍ଫ୍ୟୁ ଲାଗୁ କରାଯାଇଛି । ସପ୍ତାହନ୍ତ କର୍ଫ୍ୟୁ ଆଉ ରହିବ ନାହିଁ । ନିର୍ମାଣ କାର୍ଯ୍ୟ ଓ ଇଣ୍ଡଷ୍ଟ୍ରି ଖୋଲା ରହିବ, ରେଷ୍ଟୁରାଣ୍ଟ, ବାର୍ ଓ ଦିଲ୍ଲୀ ମେଟ୍ରୋରେ ୫୦ ପ୍ରତିଶତ ଲୋକଙ୍କୁ ନେଇ ଚାଳିବାକୁ ଅନୁମତି ମିଳିବ । ସେହିପରି ଭାବରେ ଅଡିଟେରିୟମ, ବିବାହ ମଣ୍ଡପ, ସ୍ପା, ଜିମ୍, ଯୋଗ କେନ୍ଦ୍ର ଓ ପାର୍କ ବନ୍ଦ ରହିବ । ଅନ୍ୟପକ୍ଷରେ ଅଟୋ, ଇ-ରିକ୍ସା, ଟ୍ୟାକ୍ସି ଓ ସାଇକେଲ ଟ୍ୟାକ୍ସରେ କେବଳ ଦୁଇ ଜଣ ଯାତ୍ରୀଙ୍କୁ ନେଇ ଯାଇପାରିବେ ବୋଲି ଆଜି ଘୋଷଣା ହୋଇଥିବା ଗାଇଡ ଲାଇନରେ କୁହାଯାଇଛି ।

ଅନ୍ୟପକ୍ଷରେ ଦିଲ୍ଲୀରେ ଦିନରେ ଲୋକ ଭିଡ ଜମାଇବା ସହ ମାସ୍କ ବ୍ୟବହାର କରୁନଥିବା ଦେଖିବାକୁ ମିଳୁଛି । ଏଭଳି ହେଲେ ସରକାର କଡା କାର୍ଯ୍ୟାନୁଷ୍ଠାନ ନେବେ ବୋଲି କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ । ବର୍ତ୍ତମାନ ଦିଲ୍ଲୀରେ ପଜିଟିଭିଟି ରେଟ୍ ୦.୫ ପ୍ରତିଶତ ରହିଛି । କରୋନାର ନୂଆ ଭାରିଆଣ୍ଟ ଓମିକ୍ରନକୁ ନେଇ ଡରିବାର କୌଣସି କାରଣ ନାହିଁ । ଦିଲ୍ଲୀ ସରକାର କରୋନର ନୂଆ ଭାରିଆଣ୍ଟ ଓମିକ୍ରନ ମୁକାବିଲା ପାଇଁ ପୂରା ପ୍ରସ୍ତୁତ ବୋଲି କହିଛନ୍ତି ଅରବିନ୍ଦ କେଜ୍ରିଓ୍ୱାଲ ।