ମହାରାଷ୍ଟ୍ରରେ ମାଡୁଛି ଓମିକ୍ରନ: ରାହୁଲଙ୍କ ରାଲି ବାତିଲି

ମୁମ୍ବାଇ: ମହାରାଷ୍ଟ୍ରରେ ବଢ଼ି ଚାଲିଥିବା ଓମିକ୍ରନ ଆକ୍ରାନ୍ତ ଦେଶର ଚିନ୍ତା ବଢ଼ାଇବାରେ ଲାଗିଛି । ରାଜ୍ୟରେ ଆଜି ୮ ଜଣ ଓମିକ୍ରନ ସଂକ୍ରମିତ ଚିହ୍ନଟ ହୋଇଛନ୍ତି । ମାୟାନଗରି ମୁମ୍ବାଇରୁ କେବଳ ୭ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ପୁଣେରୁ ଜଣଙ୍କୁ ଚିହ୍ନଟ କରାଯାଇଛି । ବର୍ତ୍ତମାନ ସୁଦ୍ଧା ରାଜ୍ୟରେ ୨୮ ଜଣ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇସାରିଛନ୍ତି ।

ବଢ଼ି ଚାଲିଥିବା ଓମିକ୍ରନ ସଂକ୍ରମଣକୁ ନେଇ ରାଜ୍ୟ ସରକାରଙ୍କ ତରଫରୁ ବିମାନବନ୍ଦରରେ କଟକଣା କଡା କରିଦିଆଯାଇଛି । ସଂକ୍ରମିତ ରାଷ୍ଟ୍ରରୁ ଆସୁଥିବା ଲୋକଙ୍କ ପାଇଁ କ୍ବାରେଣ୍ଟିନ ବ୍ୟବସ୍ଥା କରାଯାଇଛି । ତଥାପି ରାଜ୍ୟର ଅନ୍ୟ ସ୍ଥାନ ତୁଳନାରେ ଏଠାରେ ଅଧିକରୁ ଅଧିକ ସଂଖ୍ୟାରେ ଓମିକ୍ରନ ଆକ୍ରାନ୍ତ ଚିହ୍ନଟ ହେଉଛନ୍ତି ।

ସ୍ଥିତିକୁ ଦେଖି ରାହୁଲ ଗାନ୍ଧିଙ୍କ ରାଲିକୁ ରଦ୍ଦ କରିଦିଆଯାଇଛି । କଂଗ୍ରେସ ତରଫରୁ ଏହି ନିଷ୍ପତ୍ତି ନିଆଯାଇଛି ।

କେବଳ ମହାରାଷ୍ଟ୍ର ନୁହେଁ, ଦେଶର ଦିଲ୍ଲୀ, ରାଜସ୍ଥାନରେ ମଧ୍ୟ ଓମିକ୍ରନ ସଂକ୍ରମଣ ବଢ଼ିବାରେ ଲାଗିଛି । ଉଭୟ ଦିଲ୍ଲୀ ଓ ରାଜସ୍ଥାନରେ ଆଜି ୪ ଜଣ ଲେଖାଏଁ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । ଦିଲ୍ଲୀରେ ସଂଖ୍ୟା ୬ରେ ପହଞ୍ଚିଛି । ପୂରା ଦେଶକୁ ଦେଖିଲେ ବର୍ତ୍ତମାନ ସୁଦ୍ଧା ୫୭ ଜଣ ଆକ୍ରାନ୍ତ ଚିହ୍ନଟ ହୋଇସାରିଛନ୍ତି ।