କମନୱେଲଥ ଗେମ୍ସରୁ ବାଦ୍ ପଡ଼ିଲେ ଅଲିମ୍ପିକ ମେଡାଲ ବିଜେତା ନୀରଜ !
ନୂଆଦିଲ୍ଲୀ: ଅଲିମ୍ପିକ ମେଡାଲ ବିଜେତା ତଥା ଗତ ରବିବାର ବିଶ୍ୱ ଆଥଲେଟ୍ ଚାମ୍ପିଅନସିପରେ ରୌପ୍ୟ ପଦକ ଜିତିଥିବା ନୀରଜ ଚୋପ୍ରା କମନୱେଲଥ ଗେମ୍ସରୁ ବାଦ ପଡିଛନ୍ତି । ଆଘାତ କାରଣରୁ ତାଙ୍କୁ ବିଶ୍ରାମ ଦିଆଯାଇଛି । ଦେଶବାସୀଙ୍କ ଆଶା ଥିଲା ଯେ, ଅଲିମ୍ପିକ ଭଳି କମନୱେଲଥରେ ବି ନୀରଜ ସୁନା ପଦକ ଜିତିବେ । ହେଲେ ସେ ଆଶା ଏବେ ଆଶାରେ ରହିଯାଇଛି । ତେବେ ନୀରଜଙ୍କୁ ବିଶ୍ୱ ଆଥଲେଟ୍ ଚାମ୍ପିଅନସିପ୍ ରେ ଜାଭେଲିନ ଫାଇନାଲ ସମୟରେ ଆଘାତ ଲାଗିଥିଲା ।
ଫାଇନାଲରେ ନୀରଜ ନିଜ ଜଙ୍ଘରେ ପଟି ଘୋଡାଇଥିବାର ନଜର ମଧ୍ୟ ଆସିଥିଲେ । ଇଣ୍ଡିଆନ ଅଲିମ୍ପିକ ଆସୋସିଏସନର ଜେନେରାଲ ସେକ୍ରେଟାରୀ ରାଜୀବ ମେହତା ନୀରଜଙ୍କ କମନୱେଲଥ ନଖେଳିବା ନେଇ ସୂଚନା ଦେଇଛନ୍ତି । ସେ କହିଛନ୍ତି ୱାର୍ଲଡ ଆଥଲେଟିକ୍ ଚମ୍ପିଆନସିପ ସମୟରେ ତାଙ୍କୁ ଆଘାତ ଲାଗିଥିଲା । ଏବେ ସେ ଖେଳିବା ପାଇଁ ଫିଟ୍ ନାହାନ୍ତି । ଫାଇନାଲ ଇଭେଣ୍ଟ ପରେ ନୀରଜଙ୍କ ଏମଆରଆଇ ସ୍କାନ ହୋଇଥିଲା, ଯେଉଁଥିରେ ଗ୍ରୋଇନ ଇଞ୍ଜୁରୀ ଥିବା ଜଣାପଡ଼ିଥିଲା ।
ଏପରି ସ୍ଥିତିରେ ତାଙ୍କୁ ଏକମାସର ବିଶ୍ରାମ ପାଇଁ ପରାମର୍ଶ ଦିଆଯାଇଛି । କମନୱେଲଥ ଗେମ୍ସରେ ନୀରଜ ଚୋପଡାଙ୍କ ମ୍ୟାଚ ୫ ଅଗଷ୍ଟରେ ହେବାର ଥିଲା, ସେହିଦିନ ଜାଭେଲିନ ଥ୍ରୋର ଇଭେଣ୍ଟ ଥିଲା । ଏବେ ଏହି ଫିଲ୍ଡରେ ଭାରତର ଆଶା ଡିପି ମନୁ ଏବଂ ରୋହିତ ଯାଦବଙ୍କ ଠାରେ ରହିଛି । ଜାଭେଲିନ ଥ୍ରୋରେ ଏବେ ଏହି ଦୁଇ ଭାରତର ପ୍ରତିନିଧିତ୍ୱ କରିବେ ।
